Փաստ ինֆո

«Դոդիկ» արտահայտության համար ուսանողի սպանության, մեկ այլ ուսանողին միջին ծանրության վնասվածք պատճառելու գործով հարցաքննվեցին ամբաստանյալի համակուրսեցի վկաները:

Մասնավորապես, վկա Լիլիթը հայտնեց, որ տուժող Ռաֆֆին (նրան միջադեպի ժամանակ միջին ծանրության վնասվածք է պատճառվել) ասել է, որ բուկինիստի նվեր-քարտ է շահել և հարցրել, թե իրենց ծանոթներից ով կարող էր այն գնել: Վկան «դոդիկ»-ի խոսակցությունը չի լսել:

Վկան նույն օրը ժամեր անց իմացել է դեպքի մասին. լուրերից իմացել է, որ Վահե Մուրադյանը սպանված է, իսկ մյուս երիտասարդը՝ Ռաֆֆի Մարտիրոսյանը, վիրավորված է՝ ամբաստանյալի կողմից:

Մյուս վկան՝ Քաջիկը, հայտնեց, որ ամբաստանյալը՝ Կարեն Չատիկյանը, ասել է, որ «պետք է գնանք, տղաներին տեսնենք» այդ արտահայտության հետ կապված:

Վկան ներկա է եղել կողմերի հանդիպմանը, խոսակցության ժամանակ ուշադիր չի եղել, մտածել է՝ երբ է այս ամեն ինչն ավարտվելու: Այդ ժամանակ տեսնելով, որ մի տղա՝ հակառակ թիմից իր կողմն է գալիս բնազդաբար դուրս է եկել տաղավարից, որտեղ տեղի էր ունենում հանդիպումը, և գնացել է տղայի կողմը:

Վկան հայտնեց, որ «ինչ-որ բան զգացել է, որ եղավ, սակայն այդ պահին չեմ իմացել»:

Ըստ վկայի, ինքը դանակով կամ փայտով հարված չի տեսել, տեսել է, որ Կարենը և ևս մեկ տղա փախչում են, ինքն էլ նրանց հետևից է վազել: Ըստ վկայի, Կարենն ասաց, որ ինչ-որ մեկի ոտքին է խփել դանակով:

Ինչու է այդ արտահայտությունն արել՝ Կարենի հարցին, ըստ վկայի, պատասխանել է Անրին, սակայն նախաքննական ցուցմունքում նա հայտնել էր, մասնավորապես, որ Կարենի և Ռաֆֆիի միջև վեճ է սկսվել, նրանք երկուսն էլ խոսում էին:

Վկա Լևոնն իր ցուցմունքում նշեց, որ Ռաֆֆին ասել է, որ նվեր քարտը ցանկանում է վաճառել կես գնով՝ հինգ հազար դրամով: Իրենց էր առաջարկում, իրենք հրաժարվել են, հետո Հասմիկին ասել է՝ ձեր խմբի դոդիկներին հարցրու, Հասմիկն էլ կեսկատակ-կեսլուրջ ասել է՝ Քաջիկին կառաջարկես: Վկան հայտնեց, որ երբ քեֆի փող էին հավաքում, ինքը չի համաձայնել վճարել Հասմիկի փոխարեն, քանի որ Քաջիկի մասին այդպիսի բան է ասել:

Ըստ վկայի, Կարենն այդ օրն իրեն ասել է, որ մոտը դանակ կա, խնդրել է, որ իրեն տա, սակայն Կարենն ասել է, որ «լուրջ բան չի, մի երկու րոպեով գնում ենք խոսենք ու գանք»: Վկան դանակը Կարենի մոտ չի տեսել:

Վկան իր նախաքննական ցուցմունքում հայտնել էր, որ Կարենն՝ ի պատասխան Գևորգի հարցի՝ ասել է «դանակով եմ խփել»:

«Փաստինֆո»-ն ավելի վաղ հայտնել էր, որ 18-ամյա երիտասարդի սպանության մասին ահազանգն ստացվել է 2017թ. հունվարի 11-ին։ «Շտապօգնություն» ՓԲ ընկերությունից հաղորդում էր ստացվել առ այն, որ Երևան քաղաքի Վարդանանց փողոցի թիվ 28 շենքի բակում գտնվող տաղավարի սեղանին հայտնաբերվել է Վահե Մուրադյանի (ծնված՝1998 թվականի դեկտեմբերին) դին՝ կրծքավանդակի ձախ կեսի կտրած-ծակած վնասվածքով, իսկ մեկ այլ երիտասարդ՝ Ռաֆֆի Մարտիրոսյանը (ծնված՝ 1999 թ. մարտին), «ձախ սրունքի առաջնային մակերեսի ծակած-կտրած վերք» ախտորոշմամբ, նույն հասցեից տեղափոխվել է «թիվ 1 համալսարանական հիվանդանոց»:

Ըստ նախաքննական մարմնի, ուսանողների միջև վիճաբանությունն առաջացել է «դոդիկ» արտահայտության պատճառով, որի շուրջ պարզաբանումներ տալու համար, նախնական պայմանավորվածության համաձայն, կողմերը հանդիպել են Վարդանանց փողոցի թիվ 28 շենքի բակում։ Վիճաբանությունը վերածվել է ծեծկռտուքի, որի ընթացքում էլ 21-ամյա երիտասարդը իր մոտ գտնվող դանակով հարվածել է Ռ.Մարտիրոսյանին և Վ.Մուրադյանին, որի հետևանքով ստացած մարմնական վնասվածքներից վերջինս մահացել է, իսկ նրա համակուրսեցին՝ Ռ.Մարտիրոսյանը, ստացել միջին ծանրության մարմնական վնասվածքներ։

Աղբյուր` Փաստինֆո