Փաստ ինֆո

Սեպտեմբերի 27-ին Կալուգայի շրջանի Բորովսկի քաղաքային դատարանի դատավոր Պավել Տոլոկոննիկովը մեղավոր է ճանաչել 40-ամյա «օրենքով գող» Արսեն Մկրտչյանին, ով քրեական միջավայրում առավել հայտնի է որպես Արսեն Երևանսկի, խոշոր չափերի թմրանյութեր պահելու մեջ և նրան դատապարտել երեքուկես տարվա ազատազրկման:

Ըստ «Փրայմ Քրայմ» գործակալության, Արսենը, ով նախաքննության ժամանակ գտնվում էր տնային կալանքի մեջ, դատարանի դահլիճում վերցվել է կալանքի տակ: Ականատեսների վկայությամբ, ռեալ ժամկետով ազատազրկման դատավճիռը ամբաստանյալի համար միանգամայն անսպասելի է եղել:

Գործակալության տվյալներով, ավելի վաղ մերձմոսկովյան ոստիկանությունն երեք անգամ փորձել է նստեցնել Արսեն Մկրտչյանին՝ առաջին անգամ ավազակության, մարդու առևանգման և զենք ու թմրանյութեր պահելու համար՝ 2008թ. և երկու անգամ թմրանյութեր պահելու համար՝ 2009թ. (կործանարար կախվածությունից Արսենը չի հրաժարվել անգամ մեկուսարանի պատերի ներքո): Սակայն Մկրտչյանի կրիմինալ գործունեության բոլոր երեք դրվագները փլուզվել էին դատարաններում: Դրանից հետո Արսենը Պոդմոսկովիեի պնդերես ոստիկանների երեսից տեղափոխվել էր Կալուգայի շրջան, որը շուտով կնքել էին որպես նրա արգելավայր:

Գործակալությունը հիշեցնում է, որ այս տարվա հունվարին ՌԴ ՆԳՆ գլխավոր վարչության օպերատիվ ծառայողները նորից փորձել էին ամբաստանյալների աթոռին նստեցնել անխորտակ Քնդոյի զարմիկին: Այն բանին, թե ինչպես Արսենին ճաղերի հետև կուղարկեն հատկապես տնային կալանք նշանակելուց հետո («օրենքով գողերի» դատական պրակտիկայում եզակի դեպքերում կիրառվող խափանման միջոց) չէին հավատում անգամ ամենադաղված թերահավատները: Իր քառասունամյա տարիքում Արսենը, ով դեռևս չի եղել զոնայում, արդեն իսկական «կնքահոր» տեսք ունի. պարտադիր ձեռնափայտից զատ նրա ձեռքի տակ եղած հենաշարժական ապարատի զինանոցում կա հաշմանդամի սայլակ, որի համար նրա կողմից հաճախ այցելվող վայրերում, ինչպես իր ազգական «Գանզակ»-ի սրճարանում, որտեղ էլ նրան ձերբակալել են, թեքահարթակ է պատրաստվել: Հնարավոր է, եթե բարձրագույն ատյանի դատարանում հրաշք տեղի չունենա, քրեակատարողական համակարգի աշխատակիցներին հարկ կլինի Արսենի համար նորմալ հաշմանդամային զոնա գտնել:

Աղբյուր` Փաստինֆո