Փաստ ինֆո

Երևանի քաղաքապետարանին պատկանող «Կենտրոն Մաքրություն» փակ բաժնետիրական ընկերությունում կեղծ հավաքարարների անվամբ առանձնապես խոշոր չափերի հափշտակությունների աղմկահարույց գործով կայացվել է մեղադրական դատավճիռ՝ բոլոր 13 ամբաստանյալների վերաբերյալ: 

Այսպես,  02.04.2007թ. ապրիլից մինչև 2013թ. սեպտեմբերի ամիսը «Կենտրոն մաքրություն» ՓԲԸ-ի տնօրենի, ինչպես նաև ինժեների պաշտոնները զբաղեցրած Արթուր Հովհաննիսյանը մեղավոր է ճանաչվել ՀՀ Քրեական օրենսգրքի 178-րդ հոդվածի 3-րդ մասի 1-ին և 2-րդ կետերով՝ կազմակերպված խմբի կողմից առանձնապես խոշոր չափերով խարդախություն, 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախություն, 308-րդ հոդվածի 2-րդ մասով՝ Պաշտոնեական լիազորությունները չարաշահելն, որն անզգուշությամբ առաջացրել է ծանր հետևանքներ, 314-րդ հոդվածով՝ Պաշտոնեական կեղծիքը՝  երկու դրվագով: 

Արթուր  Հովհաննիսյանը դատապարտվել է յոթուկես տարվա ազատազրկման:  

Դատարանը նրա եղբորը՝  Սամվել Հովհաննիսյանին, ով նույնպես զբաղեցրել է հիշյալ՝ տնօրենի և ինժեների պաշտոնները, մեղավոր է ճանաչել ՀՀ Քրեական օրենսգրքի 178-րդ հոդվածի 3-րդ մասի 1-ին և 2-րդ կետերով, 178-րդ հոդվածի 3-րդ մասի 1-ին կետով, 314-րդ հոդվածով՝ երկու դրվագով և դատապարտել  6  տարվա ազատազրկման: 

Նշանակված պատժում հաշվակցվել է Սամվել  Հովհաննիսյանի՝ նախաքննության ընթացքում 1 տարի կալանքի տակ գտնվելու ժամկետը և նրա նկատմամբ վերջնական պատիժ է  նշանակվել  պայմանական ազատազրկում`  5 տարի ժամկետով՝  3 տարվա փորձաշրջանով: 

2003-2013 թվականներին ընկերության փոխտնօրենի պաշտոնը զբաղեցրած Արմեն Խաչատրյանը դատարանի դատավճռով մեղավոր է ճանաչվել  ՀՀ քրեական օրենսգրքի 178-րդ հոդվածի 3-րդ մասի 1-ին և 2-րդ կետերով և 314-րդ հոդվածով նախատեսված հանցագործությունների կատարման մեջ և դատապարտվել հինգուկես տարվա պայմանական ազատազրկման՝  3 տարվա փորձաշրջանով: 

2004 թվականից ընկերության գլխավոր հաշվապահի պաշտոնը զբաղեցրած Գագիկ Հարությունյանը մեղավոր  է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին և 2-րդ կետերով և 314-րդ հոդվածով նախատեսված հանցագործությունների կատարման մեջ և  դատապարտվել  հինգուկես տարվա պայմանական ազատազրկման՝   3 տարվա փորձաշրջանով: 

Ընկերությունում որպես աշխղեկ պաշտոնավարած Հրայր  Հակոբյանը և Ռոբերտ Խաչատրյանը մեղավոր են  ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին և 2-րդ կետերով և 325-րդ հոդվածի 2-րդ մասով նախատեսված հանցագործությունների կատարման մեջ՝ մի խումբ անձանց կողմից նախնական համաձայնությամբ փաստաթղթեր, դրոշմներ, կնիքներ, ձևաթղթեր կեղծելը, և դատապարտվել  5  տարվա ազատազրկման։ Նույն հոդվածներով մեղավոր են ճանաչվել նաև աշխղեկներ Սամվել Եղոյանն ու Գյուլիզար Շամոյանը՝ առաջինը դատապարտվել է հինգուկես տարվա ազատազրկման, իսկ երկրորդը՝ 5 տարվա պայմանական ազատազրկման՝  3 տարվա փորձաշրջանով: 

Ընկերության պահեստապետ  Գարեգին  Գասպարյանը և ավագ դիսպետչեր Հունան Տեր-Հովհաննիսյանը մեղավոր են   ճանաչվել ՀՀ քրեական օրենսգրքի 38-178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախությանն օժանդակելը, և 38-314-րդ հոդվածով՝ Պաշտոնեական կեղծիքին օժանդակելը և դատապարտվել  չորսուկես տարվա պայմանական ազատազրկման՝ 3 տարվա փորձաշրջանով: 

Ընկերության ավտոհավաքակայանի վարիչ Միսակ  Հարությունյանը և կադրերի բաժնի պետ Սամվել Պապոյանը մեղավոր են  ճանաչվել ՀՀ քրեական օրենսգրքի 38-314-րդ հոդվածով նախատեսված հանցագործության կատարման մեջ և դատապարտվել  6  ամսվա ազատազրկման:   

Ընկերության գլխավոր ինժեներ Տիգրան Հովհաննիսյանը նույնպես մեղավոր է ճանաչվել ՀՀ քրեական օրենսգրքի 38-314-րդ հոդվածով նախատեսված հանցագործության կատարման մեջ և դատապարտվել  6 ամսվա պայմանական ազատազրկման ՝ 1  տարվա փորձաշրջանով: 

Դատավճռով բավարարվել է Երևանի քաղաքապետարանի կողմից ներկայացված քաղաքացիական հայցը: Արթուր  Հովհաննիսյանից, Սամվել  Հովհաննիսյանից, Արմեն Խաչատրյանից, Գագիկ  Հարությունյանից, Գյուլիզար Շամոյանից, Սամվել Եղոյանից, Հրայր Հակոբյանից (վերջինիս համապարտության չափը՝ 101.066.467 ՀՀ դրամ), Ռոբերտ  Խաչատրյանից՝ (վերջինիս համապարտության չափը՝ 33.308.442  ՀՀ դրամ),  համապարտության կարգով հօգուտ Երևան համայնքի պետք է  բռնագանձվի  251.197.450  ՀՀ դրամ` որպես հանցագործությամբ պատճառված նյութական վնասի փոխհատուցում։ 

Արթուր Հովհաննիսյանից, Սամվել Հովհաննիսյանից, Գարեգին  Գասպարյանից և Հունան  Տեր-Հովհաննիսյանից՝ համապարտության կարգով, հօգուտ Երևան համայնքի պետք է բռնագանձվի 123.905.805 ՀՀ դրամ` որպես հանցագործությամբ պատճառված նյութական վնասի փոխհատուցում։ 

Գյուլիզար Շամոյանից և Սամվել  Եղոյանից՝ համապարտության կարգով հօգուտ Երևան համայնքի պետք է բռնագանձվի  29.740.991  ՀՀ դրամ` որպես հանցագործությամբ պատճառված նյութական վնասի փոխհատուցում։

Աղբյուր` Փաստինֆո