Փաստ ինֆո

Հերթական անգամ տեղի ունեցավ դատավորի փոփոխության գործընթաց, սակայն կրկին առանց դատավորի կողմից ինքնաբացարկ ընդունելու: Այս մասին նշեց փաստաբան Երվանդ Վարոսյանը՝ լրագրողների խնդրանքով մեկնաբանելով նաև Պավել Մանուկյանի և ևս 13 hոգու վերաբերյալ «Սասնա Ծռեր-1» գործի մասնատման որոշումը:

Ըստ փաստաբանի, նպատակը հետևյալն է՝ առաջին, գործերը տարանջատել և հանձնել նաև այլ դատավորների: Ե.Վարոսյանը չբացառեց, որ գործերը այլ դատարանների շենքերում կքննվեն: «Այսինքն՝ հնարավորինս տարանջատել, հնարավորինս իրարից հեռու ամեն ինչ իրականացնել»,- ասաց պաշտպանը:

Ի՞նչ սկբունքով են գործերը մասնատվել հարցին ի պատասխան Ե.Վարոսյանը նշեց՝ սկզբունք առհասարակ չկա:

«Ենթադրում եմ, որ մտածել են, թե Արտուշ Գաբրիելյանը ավելի հեշտ որ մասը յոլա կտանի, ուրիշ սկզբունք չկա»,- ասաց փաստաբանը՝ հավելելով, որ մասնատումից արդարադատությունը տուժելու է, որովհետև «գործերի կիսման այս արհեստական գործընթացը ոչ մի լավ բանի չի հանգեցնելու»:

Ըստ Երվանդ Վարոսյանի, անհնար է նույն գործը, նույն ապացույցների շրջանակում, նույն տուժողներով ու նույն վկաներով ու նույն ամբաստանյալներով երեք տարբեր տեղեր քննել: «Պատկերացրեք, մի վկան գալիս է, առաջին դատարանում հարցաքննվելու, արդեն հարցերը տալիս են, նա տալիս է իքս պատասխաններ, հետո պետք է գնա երկու տեղ էլ հարցաքննվի՝ արդեն իմանալով իրեն ինչ հարցեր են տալու»,- ասաց փաստաբանը:

Ինչպե՞ս է գնահատում գործերից մեկով դատավոր Արթուր Օհանյանի ընտրությունը հարցին ի պատասխան Երվանդ Վարոսյանը նշեց. «Չեմ կարող, ես վաղուց արդեն այս գործի շուրջ տրամաբանություն չեմ պատկերացնում»:

Աղբյուր` Փաստինֆո