Փաստ ինֆո

«Շենգավիթ» ԲԿ-ում ծննդկան Մերի Մարգարյանի և նրա նորածնի մահվան գործով երկար ընդմիջումից հետո այսօր նշանակված դատական նիստում պարզ դարձավ, որ դատարանի կողմից թարգմանության հանձնված օտարալեզու փաստաթղթերը պատշաճ կերպով չի թարգմանվել:

Նախագահող դատավոր Դավիթ Բալայանը ներկաներին հիշեցրեց, որ գործին կցված ռուսերեն լեզվով փաստաթղթերը որոնք չեն հետազոտվել, դատարանի որոշմամբ ուղարկվել էր թարգմանության, միևնույն ժամանակ առաջարկել էր թարգմանությանը ներգրավվել բժիշկ մասնագետների, իսկ նաև անհրաժեշտության դեպքում նաև փաստաթղթերը կազմող անձանց:
Սակայն նախագահողի կարծիքով թարգմանչական կազմակերպությունը անգործության է մատնվել, դատարանին չի տեղեկացրել, որ անհրաժեշտ է փաստաթղթերը կազմող անձանց ներգրավվել և դրանք թարգմանվել են ոչ ամբողջությամբ:

Բացի այդ դատարանը հրապարակեց սեպտեմբերի 14-ին Դատական դեպարտամենտ մուտք եղել նշված թարգմանչական կազմակերպության գրությունը, որտեղ նշվում էր, որ օգոստոսի 3-ին Դատական դեպարտամենտից իրենց բժշկական ոլորտից նյութեր են ուղարկվել ռուսերենից հայերեն թարգմանելու համար, թարգմանության ներկայացված տեքստերում բավական մեծ ծավալ են կազմում բժիշկների կողմից ձեռագրով գրված տեքստերը, որոնք գործնականում անընթեռնելի են: Տրամադրված փաստաթղթերի տպագիր մասերը ինչպես նաև ձեռագիր տեքստերի ընթեռնելի մասը կազմակերպության թարգմանչի կողմից պատշաճ կերպով թարգմանվել է: Նաև տեղեկացրել են, որ անընթեռնելիության պատճառով իրենց տրամադրված փաստաթղթերի բավականին մեծ հատված հնարավոր չի եղել թարգմանել:

Հարցի վերաբերյալ մեղադրողը կարծիք հայտնեց, որ պատշաճ չի կատարվել դատարանի որոշումը և անհրաժեշտ այդ փաստաթղթերը նորից ուղարկել թարգմանության:Պաշ

տպանական կողմն էլ՝ մասնավորապես Շուշանիկ Բախշյանի պաշտպան Ալեքսանդր Սիրունյանը գտնում է, որ դրանք այդպես էլ պետք է թողնել, գործին կցված ապացույցը թերի է՝ ինչը ըստ պաշտպանի՝ մեղադրողի խնդիրն է:

Ամբաստանյալ Անի Բաբելյանի պաշտպան Գեղամ Հակոբյանն էլ հարցի վերաբերյալ դիրքորոշում չարտահայտեց՝ թողնելով դատարանի հայեցողությանը:

Դատարանը որոշեց այդ նյութերը հետ ուղարկել նույն կազմակերպությանը որոշման մեջ նշելով, որ չի կատարվել դատարանի պահանջը, ավելին որոշ փաստաթղթեր որոնք էլ թարգմանվել են դրանց չի կցվել ռուսերեն տեքստը: Այս և այլ հարցերի ինչպես նաև լիարժեք թարգմանություն ապահովելու նպատակով դատարանը փաստաթղթերը հետ կուղարկի:

Դատական նիստն անորոշ ժամանակ հետաձգվեց՝ մինչև կստացվեն պատշաճ թարգմանությունները:

Հիշեցնենք, որ փաստաթղթերի հետազոտման ժամանակ դատարանը չէր հետազոտվել ելակետային տվյալները, որոնց հիման վրա նշանակվել է փորձաքննությունը: Եվ դատարանը որոշել էր հիվանդության պատմությունները թարգմանել տալ:

Հիշեցնենք, ըստ մեղադրանքի՝ Շուշանիկ Բախշյանը աշխատելով «Շենգավիթ բժշկական կենտրոն» ՓԲԸ-ում որպես մանկաբարձ-գինեկոլոգ՝ հանդիսանալով բժշկական օգնություն և սպասարկում իրականացնող անձ, 2015թ. փետրվարի 11-ից հաշվառման է վերցրել և վարել Մերի Վաղինակի Մարգարյանի հղիությունը:

Բժշկական օգնությունը և սպասարկումը կազմակերպելու ժամանակ, պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից, ինչպես նաև ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև` նորածնի մահը:

Գործով մեղադրանք ՝ առաջադրվել նաև Նույն ԲԿ-ի մանկաբարձ-գինեկոլոգ Անի Բաբելյանին, վերջինս 2015թ. հուլիսի 25-ին բժշկական օգնությունը և սպասարկումը կազմակերպելու ժամանակ, պարտավոր լինելով Մերի Մարգարյանին ցուցաբերել անհետաձգելի, առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և այլ հանգամանքների առկայությունից, ինչպես նաև ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև` նորածնի մահը:

Ավելի վաղ տեղեկացրել էինք, որ դատաբժշկական հանձնաժողովը պարզել է, որ Մերի Մարգարյանի և նրա նորածին դստեր կյանքը փրկելու հնարավորությունն ավելի մեծ կլիներ, եթե նրան շուտ ծննդալուծեին՝ կեսարյան հատման միջոցով:

Սակայն Մերի Մարգարյանը 4 օր շարունակ ունեցել է բարձր ջերմություն, «Շենգավիթ» ԲԿ մանկաբարձ-գինեկոլոգ Շուշանիկ Բախշյանը, ով եղել է հղիի բժշկական օգնություն և սպասարկում իրականացնող բժշկուհին, պարտավոր լինելով նրան հոսպիտալացնել, հրաժարվել և չի կատարել իր պարտականությունները. այս պայմաններում հղիին չհոսպիտալացնելը չի հիմնավորվել:

Բժշկի կողմից ցուցաբերված անբարեխիղճ վերաբերմունքի հետևանքով Մերի Մարգարյանը ծննդալուծումից հետո «HELLP» սինդրոմ համախտանիշ երկկողմանի թոքաբորբ» ախտորոշմամբ 2015թ-ի հուլիսի 29-ին մահացել է, կնոջ մահվան հաջորդ օրը թոքերի և գլխուղեղի այտուցից մահացել է նաև նրա նորածին դուստրը:

Իսկ ներկայումս արդեն ամբաստանվող մյուս բժշկուհին՝ Անի Բաբելյանն էլ 2015 թվականի հուլիսի 25-ին առավոտյան եղել է հերթապահ մանկաբարձ-գինեկոլոգը, սակայն նա նույն օրը բարձր ջերմությամբ ԲԿ դիմած Մերի Մարգարյանին չի հոսպիտալացրել, ինչի հետևանքով առաջացած բազմաօրգանային անբավարարությունից Մ.Մարգարյանն օրեր անց՝ հուլիսի 29-ին, մահացել է:

Շուշանիկ Բախշյանին և Անի Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Աղբյուր` Փաստինֆո