Փաստ ինֆո

ՊԲ նախկին հրամանատար Սամվել Բաբայանի և մյուսների գործով դատարանը շարունակում է հետազոտել գործի ապացույցները:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում, նախագահությամբ Արշակ Վարդանյանի, այսօր հետազոտվում են մինչդատական վարույթն իրականացրած մարմնի կողմից օպերատիվ-հետախուզական միջոցառման շրջանակներում կատարված «ներքին դիտում» օպերատիվ հետախուզական գործողության արդյունքները:

Մասնավորապես, գաղտնալսումն իրականացվել էր ամբաստանյալ Սամվել Բաբայանի աշխատասենյակում, երբ նա զրուցելիս է եղել գործով մյուս ամբաստանյալ Սանասար Գաբրիելյանի, ինչպես նաև՝ գործով վկա Սուսաննա Հարությունյանը հետ: Վերջինս Խորհրդարանական ընտրությունների նախորդող ժամանակահատվածում աշխատել էր ՕՐՕ դաշինքի շտաբում:

Ապացույցի հետազոտման ընթացքում Բաբայանը հայտարարեց, որ դրանք գործին չեն առնչվում, և ինքը ուրախ կլիներ, որ առնչվեին: Այդ դեպքում դատարանից տուն կգնար: Սակայն նախագահողը պարզաբանեց, որ հնարավոր չէ գործին առնչվող տվյալ րոպեից միանգամից միացնել, տեխնիկական հարց է և մեկ-երկու րոպե առաջ է միացվում:

Այդ զրույցների ժամանակ գործով վկա Սուսաննա Հարությունյանը Սամվել Բաբայանին ասում էր «Սանոն (Սանասար Գաբրիելյանը) մի քիչ բերանից թուլ է»:

Դատական նիստը շարունակվում է, դատարանը կհետազոտի նաև հեռախոսային խոսակցությունները:

Աղբյուր` Փաստինֆո