Փաստ ինֆո

Հատուկ քննչական ծառայությունում քննվող առանձնապես խոշոր չափերով կաշառք ստանալու գործով կալանավորված ՀՀ ՔԿ Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի ավագ քննիչ Մ. Զադոյանը իրեն առաջադրված մեղադրանքը չի ընդունում: Այդ մասին «Փաստինֆո»-ն տեղեկացավ քննիչ Մ. Զադոյանի պաշտպան Հրանտ Անանյանից:

Պաշտպանը և քննիչ Զոդոյանը գտնում են, որ այս ամենը վրեժխնդրության հետևանք է, ինչը հիմնավորվել է նաև Բաբկեն Գասպարյանի և քննիչի միջև կատարված առերես հարցաքննության ընթացքում:

Պաշտպանի գնահատմամբ՝ ենթադրյալ կաշառք ստանալու առաջարկը քննիչի կողմից ընդունելը հիմնված է գործով շահագրգիռ անձ Բաբկեն Գասպարյանի ցուցմունքի վրա, ով չարացել է քննիչի դեմ, այն պատճառով, որ  վերջինս իբրև արդարացի  չի գտնվել իր որդու ձերբակալման, կալանավորվորման և արարքը չվերաորակելու հարցերում։

Ի դեպ փատաբանի կողմից գումարը քննիչին իբր փոխանցելու վարկածը կառուցվել է նույն Բ.Գասպարյանի և նրա ընտանիքի անդամների ենթադրությունների վրա։

Հիշեցնենք, որ Բաբկեն Գասպարյանն այն անձն է, ով ըստ նախաքննական մարմնի պաշտոնական հաղորագրության համաձայն,  որդու՝ Սոս Գասպարյանին չձերբակալելու և նրան առավել մեղմ քրեական պատասխանատվության ենթարկելու համար իբրև 3000 ԱՄՆ դոլար կաշառք է առաջարկել:

Նշենք նաև, որ Սոս Գասպարյանին որպես մեղադրյալ է քննիչը ներգրավվել ՀՀ քրեական օրենսգրքի  112-րդ հոդվածի հատկանիշներով, սակայն Գասպարյանը գտել է, որ քննիչն արդարացի չի եղել և որ որդուն պետք է մեղադրանք առաջադրեր 116-րդ հոդվածով:

Պաշտպան Անանյանը հայտնեց նաև, որ քննիչը տվյալ պահին արարքը վերաորակելու որևէ հիմք չի ունեցել ուստիև նման պայմաններում ինչպե՞ս կարող էր նա  անձի հետ պայմանավորվածություն ձեռք բերել և կաշառք ստանալու առաջարկ ընդունել:

Ավելին,  պաշտպանի խոսքով՝ առերես հարցաքննության ժամանակ Բաբկեն Գասպարյանը հայտարարել է, որ չի ցանկանում, որ քննիչի մատը փուշ մտնի, սակայն միևնույն ժամանակ հաղորդում է ներկայացրել քննիչի դեմ:

Ըստ Անանյանի, եթե անգամ մի պահ ընդունենք, որ քննիչն այդ գումարը վերցրել է, այդ դեպքում ինչու այդ ընթացքում  պարբերաբար նրա մոտ գնալով Գասպարյանը գումարը հետ չի պահանջել` տեսնելով, որ որդու գործով արարքը չի վերաորակել, ինչպես ինքն է ակնկալել:

Հրանտ Անանյանի գնահատմամբ՝ վտանգավոր վիճակ է ստեղծվում և քննիչները խոցելի են դառնում` թիրախավորվելով իրենց իսկ կողմից քննված գործերով անձանց կողմից:

Ինչ վերաբերում է կալանաքի որոշմանն, ապա պաշտպանն այն կբողոքարկի վերաքննիչ դատարան: 

Հիշեցնենք, որ ՀՔԾ պաշտոնական հաղորդագրության համաձայն՝ քննիչ Մ. Զադոյանը նախնական համաձայնությամբ, փաստաբան Գայան Գալոյանի օժանդակությամբ և միջոցով Բ. Գասպարյանից ստացել է առանձնապես խոշոր չափերով կաշառք:

Գայանե Գալոյանին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով: Մ. Զադոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, Բաբկեն Գասպարյանին մեղադրանք է առաջադրվել ՀՀ քրեական օրենսգրքի 312-րդ հոդվածի 3-րդ մասի 1-ին կետով:

Փաստաբան Գայանե Գալոյանը և քննիչը կալանավորվել են:

Աղբյուր` Փաստինֆո