Փաստ ինֆո

Երևանի Կենտորն և Նորք-Մարաշ վարչական շրջանների ընդհանուր իրավասության դատարանը՝ նախագահությամբ Արշակ Վարդանյանի, նախօրեին անպարտ է ճանաչել և արդարացրել է զենքի կամ որպես զենք օգտագործվող առարկաների գործադրմամբ խուլիգանության մեջ մեղադրվող երկու անձի:

Դատարանը Գևորգ Խաչատրյանին և Սամվել Քրմոյանին ՀՀ քրեական օրենսգրքի 258-րդ հոդվածի 4-րդ մասով առաջադրված մեղադրանքում անպարտ է ճանաչել՝ հանցակազմի բացակայության պատճառաբանությամբ։

Քրեական գործը մեկ անգամ դատական եռաստիճան համակարգով անցել էր, Խաչատրյանը և Քրմոյանը դեռևս 2014 դեկտեմբերի 30-ի դատապարտվել էին 1 տարի 6 ամսի ժամկետով ազատազրկման՝ պատժի կրման սկիզբ հաշվելով 2013 թվականի նոյեմբերի 21-ից: Միևնույն ժամանակ դատարանը նրանց նկատմամբ կիրառել էր ՀՀ Անկախության հռչակման 22-րդ տարեդարձի կապակցությամբ համաներում հայտարարելու մասին որոշման 1-ին կետի 3-րդ ենթակետը՝ ազատելով նշանակված պատժից:

Քրեական գործով անցնող երկու ամբաստանյալներին ովքեր գտնվել էին կալանքի տակ՝ դատական ակտի հրապարակման օրը դատական նիստի դահլիճից ազատ էին արձակվել:

Դատավճռը բողոքարկվել էր վերաքննիչ դատարան դատախազի կողմից՝ պահանջով թույլատրելի ճանաչել առաջին ատյանի դատարանի կողմից անթույլատրելի ճանաչված տուժողներ Հ. Սահակյանի, Լև Բուլատովի, վկաներ Մ.Սահակյանի, Դ.Սարգսյանի ցուցմունքները, լուսանկարով անձանց ճանաչման ներկայացնելու մասին արձանագրությունները, առերես հարցաքննությունների մասին արձանագրությունները և Գ.Խաչատրյանին ու Ս.Քրմոյանին մեղավոր ճանաչել առաջադված մեղադրանքում՝ հոդվածի սանկցիայի շրջանակներում վերջիններիս նկատմամբ նշանակել ազատազրկման ձևով համաչափ պատիժ:

Վերաքննիչ դատարանը դատախազ Ա.Դավթյանի բողոքը մերժել էր:

Այդ ամենից հետո էլ Վճռաբեկ բողոք էր ներկայացվել Գլխավոր դատախազի տեղակալ Հարությունյանի կողմից և Վճռաբեկ բողոքը բավարարվել էր մասնակիորեն՝ գործը բեկանվել էր ուղարկվել Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան` նոր քննության։

Այսպիսով, ըստ մեղադրանքի՝ Գևորգ Խաչատրյանը 2013թ. ընկերոջ` Սամվել Քրմոյանի և ինքնությունը չպարզված երկու անձանց հետ Երևան քաղաքի <Բրիջ> ակումբում, անհիմն վիճաբանել են ակումբի տնօրեն Լև Բուլատովի, մենեջեր` Դավիթ Սարգսյանի և Մարիամ Սահակյանի ու վերջինիս եղբայր Հայկ Սահակյանի հետ, որի ընթացքում կոպիտ կերպով խախտելով հասարակական կարգը՝ աղմկել են և հայհոյել, բռնություն գործադրել` որպես զենք օգտագործվող առարկայով: Սեղանի վրայից վերցրած գարեջրի ապակյա տարրայով Խաչատրյանը և Քրմոյանը հարվածել են Հայկ Սահակյանի գլխի շրջանում ու նրա առողջությանը դիտավորությամբ պատճառել թեթև վնաս:

Այժմ անդրադռանանք նախօրեին դատավոր Արշակ Վարդանյանի կողմից կայացված արդարացման դատավճռին:

Դատարանը փաստել է, որ նախաքննությամբ ձեռք բերված և դատաքննությամբ հետազոտված ապացուցների վերոշարադրյալ զանգվածով չի հիմնավորել այն, որ ամբաստանյալներ Գ.Խաչատրյանը և Ս.Քրմոյանը իրենց գործողություններով կոպիտ կերպով խախտել են հասարակական կարգը և բացահայտ անհարգալից վերաբերմունք են դրսևորել հասարակության նկատմամբ, գործել են խուլիգանական մղումներով և այդ դիտավորությամբ, տնօրեն Լ.Բուլատովի և ամբաստանյալ Գ.Խաչատրյանի միջև ընթացող զրույցի ժամանակ գործով տուժող Հայկ Սահակյանի միջամտության պատճառով նրան մարմնական վնասվածքներ պատճառելը հասարակական կարգի կոպիտ խախտման չի վերաճել, այդ կապակցությամբ պաշտպանական կողմի առաջ քաշած վարկածը նախաքննությամբ ձեռք բերված և դատաքննությամբ հետազոտված հավաստի և բավարար ապացույցներով չի հերքվել, հետևաբար, ՀՀ քրեական դատավարական օրենսգրքի 18-րդ հոդվածի ուժով այդ հանգամանքը պետք է մեկնաբանվի հօգուտ ամբաստանյալների։

Դատական ակտում շարադրված վերաբերելի, թույլատրելի և արժանահավատ ապացույցների բովանդակային վերլուծության արդյունքներով դատարանը նաև արձանագրել է, որ դրանք ինչպես առանձին, այնպես էլ համակցությամբ չեն հաստատում Գ.Խաչատրյանին և Ս.Քրմոյանին վերագրված արարքներում խուլիգանության` քրեական օրենքով նախատեսված հատկանիշների /հանցակազմի/ առկայությունը և որ ապացույցների այդ ամբողջությունը բավարար չէ գործով ամբաստանվող Խաչատրյանին և Քրմոյանին ՀՀ քրեական օրենսգրքի 258-րդ հոդվածով վերագրված արարքներում նրանց անմեղության կանխավարկածը հաղթահարելու, անաչառ դիտորդի մոտ ձևավորելու հիմնավոր կասկածի շեմից վեր ապացուցողական չափանիշին համապատասխան համոզվածություն, որ ամբաստանյալները կատարել են խուլիգանություն:

Դատաքննությամբ հետազոտված վերաբերելի, թույլատրելի և արժանահավատ ապացույցների ամբողջությունը թույլ չի տալիս ապացուցման ենթակա այդ հանգամանքը պարզել անհրաժեշտ խորությամբ և լրիվությամբ, այդ հանգամանքի ապացուցվածությունը ողջամտորեն կասկած է հարուցում։

Այսպիսով, Դատարանը փաստել է, որ բացակայում է ամբաստանյալներին ՀՀ քրեական օրենսգրքի 258-րդ հոդվածով նախատեսված հանցագործությունների կատարման մեջ մեղավոր ճանաչելու համար անհրաժեշտ վերաբերելի, թույլատրելի և արժանահավատ ապացույցների բավարար ամբողջությունը, որպիսի պայմաններում սույն դատական ակտով նրանցից յուրաքանչյուրի մեղավորության փաստումը կհանգեցնի անմեղության կանխավարկածի, ապացույցները գնահատելու վերաբերյալ ՀՀ քրեական դատավարության օրենսգրքի 18-րդ, 25-րդ, 127-րդ, 365-րդ հոդ-վածների պահանջների խախտման։

Դատարանն արձանագել է, որ հետազոտված ապացույցների, այդ թվում նաև ամբաստանյալների ցուցմունքների համադրությամբ հնարավոր չէ հանգել նրանց արարքում խուլիգանության հանցակազմի առկայության վերաբերյալ հետևության, քանի որ դրանցով հիմնավորվում է ակումբում ոչ թե խուլիգանության կատարումը, այլ կարճատև ընթացած ծեծկռտուքը։

Նշենք նաև, որ ամբաստանյալ Գևորգ Խաչատրյանի պաշտպանությունն իրականացրել է Էդուարդ Աղաջանյանը, իսկ Սամվել Քրմոյանինը՝ Մնացական Ղազարյանը:

Պաշտպան Էդուարդ Աղաջանյանից տեղեկացանք, որ մեղադրող դատախազը միջնորդել էր գործով երկու ամբաստանյալներին դատապարտել 4-ական տարի ժամկետով ազատազրկման:

Աղբյուր` Փաստինֆո