Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանին այսօր ստիպողաբար են բերել դատարան:

Նախ նշենք, որ դատական նիստն սկսվեց նշանակվածից 1 ժամ ուշացումով և նախագահողը ներկաներին տեղեկացրեց, որ թեև Իշխան Բարսեղյանին բերել են դատարան, սակայն նրա ինքնազգացողությունը վատացել է և ի վիճակի չէ դատական նիստին մասնակցելու: Այս պայմաններում գործի քննությունը հետաձգվեց և նշանակվեց հոկտեմբերի 9-ին:

Դատական նիստի ավարտից հետո Իշխան Բարսեղյանին պաշտպան Վարդուհի Էլբակյանից «Փաստինֆո»-ի թղթակիցը տեղեկացավ, որ Բարսեղյանի ինքնազգացողությունը սեպտեմբերի 14-ին վատացել է և սեպտեմբերի 15-ին նրան տեղափոխել են «Դատապարտյալների հիվանդանոց», որտեղ դեղորայքային բուժում է ստանում մինչ այսօր, սակայն կատարված հետազոտությունների արդյունքում բժիշկները հանգել են հետևության, որ անհրաժեշտ է կորոնորոգրաֆիա կատարել՝ որոշելու համար՝ սրտի վիրահատության անհրաժեշտության կա՞ այս պահին, թե՝ ոչ:

Բացի այդ, Վարդուհի Էլբակյանն իր պաշտպանյալից տեղեկացել էր, որ այսօր՝ մինչև դատարան տեղափոխելը, զարկերակային ճնշումը 230-130 է եղել: «Դատապարտյալների հիվանդանոցում» ներարկում են կատարել և նրա ճնշումը կտրուկ իջել է, ինչից հետո հողաթափերով և սպորտային հագուստով տեղափոխել են դատարան: Սակայն դատարանում ևս ճնշումը կրկին բարձրացել է, և նա ի վիճակի չի եղել նիստին մասնակցել:

Աղբյուր` Փաստինֆո