Փաստ ինֆո

Քիչ առաջ Երևանի Էրեբունի և Նուբարաշեն վարչական շրջանների ընդհանուր իրավասության դատարանը՝ դատավոր Արտուշ Գաբրիելյանի նախագայհությամբ, հրապարակեց «Սասնա ծռեր 2» գործից մաս անջատելու մասին իր որոշումը:

Ըստ այդմ՝ 11 հոգու մասով գործն առանձնացվել է առանձին վարույթում, և այն կքննվի այլ դատավորի նախագահությամբ, իսկ 7 հոգու մասով գործը կմնա և կքննվի Արտուշ Գաբրիելյանի նախագահությամբ:

Լրագրողների հետ զրույցում պաշտպան Երվան Վարոսյանը նշեց, որ տեղի ունեցավ այն, ինչի մասին երկար ժամանակ մամուլն էլ էր գրում, և լուրեր էին պտտվում, որ, ըստ էության, Արտուշ Գաբրիելյանը հրաժարվելու է գործը քննելուց, սակայն ընտրվել է ոչ թե ինքնաբացարկի, այլ՝ գործից հերթական անգամ մաս անջատելու տարբերակը:

Ըստ փաստաբանի. «Առաջին տպավորությամբ իրենց համար կարևորություն ունեցող ամբաստանյալների մասն անջատվել է և կհանձնվի մեկ այլ դատավորի, իսկ մնացած մասով գործը կմնա Արտուշ Գաբրիելյանի վարույթում»:

Երվանդ Վարոսյանը նշեց նաև, որ այս գործերի տարանջատումը արդարադատության շահերից չի բխում. «Առաջին տարանջատումն արեցին, կարծում եմ, ինչ-որ տեխնիկական նպատակներով, հիմա էլ անում են՝ դատավոր փոխելու նպատակով: Ամեն դեպքում գործի քննության որակը սրանից տուժելու է, որովհետև տարանջատել ամբաստանյալներին տարբեր գործերի վարույթներում արդարադատության շահերից չի բխում և, ըստ էության, հենց այդ բաժանումը խոչընդոտ է հանդիսանալու գործի քննությանը,- ասաց Երվանդ Վարոսյանը՝ հավելելով, որ սա ոչ թե իրավունքից և օրենքից, այլ նպատակահարմարությունից  եկող որոշում է»:

Փաստաբանը նշեց, որ այս որոշմամբ ձգձգվելու է գործի քննությունը, անջատված մասը նոր դատավորի կողմից վարույթ ընդունելու և դատական քննություն նշանակելու որոշումներն արդեն նոր դատավորը պետք է կայացնի:

«Սակայն նույն գործը տարբեր դատավորների մոտ նույն ապացույցների շրջանակում քննելը խոչընդոտելու է արդար դատաքննության իրավունքին»,- ասաց փաստաբանը:

Աղբյուր` Փաստինֆո