Փաստ ինֆո

ՌԴ իրավապահ մարմինները գողական դինաստիաների միանգամից երկու ներկայացուցիչների, այդ թվում՝ հայազգի «օրենքով գողին»,  «դեպի դուռն են ցույց տվել»: Նրանցից մեկը հենց նոր է ազատվել ազատազրկման վայրից, իսկ մյուսը դեռ կրում է պատիժը:

Ըստ crimerussia.com-ի, սեպտեմբերի 21-ին Ռուսաստանի ՆԳՆ քրեական հետախուզության գլխավոր վարչության աշխատակիցները այցելել են Կրասնոյարսկի թիվ 31 ուղղիչ գաղութում գտնվող «օրենքով գող» Ռուսլան Գեգեչկորիին, ով հայտնի է «Ռուսլան Զուգդիդսկի» և «Շլյապա Մլադշի» մականուններով:

Քրեական հետախուզության օպերատիվ աշխատողները պաշտոնապես իրազեկել են 30-ամյա «օրինականին» բանտարկության ժամկետի ավարտից հետո Ռուսաստանի տարածքում նրա գտնվելու անցանկալի լինելու մասին: Ռուսլան Գեգեչկորին դատապարտվել է 2016թ. հուլիսին 2 տարվա ազատազրկման ընդհանուր ռեժիմի գաղութում: Ըստ դատավճռի, նրա բանտարկության ժամկետն ավարտվում է 2018թ. մարտի 28-ին:

Հիշեցնենք, որ 2014թ. «թագադրված» Ռուսլան Գեգեչկորին՝ «օրենքով գող» Ռոլանդ Գեգեչկորիի (Ռոլանդ Շլյապա) որդին, մեծապես հայտնի է դարձել տուվայական գաղութներից մեկում զանգվածային անկարգությունների հետ կապված, որտեղ Գեգեչկորիի և կովկասցի կալանավորների միջև կոնֆլիկտից հետո «օրինականի» հանդեպ լոյալ դատապարտյալների մեծ խումբ ավիրել է բանտային մզկիթը հենց աղոթքի ժամանակ: Այնտեղ գտնվող մահմեդական կալանավորները դաժան ծեծի էին ենթարկվել: Միջադեպը հարուցել էր ամբողջ Ռուսաստանում մահմեդական համայնքի զայրույթը՝ «օրենքով գողի» և նրա հոր հասցեին սպառնալիքներ են հնչել: Պատիժների կատարման դաշնային ծառայության համակարգը նույնպես սկսել է Շլյապա-մլադշիին «կոտրել», նրան տեղափոխել են Կրասնոյարսկի գաղութ: Ճանապարհին նա ծեծի էր ենթարկվել հսկիչների և կովկասյան ազգության դատապարտյալների կողմից, ում հատուկ նստեցրել են խցերը: Կրասնոյարսկի բանտի հիվանդանոցում «օրենքով գողեր» Կոնստանտին Բորիսովի (Կոստիլ) և Սուլխան Մժավիայի (Սուլխան) հետ կռվից հետո նրանք գրություն էին գրել Գեգեչկորիին «գողական» տիտղոսից զրկելու մասին, սակայն «օրենքով գողերի» մեծամասնությունը նրանց չի պաշտպանել:

«Գողական» դինաստիայի երկրորդ ներկայացուցիչն, ով ստիպված կլինի լքել Ռուսաստանը մոտ ապագայում, 34-ամյա «օրենքով գող» Գեորգի Քալաշյանն է, ով քրեական աշխարհում առավել հայտնի է որպես Գեորգի Թբիլիսսկի կամ Կոտիկ Մլադշի:

«Օրենքով գող» Կոնստանտին Քալաշյանի որդին սեպտեմբերի 22-ին ազատվել է Ելեց քաղաքի բանտից, որտեղ նույնպես պատիժ էր կրում թմրանյութերի համար, և ուղղիչ հաստատությունից դուրս գալուց հետո անմիջապես ձերբակալվել էր միգրացիոն ռեժիմի խախտման համար: Ելեցկի քաղաքային դատարանը Քալաշյանի նկատմամբ նշանակել է 2 հազար ռուբլու տուգանք և 10 օր ժամանակ տվել, որպեսզի նա ինքնակամ լքի ՌԴ տարածքը:

Ռուսական լրատվամիջոցը գտնում է, որ երկրի սահմաններից Գեգեչկորիի և Քալաշյանի արտաքսումը տրամաբանորեն համապատասխանում է վերջին տարիների տենդենցին: Միայն մեկ՝ 2016թ.-ի, ընթացքում ռուսաստանյան իրավապահ մարմինները երկրից արտաքսել են 10 «օրենքով գողերի», իսկ 11 այլ «օրինականների» մատնացույց են արել Ռուսաստանի տարածքում նրանց գտնվելու անցանկալի լինելը:

Աղբյուր` Փաստինֆո