Փաստ ինֆո

Դատարանը վերահաստատել է Վերնիսաժի մոտ սպանության գործով մեղադրյալ Ռաֆիկ Խաչատրյանի նկատմամբ ընտրված կալանավորումը: Ինչպես «Փաստինֆո»-ի լրագրողի հետ զրույցում հայտնեց նրա պաշտպան, հանրային պաշտպան Մարինե Ֆարմանյանը, ինքը համաձայն չէ իր պաշտպանյալին կալանավորելու որոշման հետ և անպայման այն բողոքարկելու է Վերաքննիչ դատարան:

Մ.Ֆարմանյանը նշեց, որ իր պաշտպանյալը մասնակի է ընդունում իր մեղադրանքը: Մասնավորապես, ընդունում է, որ դեպքի վայրում է գտնվել, Արմեն Կարադավիդովի ու Ալբերտ Բլբուլյանի հետ դարանակալել են, սակայն սպանելու մտադրություն չի ունեցել և մինչև վերջ էլ չի մտածել, որ նրանք կրակելու են:

Պաշտպանը նշեց, որ Ռաֆիկ Խաչատրյանի մոտ իրական զենք չի եղել, ուստի նա գտնում է, որ ՀՀ քրեական օրենսգրքի 235-րդ հոդվածի մասով՝ ապօրինի կերպով զենք ձեռք բերելը, կրելը, պահելը, մեղադրանքը պետք է փոփոխվի, քրեական հետապնդումը դադարեցվի:

Պաշտպանը բավականաչափ ասելիք ունի նաև մեղադրանքի մնացյալ՝ ՀՀ քրեական օրենսգրքի 104-րդ հոդվածի 2-րդ մասի 6-րդ և 7-րդ կետով՝ մի խումբ անձանց կամ կազմակերպված խմբի կողմից շատերի կյանքի համար վտանգավոր եղանակով սպանություն, 34-104-րդ հոդվածի 2-րդ մասի 1-ին կետով՝ երկու կամ ավելի անձանց սպանության փորձ, մասով, արդեն իսկ կալանավորման որոշումը վերահաստատելու մասին դատական նիստում ինքն իր առարկությունները ներկայացրել է:

Ռաֆիկ Խաչատրյանը պատահաբար է ծանոթացել Արմենի ու Ալբերտի հետ, նրանք օգտվել են իր՝ տաքսիստի, ծառայություններից, իրեն հավելավճար թողել, երբեք կասկածելի բան չի տեսել:

Արմենն ու Ալբերտն իրեն ներշնչել են, որ Վահագն Աբգարյանը Ալավերդիում չարիք է, անընդհատ սպանություններ են տեղի ունենում, անհրաժեշտ է կանխել վենդետայի շարունակությունը:

Փաստաբանը միաժամանակ նշեց, որ երբ Ռաֆիկ Խաչատրյանը մեքենայից դուրս է եկել, արդեն հանցագործությունն ավարտված է եղել, արդեն խառնաշփոթ է եղել դեպքի վայրում, արդեն Արմենն ու Ալբերտն արդեն զենքը նետել էին ու փախչում էին: «Իմ գնահատմամբ, գործ ունենք իմանալ, չհայտնելու հետ»,- ասաց Մարինե Ֆարմանյանը՝ հավելելով, որ իր պաշտպանյալը ոչ միայն համակատարող չէ, այլև օժանդակող չէ:

Պաշտպանը գտնում է, որ Քննչական կոմիտեն լուրջ աշխատանք ունի կատարելու, արդեն իսկ այսօրվա դատական նիստին փաստաբանն ակնկալում էր, որ քննիչը կներկայանա փոփոխված մեղադրանքով: «Ակնկալում եմ շուտով մեղադրանքի փոփոխություն»,- ասաց Մ.Ֆարմանյանը:

Աղբյուր` Փաստինֆո