Փաստ ինֆո

Մարաշի զինված խմբի գործով այսօրվա դատական նիստում դատարանն ավարտեց անջատված գործերով մեղադրյալի կարգավիճակով վկաների հարցաքննությունը: Մասնավորապես, դատարան էին ներկայացել ապօրինի զենք իրացնելու գործով արդեն իրենց պատիժը կրած Հարություն Հովհաննիսյանն ու Ստեփան Չիլինգարյանը: Նրանք երկուսն էլ հրաժարվեցին ցուցմունքներ տալ ու դատավարության մասակիցների հարցերին պատասխանել:

Նախաքննական մի քանի ցուցմունքներում ևս Հարություն Հովհաննիսյանը հրաժարվել է ցուցմունքներ տալ: Նա հայտարարել է, որ իրեն վերագրվող մեղադրանքի հետ որևէ առնչություն չունի, ինչպես նաև հայտարարել է, որ չի ճանաչում Արթուր Վարդանյանին (վերջինս Մարաշի զինված խմբի գործով մեղադրական եզրակացության համաձայն, ստեղծել ու ղեկավարել է հանցավոր համագործակցությունը), որևէ առնչություն չի ունեցել Արթուր Վարդանյանի և որևէ հանցավոր խմբի հետ:

Հետագայում Հ.Հովհաննիսյանն որպես մեղադրյալ ցուցմունք է տվել և հայտնել, որ հանգուցյալ հորից զենք-ռազմամթերք է մնացել, տաքսու վարորդ Անուշավան Ավետիսյանն իրեն ասել է, որ զենք է պետք և առաջարկել է այն գնել: Ընդհանուր առմամբ, զենքի դիմաց նրանից ստացել է 900 դոլար: Վաճառքի հանված ատրճանակը Անուշավանը հետ է վերադարձրել՝ այն սարքին չի եղել, փոխարենը ինքնաձիգ է վաճառել նրան: Մեղադրյալը նախաքննական ցուցմունքում ասել է, որ Ստեփան Չիլինգարյանը չի իմացել, որ ինքը զենք է վաճառում, «մենք իրար հետ զենք չենք վաճառել», ասել է նա:

Ստեփան Չիլինգարյանը նախաքննության ժամանակ հայտնել է, որ Անուշավան Ավետիսյանն իրեն հարցրել է զենք չի՞ մնացել, իրեն գումար էր անհրաժեշտ, ուստի վաճառել է պապիկից մնացած մեկ ինքնաձիգն ու մեկ նռնականետը՝ երկուսը 2400 դոլարով: Վաճառել է նաև երկու ինքնաձիգ՝ 2300 դոլարով, քանի որ ըստ գնորդի, լավ վիճակում չեն եղել:

Դատարանում հարցաքննվեց նաև վկա Իլյիչ Թադևոսյանը, ում հոր հետ հեռախոսազրույցում Արթուր Վարդանյանը ասել է՝ գնալու ենք Քեսաբ: Վկան նախ հայտնեց, որ հոր ձեռքից վերցրել է հեռախոսը ու Արթուր Վարդանյանին ասել՝ հորս հետ գործ չունեք, ի պատասխան Արթուր Վարդանյանը հայտարարել է՝ լակոտ, ես քո հորը չեմ անհանգստացնում:

Քիչ անց վկան փոխեց ցուցմունքը և ասաց, որ հետ է զանգահարել Արթուր Վարդանյանին ու ասել՝ հորս հետ գործ չունեք, ի պատասխան Արթուր Վարդանյանն, ըստ վկայի, ասել է՝ լակոտ, ես բանուգործ չունե՞մ, որ քո հետ խոսեմ, հազար հատ գործ ունեմ:

Արթուր Վարդանյանը պնդեց, որ ինքը վկայի հոր հետ Քեսաբի մասին չի խոսել, հայտարարեց, որ վկան կեղծ, սուտ ցուցմունք է տալիս և հարցրեց՝ նման ցուցմունք տալու դիմաց իրեն ինչ են առաջարկել:

Այսօրվա դատական նիստում դատարանը դրական լուծում տվեց թոռների հետ ամբաստանյալների տեսակցությունների խնդրին՝ թոռները մինչ այժմ ընդգրկված չէին տեսակցելու իրավունք ունեցող հարազատների շարքում, տեսակցելու իրավունք ունեին միայն ծնողները, կանայք ու զավակները: Դատարանը գրություն կուղարկի քրեակատարողական հիմնարկներ և համապատասխան փաստաթղթերի առկայության պարագայում թոռները կկարողանան տեսակցել անազատության մեջ գտնվող պապերին:

Լուսանկարը՝ ֆոտոլուրի

Աղբյուր` Փաստինֆո