Փաստ ինֆո

«Ղ-Տելեկոմ» ՓԲԸ-ում առանձնապես խոշոր չափերի՝ 755 մլն դրամի, յուրացման գործով ամբաստանյալ Աշոտ Կույումջյանին առաջադրված մեղադրանքն անհիմն է, շինծու ու կասկածելի: Հրապարակելով իր պաշտպանական ճառը՝ այս մասին այսօր հայտարարեց առանձնապես խոշոր չափերի յուրացման մեջ մեղադրվող, «Ղ-Տելեկոմ» ՓԲ Սյունիքի մարզում՝ Կապանում, պատասխանատու Աշոտ Կույումջյանի պաշտպան Կարեն Մեժլումյանը: Նա հավելեց, որ մեղադրանքը չի կարող հիմնվել ենթադրությունների վրա, այլ պետք է հիմնված լինի ապացույցների բավարար ամբողջության վրա:

Պաշտպանը հայտարարեց, որ իրենց պաշտպանյալի նկատմամբ խախտվել են հրապարակային, ինչպես նաև մրցակցային դատաքննության ու պաշտպանության իրավունքները: Նշենք, որ դատաքննությունը դատարանի որոշմամբ անց է կացվել դռնփակ:

Ըստ պաշտպանի, դատարանի կողմից մերժվել են պաշտպանական կողմի մի շարք միջնորդություններ, այդ թվում՝ գործով տուժող ճանաչված ընկերության՝ «ՎիվաՍել-ՄՏՍ»-ի, գլխավոր տնօրեն Ռալֆ Յիրիկյանին դատարանում որպես վկա հարցաքննելու պաշտպանական կողմի միջնորդությունը: Վերջինս Աշոտ Կույումջյանի դեմ հաղորդում տված անձն է, ուստի դատարան չհրավիրվելու պայմաններում ամբաստանյալը զրկվել է իր դեմ ցուցմունք տված անձին հարցեր ուղղելու, այն է՝ հակընդդեմ հարցման իրավունքից:

Կարեն Մեժլումյանը նշեց, որ հակառակ Քրեական դատավարության օրենսգրքի հստակ, իմպերատիվ պահանջի առ այն, որ մեղադրական եզրակացության եզրափակիչ մասում պետք է նկարագրված լինի մեղսագրվող արարքը, և նշվի Քրեական օրենսգրքի այն հոդվածը, նորմը, որով անձը մեղադրվում է, տվյալ մեղադրական եզրակացության եզրափակիչ մասում դա առկա չէ: «Եթե դա չկա, ուրեմն պարզապես չկա մեղադրական եզրակացությունը, իսկ առանց մեղադրական եզրակացության գործը չէր կարող քննվել»,- ասաց Կարեն Մեժլումյանը:

Աշոտ Կույումջյանի մյուս պաշտպանը՝ Ինեսսա Պետրոսյանն, իր հերթին հայտարարեց, որ ի սկզբանե իրենց պաշտպանյալի նկատմամբ կոպիտ խախտում է թույլ տրվել՝ քրեական գործ հարուցված չլինելու պայմաններում նա բերման է ենթարկվել ու ապօրինի պահվել անազատության մեջ:

Ի.Պետրոսյանը կասկածի տակ դրեց յուրացման փաստն ինքնին, նկատելով՝ ինչպես կարող էր 700 հազար քարտ աննկատ օգտագործվել:

Պաշտպանները միջնորդեցին արդարացնել իրենց պաշտպանյալին:

Իսկ ամբաստանյալն իր վերջին խոսքում նորից հայտարարեց, որ հանցագործություն չի կատարել և հույս հայտնեց, որ դատարանը կկայացնի արդարացման դատական ակտ:

Դատարանը հեռացավ խորհրդակցական սենյակ դատական ակտ կայացնելու, որը կհրապարակվի սեպտեմբերի 22-ին:

«Փաստինֆո»-ի լրագրողի հետ զրույցում փաստաբան Կարեն Մեժլումյանը հիշատակեց ևս մի խախտման մասին՝ մեղադրական ճառի թե էլեկտրոնային տարբերակում, և թե ձայնագրառման մեջ մեղադրողը խոսում է յուրացման մասին, սակայն երկու ամբաստանյալի մասով էլ միջնորդում է՝ Աշոտ Կույումջյանին մեղավոր ճանաչել առանձնապես խոշոր չափերի խարդախության, իսկ Սարգիս Արշակյանին՝ առանձնապես խոշոր չափերի խարդախությանն օժանդակելու մեջ և դատապարտել նրանց համապատասխանաբար՝ յոթուկես ու հինգ տարվա ազատազրկման:

Նշենք, որ ըստ մեղադրական եզրակացության, Աշոտ Կույումջյանը՝ ընկերության դիլեր հանդիսացող «Գառնիկ և Նելի» ՍՊԸ տնօրեն Սարգիս Արշակյանի օժանդակությամբ 2010-14թթ. ընթացքում յուրացրել է իրեն վստահված առանձնապես խոշոր չափերի` 755.006.000 ՀՀ դրամ ընդհանուր արժողությամբ քարտերը, որից 500 մլն-ը՝ մեկ տարում՝ 2013-2014թթ.:

Աղբյուր` Փաստինֆո