Փաստ ինֆո

Վերաքննիչ քրեական դատարանի նախագահ Վազգեն Ռշտունու մասին խոսելիս անվայելուչ արտահայտություններ անելու, ինչ նաև Ռշտունու հրահանգով՝ նրա կողմից անցանկալի դատավորների գործերի բեկանման մասին լրատվամիջոցներում տեղ գտած տեղեկություններին անդրադառնալով փաստաբան Երեմ Սարգսյանն իր ֆեյսբուքյան էջում գրառում է կատարել նշելով, որ երբ Վազգեն Ռշտունին նշանակվեց ՀՀ վերաքննիչ քրեական դատարանի նախագահ, իրավիճակը կտրուկ փոփոխվեց, այժմ օրենքի հիման վրա և օբյեկտիվորեն կայացված արդարացման դատական ակտերը վերաքննիչ դատարանում մնում են ուժի մեջ:

Փաստաբան Երեմ Սարգսյանի գրառումը ներկայացնում ենք ամբողջությամբ.
Իհարկե պետք է դժգոհեն: Ոչ մեկի համար գաղտնիք չէ, որ նախկինում երեք դատական ատյանն էլ ղեկավարվում էր մեկ կետից և հնարավոր էր ցանկացած գործի վերջնական ելք ի սկզբանե որոշել և նույնիսկ խոստանալ և վստահ լինել, որ ինչպես վերաքննիչ, այնպես էլ վճռաբեկ դատարաններում որոշումը հասկանալի պատճառներով անփոփոխ է մնալու:

Մարդու իրավունքների նախկին պաշտպան Կարեն Անդրեասյանն իր աղմկահարույց տարեկան զեկույցում մանրամասնորեն անդրադարձել էր այդ խնդրին` նշելով, որ դատավորներին տրվող կաշառքների չափերը տարբեր են` կախված այն հանգամանքից, թե գումարը միայն առաջին դատարանի որոշման համար է տրվում, թե` նաև վերաքննիչ և վճռաբեկ ատյաններում այն չփոփոխվելու համար:

Այն պահից սկսած, երբ Վազգեն Ռշտունին նշանակվեց ՀՀ վերաքննիչ քրեական դատարանի նախագահ, իրավիճակը կտրուկ փոփոխվեց և այլևս վերաքննիչ դատարանը դուրս եկավ այդ միասնական օղակից և քանի որ այդ նույն պատճառով վերաքննիչ դատարանի հետ այլևս հնարավոր չէ նախապես պայմանավորվածություն ձեռք բերել գործերի վերջնական ելքերի վերաբերյալ, ուստի վերջինս արդեն անկանխատեսելի դարձավ, ինչից, բնականաբար, շատ դժգոհողներ պետք է լինեին ու կան:

Պատահական չէ, որ վերաքննիչ դատարանում տեղի ունեցած այդ փոփոխություններից չեն դժգոհում համեմատաբար վերջերս նշանակված այն դատավորները, ովքեր չեն առնչվել նախկին բարքերի հետ: Ընդ որում, եթե նախկինում առանց վերադաս ատյանների գիտության առաջին ատյանի որևէ դատարանում արդարացման դատավճիռ էր կայացվում, ապա առկա բարքերի պատճառով վերադաս ատյանների մոտ կասկած էր առաջանում, որ այդ դատավճիռը կաշառքի դիմաց է կայացվել, ուստի դատախազի բողոքի հիման վրա այն հիմնականում բեկանվում էր, քանի որ կարծում էին, թե անմասն են մնացել այդ կաշառքից, իսկ այժմ օրենքի հիման վրա և օբյեկտիվորեն կայացված արդարացման դատական ակտերը վերաքննիչ դատարանում մնում են ուժի մեջ:

Աղբյուր` Փաստինֆո