Փաստ ինֆո

Երեք ամերիկյան կոնգրեսմեն կոչ է արել Կապի հարցերով դաշնային կոմիտեի ղեկավար Աջիտ Փային հետաքննել նախագահական ընտրություններին ռադիո Sputnik-ի հնարավոր «միջամտությունը»:

«Մենք գրում ենք ի պատասխան մամուլի տագնապալի հաղորդումների այն մասին, որ Ռուսաստանի կառավարության կողմից ֆինանսավորվող ռադիոցանցը կարող էր օգտագործել ԱՄՆ եթերային ալիքները՝ 2016թ. նախագահական ընտրությունների վրա ազդելու համար»,- հաղորդվում է Աննա Էշուի, Մայքլ Դոյլի և Ֆրենկ Փալլոնի ստորագրությամբ նամակում: Այս մասին հայտնում է ՌԻԱ Նովոստին՝ նշելով, որ նամակը գտնվում է իրենց տրամադրության տակ:

Կոնգրեսմենները հղում են New York Times-ի՝ «RT, Sputnik և պատերազմի Ռուսաստանի նոր թեորիան» հոդվածին, որում ենթադրվում է, որ ռադիոկայանը կարող էր ազդել ընտրությունների ընթացքի վրա: Նամակում նշվում է, որ ռադիոն կարող է ապատեղեկատվություն տարածելու համար օգտագործել հաճախականությունը, «ազդելու համար ԱՄՆ քաղաքականության վրա և տապալելու ընտրությունները», սակայն ոչ մի ապացույց չի ներկայացվում:

«Եթե Sputnik-ն իսկապես օգտագործվում է Ռուսաստանի կառավարության կողմից՝ որպես գործիք ԱՄՆ-ի և մեր ազատ ու ազնիվ ընտրական գործընթացի վրա բացասաբար ազդելու համար, ռադիոկայանները, որոնցով հեռարձակվում է Sputnik-ը, ուղղակիորեն խախտում են Կապի միջոցների մասին օրենքի հանրային շահերի չափանիշը», - հայտարարում են կոնգրեսմենները:

Sputnik-ի և RT հեռուստաալիքի գլխավոր խմբագիր Մարգարիտա Սիմոնյանը տարակուսանք է հայտնել ռադիոյի հասցեին հնչած մեղադրանքների առնչությամբ, ռադիոն իր աշխատանքը սկսել է արդեն ընտրություններից հետո:

«Մեղադրել ռադիոյին, որը սկսել է հեռարձակվել երկու ամիս առաջ, անցյալ տարվա ընտրություններին միջամտելու մեջ, դա ամերիկյան իսթեբլիշմենթի կողմից վերցրած նոր ինտելեկտուալ բարձրությունն է»,- ասել է նա գործակալությանը:

Աղբյուր` Փաստինֆո