Փաստ ինֆո

Արցախի Հանրապետության նախագահ Բակո Սահակյանը, ով նույնպես ներկա է Հայաստան-Սփյուռք համահայկական 6-րդ համաժողովին, համոզված է, որ այն հաջողությամբ իրականացնելու է իր աշխատանքները եւ արժանի ներդրում է ունենալու համազգային խնդիրների լուծման գործում:

«Բարձր մակարդակով կազմակերպված այս համաժողովը կարեւոր է եւ պահանջված եւ՛ մայր Հայաստանի, եւ՛ Արցախի, եւ՛ Սփյուռքի համար: Ակնհայտ է, որ Հայաստան-Սփյուռք- Արցախ եռամիասնությունը հայոց անկախ պետականության գոյության, նրա բնականոն զարգացման եւ հզորացման, Սփյուռքում ազգային ինքնության պահպանման եւ դրա կենսունակության ապահովման կարեւորագույն գրավականն է: Խնդիրները, որոնք ընդգրկված են համաժողովի օրակարգում, ունեն կարեւոր ռազմավարական նշանակություն մեր պետականության շարունակականության, զարգացման հեռանկարների նախանշման տեսանկյունից»,-«Արմենպրես»-ի հաղորդմամբ՝ իր ելույթում ասաց Բակո Սահակյանը:

Նա ընդգծեց, որ կան համատեղ աշխատանքների շնորհիվ արձանագրված նշանակալի շատ հաղթանակներ եւ ձեռքբերումներ, որոնց շարքում նախագահն առանձնացրեց Հայոց ցեղասպանության եւ Արցախի Հանրապետության միջազգային ճանաչումը, Հայաստան համահայկական հիմնադրամի կողմից եւ մի շարք այլ խողովակներով իրականացված ծրագրերը:

«Կարեւոր է նաեւ, որ համաժողովի աշխատանքներին մասնակցում են հայտնի պետական հասարակական գործիչներ, զինվորականներ, բարերարներ, վերլուծաբաններ, գիտնականներ, տարբեր ոլորտի ներկայացուցիչներ աշխարհի շատ երկրներից: Նման ներկայացուցչական բազմազգ կազմը հանդիսանում է տարբեր երկրների եւ ժողովուրդների հետ երկխոսության հաստատման եւ ամրապնդման, բարեկամանական կապերի զարգացման հարթակ: Հայ ժողովուրդն ունի շատ բարեկամներ աշխարհով մեկ, եւ մենք բարձր ենք գնահատում այդ անկեղծ եւ անշահախնդիր ընկերությունը՝ այն համարելով մեծ եւ մնայուն հարստություն»,-ասաց Արցախի Հանրապետության նախագահը:

Լուսանկարը՝ Ֆոտոլուրի

Աղբյուր` Փաստինֆո