Փաստ ինֆո

Լինել ուժեղ ու աստիճանաբար ի մի բերել զարգացման այն կարևոր մոդելը, որը որ կա «Ազգ-բանակի» մեջ: «Արմենպրես»-ի հաղորդմամբ՝ «Հայաստան-Սփյուռք» 6-րդ համաժողովի շրջանակում լրագրողների հետ զրույցում Սփյուռքի ներկայացուցիչներին նման ուղերձ հղեց ՀՀ պաշտպանության փոխնախարար Արտակ Զաքարյանը՝ վստահեցնելով, որ դա երկրի զարգացման, անվտանգության ապահովման, հայապահպանության եւ առաջընթացի կաևորագույն բանաձևերից մեկը կարող է լինել:

«Համաժողովում կա առանձին ուղղություն՝ «ՀՀ պաշտպանության քաղաքականության առանձնահատկությունները ժամանակակից մարտահրավերների պայմաններում», որի ժամանակ, կարծում եմ, մեր հայրենակիցների կողմից պատշաճ ուշադրություն է դարձվելու բոլոր այն խնդիրներին, որոնք քննարկվելու են»,-ասաց նա:

Մեկնաբանելով «Ելք» խմբակցության ղեկավար Նիկոլ Փաշինյանի այն հայտարարությանը, թե ապրիլյան պատերազմի օրերին Սփյուռքի աջակցությունը կազմել է 5 տոկոս՝ Արտակ Զաքարյանը նշեց, որ համաձայն չէ նման դիտարկմանը:

«Ես նման բան չէի ասի, ես չգիտեմ պարոն Փաշինյանն ինչ նկատի ուներ, բայց, այնուամենայնիվ, Սփյուռքի մասնակցությունը և բարոյական աջակցությունը շատ զգալի էր ու շատ կարևոր: Այնպես չէ, որ երբ նեղն ենք ընկնում, նոր հիշում ենք Սփյուռքին: Մենք միշտ ենք հիշում ու կարևորում այն, որովհետև Սփյուռքը մեր ինքնության մի մասնիկն է, մի շատ կարևոր հատված և Հայաստանն էլ ամենամեծ հենարանն է հայապահպանության գործում մեր սփյուռքահայ հայրենակիցների համար»,-նշեց նա:

Լուսանկարը՝ Armenpress-ի

Աղբյուր` Փաստինֆո