Փաստ ինֆո

Ռուսաստանյան մամուլն անդրադարձել է մոսկվաբնակ հայ գործարար Խորեն Ղազարյանի կնոջ ու երեխայի սպանության գործի զարգացումներին:

Երկուսուկես տարի առաջ մայրաքաղաքի կենտրոնում գտնվող փենտհաուսում դաժանորեն սպանվել էին Վիկտորիա Կալագուլյանն ու նրա 9-ամյա դուստր Նինեն: Կասկածի տակ էր հայտնվել զոհի քաղաքացիական ամուսին Խորեն Ղազարյանը: Նա մոտ մեկ տարի անց էր կացրել քննչական մեկուսարանում, սակայն քննիչներին այդպես էլ չէր հաջողվել ապացուցվել նրա մեղքը:

Ռուսաստանի քննչական կոմիտեի Մոսկվայի գլխավոր քննչական վարչությունն օրերս կարճել է Խորեն Ղազարյանի դեմ գործի վարույթը:

Սակայն պատմությունն այսպիսով չի ավարտվել. ազգականների միջև ընտանեկան դրաման չի հանդարտվում: Կարլ Կարագուլյանը՝ սպանված կնոջ հայրը, մեղադրում է ազատություն դուրս եկած նախկին փեսային երրորդ անձանց միջոցով գույքն, այդ թվում՝ Կրեմլի տեսարանով եռահարկ բնակարանը, որտեղ տեղի է ունեցել արյունոտ դրաման, զավթելու մեջ:

Քննչական կոմիտեի Մոսկվայի գլխավոր քննչական վարչությունը կարճել է Խորեն Ղազարյանի վերաբերյալ քրեական գործը՝ նրա մեղքը ապացուցված չլինելու հիմքով:

Դաժան սպանությունը Մոսկվայի Շաբոլովկա փողոցի թիվ 23 եռահարկ փենտհաուսում տեղի էր ունեցել 2015թ. փետրվարի լույս 14-ի գիշերը, 51-ամյա Խորեն Ղազարյանը այդ օրը տուն էր վերադարձել միայն առավոտյան, սակայն չէր կարողացել տուն մտնել, դուռը ներսից կողպված էր, իսկ կինը չէր արձագանքում ամուսնու զանգերին:

Կարծելով, որ կինը դուռը չի բացում ժամանակին տուն գալու փոխարեն թղթախաղի գնալու պատճառով, Ղազարյանը մնացել է քնելու մեքենայում:

Առավոտյան բնակարանում հայտնաբերվել էին տանտիրուհու ու դստեր դիակները՝ դանակի՝ համապատասխանաբար 22 և 18 վնասվածքներով: Քանի որ ոստիկանություն ինքը՝ Ղազարյանն, էր կանչել, կասկածի տակ հենց նա էլ հայտնվել էր, նա կալանավորվել էր:

Քննչական մեկուսարանում տասն ամիս մնալուց հետո կասկածյալի խափանման միջոցը փոխարինվել էր տնային կալանքի:

Հարազատները վրդովված են ռուսական ԶԼՄ-ների մեկնաբանություններից և պնդում, որ հայազգի գործարարը սառնասիրտ մարդասպան չէ

Դատախազությունը նախաքննության ընթացքում մի քանի անգամ անցել էր Ղազարյանի կողմը: Պատճառները բավարար էին՝ նրա հագուստի վրա արյան հետքեր չէին հայտնաբերվել, հանցագործության գործիք մկրատի, որով հարվածներ էին հասցվել աղջնակին, փորձաքննությունը համոզիչ չէր եղել, արյան հետքը չէր համապատասխանում Ղազարյանի կոշիկի չափին: 2016թ. օգոստոսին տղամարդուն ստորագրությամբ ազատ էին արձակել, իսկ հետագայում ընդհանրապես հանել մեղադրանքները:

Նախաքննության ընթացքում դադարել էին Ղազարյանի ու նրա քաղաքացիական կնոջ ընտանիքների միջև հարաբերությունները: Բացի այդ ԴՆԹ փորձաքննությունը հաստատել էր, որ Ղազարյանն աղջկա կենսաբանական հայրը չէ, ում հայրությունը նա ճանաչել էր:

Նախկին աները համոզմունք էր հայտնել, որ փեսան ինչ-որ բան գիտի դստեր ու թոռան սպանության մասին: Ըստ նրա, սպանության շարժառիթ կարող էին դառնալ թղթախաղերն ու բիզնեսը:

2017թ. սկզբին Կարլ Կարագուլյանն իմացել է, որ Դաղստանի դատարանի որոշմամբ իր ամբողջ անշարժ գույքի վրա կալանք է դրված:

Հայցով դատարան էր դիմել նախկինում Կարագուլյաններին անհայտ, թմրանյութերի համար դատապարտված Թիմուր Ամիրալիևը: Նա պահանջում էր բռնագանձել 2 մլն 352 հազար դոլար: Ըստ նրա, 2008թ. օգոստոսի 26-ին, երբ ինքը 25 տարեկան էր, Կարլը և Լյուդմիլան իրենից 1 մլն 200 հազար դոլար են պարտք վերցրել, որը նրանք այդպես էլ չեն տվել: Վազանցիկ տոկոսներով հայցվորը պահանջում էր իբրև թե պարտք տված գումարի համարյա կրկնապատիկը:
Կարլ և Լյուդմիլա Կարագուլյանները պնդում են, որ հայցվորին երբեք չեն տեսել, նրանից պարտքով գումար երբեք չեն վերցրել: Դաղստան դատի գնալ մարդիկ վախենում են՝ վստահ են այնտեղից ողջ չեն վերադառնա: Փոստով սկսել են Դաղստան միջնորդություններ ուղարկել: Սկզբից դատարանը նշանակել էր ձեռագրաբանական փորձաքննություն, խնդրել ստորագրությունների օրինակները, իսկ փետրվարի 22-ի դատական նիստի օրը իրավաբաններից մեկը, փաստաբան Խոջա Գերիկանով, ժամանելով Մոսկվա, առանց վստահորդների՝ Կարագուլյան ամուսինների, կամքի, վերավստահել է գործը վարելու իրավունքը դաղստանցի գործընկերոջը՝ Նաիդա Ալիբուտաևային: Նրան նույնպես Կարլ և Լյուդմիլա Կարագուլյանները երբեք չեն տեսել:

Նույն օրը Ալիբուտաևան ստորագրել է հաշտարար համաձայնագիր, ըստ որի ամուսիններն իբրև թե ճանաչել են փոխառության կեղծ պայմանագիրը, իսկ պարտքի դիմաց տվել են իրենց ողջ ունեցվածքը: Կարևոր է նշել, որ ամբողջի կադաստրային արժեքը կազմում է 100 մլն ռուբլուց ավելի, ինչը հնարավոր չէ համադրել 1,2 մլն ԱՄՆ դոլարի պարտքի հետ: Ըստ ռուսական լրատվամիջոցի, այդ մասին հայտարարել է փաստաբան Ֆյոդոր Տրուսովը, ով ներկայումս ներկայացնում է Կարլ Կարագուլյանի շահերը:

Ֆ.Տրուսովն ու փաստաբանների բյուրոյից նրա գործընկեր Անդրեյ Սոկոլովը տեղի ունեցածը համարում են ռեյդերական զավթման դասական օրինակ: Նրանք առայժմ չգիտեն, թե դրան մասնակի՞ց է Խորեն Ղազարյանը, թե՞ ոչ, սակայն վստահ են, որ ամեն ինչ կպարզեն:

Հասկանալի է, որ փոխառության պայմանագիրը ֆիկտիվ է, ինչը նշանակում է որ իրավաբանական ուժ չունի, գործում կան շատ անհամապատասխանություններ, իսկ գլխավորն այն է, որ ոչ Կարլ, ոչ էլ Լյուդմիլա Կարագուլյանները չեն ստորագրել փոխառության պայմանագիրը:
Այժմ Կարագուլյանը փորձում է հասնել դաղստանյան դատարանի որոշման վերացմանը: Հաշտարար համաձայնագրի հաստատման մասին որոշման դեմ բողոքը կքննի Դաղստանի գերագույն դատարանը, օրը դեռևս չի նշանակված:

Բացի այդ Չեչնիայի և Դաղստանի փաստաբանական պալատները պետք է գնահատական տան իրենց անդամ փաստաբաններ Գերիխանովի և Ալիբուտաևայի գործողություններին: Այստեղ ոչ պարզապես փաստաբանական էթիկայի խախտում է, այլ հանցագործության մասնակցություն: 2018թ. սեպտեմբերի 28-ին Մոսկվայի Կուզմինսկի դատարանը կքննի Կարլ Կարագուլյանի բողոքը փոխառության պայմանագրի դեմ, բացի այդ Մոսկվայի դատախազություն բողոք կներկայացվի Խորեն Ղազարյանի վերաբերյալ գործը կարճելու որոշման դեմ: Իսկ ունեցվածքի հափշտակության փաստերով Ֆյոդոր Տրուսովի վստահորդը դիմել է ոստիկանություն:

Աղբյուր` Փաստինֆո