Փաստ ինֆո

Հայտնի ռուսաստանյան-իսրայելական բլոգեր Ալեքսանդր Լապշինն, ով վերջերս ազատ էր արձակվել Բաքվի բանտից, անդրադարձել է ղարաբաղյան կոնֆլիկտին: Նա նշել է, որ Ադրբեջանը դեռևս 1988թ. սկսել է հայերի դեմ տեռորը Սումգայիթում, Բաքվում և Ղարաբաղում նացիստական սխեմայով:

Բլոգերը նշել է, որ իր համար ամոթալի է խոստովանել, սակայն մինչև ազերիական բանտում հայտնվելը ինքն անկեղծորեն կարծում էր, որ ղարաբաղյան կոնֆլիկտը շատ վիճելի է և պետք է լուծվի Ադրբեջանի ազգային սահմանների հանդեպ հարգանքը հաշվի առնելով:

«Ինչքա՛ն ապուշ էի ես: Ադրբեջանը դեռևս 1988թ. սկսել է տեռորը հայերի դեմ Սումգայիթում, Բաքվում և Ղարաբաղում: «juden frei» նացիստական սխեմայով, սակայն կիրառվել է հայերի և ոչ թե հրեաների նկատմամբ: Թեև Ադրբեջանի հրեաների 95%-ը փախել են երկրից մոտավորապես հենց այն ժամանակահատվածում, երբ և սկսվել է կոնֆլիկտը Ղարաբաղում: Շառից, փորձանքից հեռու, կվերջացնեն հայերի հետ, կանցնեն հրեաներին, գենետիկ հիշողություն է: Այսօր հրեաներին Ադրբեջանում սիրում են, չէ՞ որ նրանք այնտեղ համարյա չեն մնացել, դե, երկու հազարից քիչ են: Նախկինում համարյա 100 հազարից մինչև Միության փլուզումը»,- գրում է բլոգերը Facebook սոցցանցի իր էջում:

Մինչդեռ, ինչպես հիշեցրել է Լապշինը, իր դեմ Ադրբեջանի գլխավոր դատախազի տեղակալ Ռուստամ Ուսուբովի ստորագրությամբ մեղադրական ակտում բառացիորեն գրված է հետևյալը (մեջբերում).

«... մեղադրյալ Լապշինը օկկուպացված Ղարաբաղի շրջանն անվանել է «Արցախ», ինչը ապացուցում է Ֆեյսբուքի նրա ընկեր Սերգեյ Շահվերդյանի հետ միասին նրա անջատողական գործողությունները...»

«Հատկանշական է, որ առավոտից մինչև գիշեր հանդուրժողականության մասին պնդող Ադրբեջանը Ղարաբաղի հայկական անվանումը՝ Արցախ, անօրինական է համարում: Այսինքն՝ հայոց լեզուն օրենքից դուրս է, մայրենի լեզվով խոսել հայերին չի թույլատրվում, իր հավատն ունենալ նույնպես չի կարելի, և ընդհանրապես, իբր թե (քննիչ Տալիբովի մեջբերումը). «...հայերի ցեղասպանությունը հորինվածքներ են, եթե թուրքերը նրանց կոտորեին, մենք ավելի քիչ խնդիրներ կունենայինք...»: Գեբելսը նյարդային ծխում է»,- նշել է Ալեքսանդր Լապշինը:

«Պինդ մնացեք, հայեր: Այդ մարդիկ ձեզ մահացած են ուզում տեսնել և վերջակետ: Եվ եթե դուք բանակցությունների կամ Հայաստանի դիրքերի թուլացման արդյունքում կորցնեք Ղարաբաղը, իմացեք, նրանք կգան ձեզ կոտորելու: Ինչպես թուրքերը 100 տարի առաջ: Գազանացումն արդեն անցել է բոլոր թույլատրելի սահմանները»,- գրել է բլոգերը:

Լապշինի գրառմանն ուղեկցում է հատկանշական հեշտեգը՝ #azeromarazm: Նախորդ հրապարակման մեջ բլոգերը խոստացել էր հանդես գալ հաջորդական մերկացումներով:
«Հենց որ առողջանամ, ընթերցողներին կուրախացնեմ ԱՄՆ և Ռուսաստանի մակարդակի համաշխարհային պետության ոչնչով չհիմնավորված հավակնություններ ունեցող ադրբեջանական միկրոթագավարության իսկապես խելագար, արտառոց վարմունքներով: Իսկ ըստ էության, մանր և ոչ ամենախելացի»,- գրել է Լապշինը:

Հիշեցնենք, որ ս.թ. սեպտեմբերի 11-ին հայտնի էր դարձել, որ Ադրբեջանի նախագահ Իլհամ Ալիևը կարգադրություն է ստորագրել ռուսաստանյան-իսրայելական բլոգեր Ալեքսանդր Լապշինին ներում շնորհելու մասին, ով Բաքվի դատարանի կողմից դատապարտվել էր երեք տարվա ազատազրկման:

Աղբյուր` Փաստինֆո