Փաստ ինֆո

Մարաշի զինված խմբի գործով այսօր հարցաքննվեց տանտիրուհին, ում տանը վնասազերծվել էր խումբը: 

Վկան հայտնեց, որ 2015 թ. հոկտեմբերին բրոքերի միջոցով իր տունը վարձակալությամբ տվել է Արթուր Վարդանյանին: Ըստ վկայի, ինքը կապի մեջ է եղել Մարինե Կաթանյանի հետ, ում Արթուրը ներկայացրել է որպես իր հաշվապահ: Երբ տունը վարձակալության են տվել, իր մոտ եկել են Արթուր Վարդանյանը, Մարինե Կաթանյանը, Նելլի Մինասյանը, Ասյա Մկրտչյանը, ինքը կարծել է, որ նրանք պետք է ապրեն այնտեղ:

Տանտիրուհին հայտնեց, որ ինքը չի իմացել, թե ի՛նչ նպատակով է իր տունը վարձակալվում, մտածել է, որ Արթուր Վարդանյանը Իսպանիայից եկած մարդ է, ուզում է մեկ ամիս ապրել այդ տանը:

Տանտիրուհին հայտնեց, որ ոստիկանական գործողության հետևանքով տանը մեծ վնասներ են պատճառվել, պատերը քանդված, իսկ դարպասը պոկված է եղել: Ոստիկանությունը պատուհանները, դարպասը փոխել է, բայց միևնույն է, իրենք շատ մեծ վնասներ են կրել:

«Ամբողջ Ալֆան մեր տանն էր, 200 հոգի տանը ման էին գալիս», - ասաց վկան:

Հետաքննիչ վկան հայտնեց, որ Արթուր Վարդանյանը հետաքրքրվում էր Հայկարամ Գրիգորյանի սպանությունից, ինքը մտածել է, որ Գրիգորյանը Էջմիածնում հեղինակություն է, դրա համար է հետաքրքրվում:

Հարցաքննվեց նաև խանութի տնօրենը, ով Արթուր Վարդանյանին որպես կլիենտ է ճանաչում, վերջինս իրենց խանութից 1-2 մլն-ի առևտուր է արել: Մասնավորապես, գնել է ձեռնոցներ, դիմակներ, 10-15 հատ համազգեստ (հատուկ գումարտակ նշումով): Արթուր Վարդանյանն ասում էր, որ համազգեստը ֆիլմի նկարահանման համար է՝ «եթե չեմ սխալվում, հայրենասիրական ֆիլմ էր»: Համազգեստները ազատ վաճառքի մեջ են եղել:

Սակրավորի բահ վաճառվե՞լ է՝ միգուցե, պատասխանեց վկան:

Այսօրվա նիստում ամբաստանյալ Խաչիկ Ավետիսյանը դժգոհեց, որ իրեն տեսակցելու իրավունք ունեցող անձանց թվում ներառված չէ իր երկամյա թոռը: Դատարանը պարզաբանեց, որ տեսակցելու իրավունք ունեցող են ամուսինները, ծնողները, որդիները, եթե համաձայն չէ դատարանի որոշման հետ, կարող է բողոքարկել այն: Ամբաստանյալն ի պատասխան հայտարարեց, որ որպես բողոքի նշան՝ հաջորդ դատական նիստին չի գալու:

Իսկ Հարություն Սարիբեկյանի դեպքում խնդիրը զուտ փաստաթղթային է, ամբաստանյալի կնոջը թույլ են տվել տեսակցել ամուսնու հետ, իսկ որդիներին՝ առայժմ ոչ այն պատճառով անձնագրի փոխարեն ծննդյան վկայականներ են ներկայացվել:

Աղբյուր` Փաստինֆո