Փաստ ինֆո

Քսան հազարից ավելի ռուսաստանցիների հինգշաբթի տարհանել են «ականապատման» մասին անանուն զանգերից հետո: Այս մասին ՌԻԱ Նովոստիին հայտնել է արտակարգ ծառայություններում աղբյուրը:

«Պայթյունի սպառնալիքներով հեռախոսազանգեր են եղել չորս քաղաքներում 48 օբյեկտների՝ 34 առևտրի կենտրոնների և 14 սոցիալական կարևոր օբյեկտների մասին»,- հավելել է գործակալության զրուցակիցը:

Տարբեր վարչական ու առևտրի շենքերի «ականապատման» մասին անանուն հեռախոսազանգերի ալիքը Ռուսաստանում շարունակվում է հինգերորդ օրը, չորեքշաբթի դրանք հասել են մինչև Մոսկվա: Մայրաքաղաքում սպառնալիքներն առնչվել են 50 օբյեկտների՝ առաջին հերթին կայարաններին, առևտրի խոշոր կենտրոններին, տարհանվել է 40,2 հազար մարդ:

Վերջին երեք օրվա ընթացքում ամբողջ երկրով սպառնալիքների մասին զանգերի պատճառով տարհանվել է 150 հազարից ավելի մարդ՝ 480-ից ավելի օբյեկտներից: Ոչ մի ահազանգ չի հաստատվել: Նախնական տվյալներով, անանուն զանգերի հիմնական մասը Ուկրաինայի տարածքից է եղել:

Ինչպես գործակալությանը պատմել է իրավապահ մարմիններում աղբյուրը, սպառնալիքներով հեռախոսազանգերի ալիքը նախաձեռնվել է արտասահմանից, «Իսլամական պետության» հետ կապ ունեցող անձանց կողմից: Բոլոր զանգահարողների նկատմամբ կհայտարարվի միջազգային հետախուզում:

Անվտանգության դաշնային ծառայության հասարակական կապերի կենտրոնում հրաժարվել են մեկնաբանել այս տեղեկատվությունը, սակայն նաև չեն հերքել այն:

Կրեմլում նշել են, որ Վլադիմիր Պուտինը տեղեկացված է «հեռախոսային ահաբեկչության» ալիքի մասին, ուժային գերատեսչությունները բոլոր միջոցները ձեռնարկում են մեղավորներին գտնելու համար: Պետության ղեկավարի մամուլի քարտուղար Դմիտրի Պեսկովը կոչ է արել սպասել հետաքննության կոնկրետ արդյունքներին:

Աղբյուր` Փաստինֆո