Փաստ ինֆո

Ինչ իրականացվել է, զննություն է, որովհետև խուզարկության դեպքում խուզարկողն ինքն է խոչընդոտը վերացնում: Այս մասին այսօր լրագրողների հետ զրույցում հայտարարեց խնդրի շուրջ քննարկմանը մասնակցած Փաստաբանների պալատի նախագահ Արա Զոհրաբյանը: Նա պարզաբանեց, որ երբ կարգադրիչն ասում է՝ պայուսակդ բաց արա, եթե չի բացում, ստիպողաբար բացում ու հանում է պայուսակի պարունակությունը, դա է խուզարկությունը:

«Ես այդպիսի դեպքի ականատես չեմ եղել և փաստաբաններն էլ այդպիսի դեպքի մասին վկայություն չեն տվել: Եթե կլինի խուզարկության փորձ, այո, դա վտանգավոր երևույթ է, և դրա դեմ ամբողջությամբ պետք է պայքարել»,- ասաց Արա Զոհրաբյանը՝ հավելելով, որ զննության հետ կապված էլ խնդիրներ կան, ՓՊ-ն այդ մասին խոսել է, դրա մասին ահազանգել է ու դիմել դատական համակարգին:

«Փաստաբանների պալատը ծայրահեղ միջոցների չի գնում, բայց հավասարակշռված, քայլ առ քայլ մենք փորձում ենք հարցը կարգավորել: Օրինակ, չկար արգելված իրերի ցանկ, հիմա կա արգելված իրերի ցանկ, հիմա որքանով է այդ ցանկը հաջող, որքանով է անհաջող, ես չեմ դատողը: Առնվազն գիտենք, որ կա ցանկ և չկա կարգադրիչի կամայական քմահաճույքը, որովհետև կարող է հանկարծ մի օր էլ կարգադրիչը ասել, որ փողկապը չեմ թույլատրում, որովհետև փողկապով կարելի է մարդ խեղդել»,- ասաց Արա Զոհրաբյանը:

Լրագրողներից մեկի հարցին՝ թե ինչպես է ՓՊ նախագահն ընդունում իրեն հասցեագրված փաստաբան Մուշեղ Շուշանյանի հայտարարությանը՝ «Դուք և Պալատը գործիք եք դարձել կոնկրետ խնդիր լուծելու համար», Արա Զոհրաբյանը հայտարարեց՝ դա հորինված, չհիմնավորված հայտարարություն է:

ՓՊ նախագահը հիշեցրեց, որ Մուշեղ Շուշանյանը 2013թ. օգոստոս ամսին, երբ Պալատի նախագահի նախորդ ընտրություններն էին, և առաջադրվել էր իր մոտ ընկեր Տիգրան Աթանեսյանը, նա այն ժամանակ նույն ջանասիրությամբ պնդում էր, որ ՓՊ-ն ընդհանրապես որևէ փաստաբանի չի օգնում: Հիմա Մ.Շուշանյանը ասում է՝ նախկինում Պալատը օգնում էր, հիմա չի օգնում:

«Պրն. Շուշանյանը, կարծեմ, ազնվություն պետք է ունենար և նշեր, որ երբ որ քրեակատարողական հիմնարկում խուզարկության փորձ էին կատարում իր նկատմամբ, ես ինքս անձամբ զանգահարեցի նրան, խնդրեցի պատմել ոնց է եղել, խնդրեցինք, որ մեզ ուղարկի որոշումը նրա մուտքն արգելելու մասին և իր առիթով եմ ես հանդիպումները կազմակերպել ու գնացել առաջ: Հիմա պրն. Շուշանյանը դա չի տեսնում կամ չի ուզում տեսնել, միևնույն է, անկախ իր մոտեցումներից՝ մենք մեր գործն անելու ենք»,- ասաց ՓՊ նախագահը:

Արա Զոհրաբյանը միաժամանակ հայտարարեց,որ չի կարող որևիցե մեկն իրեն քաղաքական պատվեր տալ: «Ինձ ընտրել են փաստաբանները, ինձ կարող են միայն փաստաբանները «ճնշել», ես փաստաբանների շահերի դեմ քայլ անել չեմ կարող և չի կարող որևիցե քաղաքական ուժ ինձ ճնշել»,- ասաց նա:

Ի պատասխան լրագրողների հարցադրումների՝ ՓՊ նախագահը նշեց՝ եթե կողքից գործընթացը նվաստացուցիչ է երևում, ուրեմն դա հենց այդպես է, դա ուղղակի չի կարելի թույլ տալ: «Փաստաբանն ի վերջո գրագետ մասնագետ է, առանց որի արդարադատության անիվը չի կարող պտտվել, և փաստաբանին հավուր պատշաճի վերաբերմունք պետք է դրսևորվի: Կոնտակտը պետք է ճիշտ կազմակերպել, վստահ եմ, որ կարգադրիչների մեծ մասը միջնակարգ կրթությամբ մարդիկ են, եթե փաստաբանի հետ բանավեճ է տեղի ունենում, արդեն անհավասար բանավեճ է լինում, մյուս կողմը կարող է արդեն ուժ կիրառել՝ փաստարկ բերելու փոխարեն ասել, որ չի թույլատրում և վերջ, դրանք իհարկե պետք է բացառել»:

Լրագրողներից մեկի հարցին, թե ե՞րբ է պատրաստվում ՓՊ նախագահը հանդես գալ խոստացված համերաշխության կոչով, Ա.Զոհրաբյանը պատասխանեց՝ մոտ օրերս: Նա նաև հավելեց, որ «ես այստեղ եկա նաև որպես համերաշխության քայլ»:

Աղբյուր` Փաստինֆո