Փաստ ինֆո

Այս գիշեր Էջմիածնում սպանվածներից մեկը՝ 1973թ. ծնված Կարեն Դավթյանը, օրենքով գող Արմեն Կանևսկոյի ընկերն է:

«Փաստինֆո»-ի տեղեկություններով, Դավթյանն առավել հայտնի է «Տուպիկի Կարեն» մականվամբ: Արմեն Կանևսկոյը, ով մահացել է Ռուսաստանի բանտում, «օրենքով գող» Արտյոմ Կանևսկոյի եղբայրն է: Իսկ վերջինիս անունն էլ շրջանառվում էր Դոն Պիպոյի սպանությանը նախապատրատելու գործում։

Ավելի վաղ տեղեկացրել էինք, որ գիշերը կրակոցներ են արձակվել Էջմիածնի Անդրանիկի թաղամասում՝ «Տոյոտա Լանդ Կրաուզեր» ավտոմեքենայի ուղղությամբ, որի մեջ գտնվող վարորդն ու ուղևորը տեղում մահացել են։

Դեպքի առթիվ սեպտեմբերի 12-ին Վաղարշապատի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 1-ին կետի և 235-րդ հոդվածի 1-ին մասի հատկանիշներով։

Սպանված վարորդը Լևոն Ավետիսյանն է՝ ծնված 1981թ., իսկ ուղևորը՝ Կարեն Դավթյանը՝ ծնված 1973թ.:

Հիշեցնենք, որ ամիսներ առաջ հայտնի դարձավ, որ սպանության նախապատրաստություն էր իրականացվել «Դոն Պիպոյի»` նույն ինքը Արթուր Ասատրյանի նկատմամբ: Այդ ժամանակ էլ հայտնի դարձավ, որ «օրենքով գող» Արտյոմ Կանևսկոյի անունը շրջանառվում էր «Դոն Պիպոյի» սպանության նախապատրաստության գործով:

Հարուցվեց քրեական գործ՝ Արթուր Ասատրյանը տուժող ճանաչվեց: Քրեական գործով անցնում է 4 մեղադրյալ, որոնցից 3-ը մեղադրվում են Ասատրյանի սպանությունը նախապատրաստելու մեջ, իսկ 4-րդը` Զոհրաբ Ղումաշյանը, օժանդակելու մեջ: Վերջինս եւս որոշ առնչություն ունի Արտյոմ Կանեւսկոյի հետ։ Թե որքանով է Արթուր Ասատրյանի սպանության պատերն առնչվում Օրենքով գող Կանեւսկոյի շրջապատի մարդկանց սպանության հետ՝ դեռ վաղ է ասել, սակայն փաստ է, որ քրեական աշխարհում կրքերը չեն հանդարտվում։

Ավելի վաղ տեղեկացրել ենք, որ ապրիլին ինչ-որ մարդիկ պատվիրել էին նաեւ Օշականցի Գեւորիկի սպանությունը, սակայն ինչ-որ բան այն չէր գնացել եւ պատվեր ստացածները չէին կարողացել իրագործել իրենց ծրագիրը, ավելին՝ միմյանց հետ էին վիճել։  Գյումրիում էլ Գեորգի Հակոբյանի նկատմամբ սպանության փորձ էր կատարվել և այդ գործի շրջանակներում կալանավորվել էր 2 անձ, այդ թվում՝ քրեական աշխարհում հայտնի Արտյոմ Ղազարյանը։

Վանաձորում էլ օգոստոսի 14-ին որովայնի շրջանի հրազենային վնասվածքով Վանաձորի բժշկական կենտրոն էր տեղափոխվել Էդմոն Հարությունյանը, նրա նկատմամբ կատարված սպանության փորձը ևս կապվում է քրեական հեղինակության հետ:

Ենթադրյալ սպանության փորձ կատարած անձը 35-ամյա Արման Շահինյանն է, ով ևս քրեական հեղինակություն է, և նրա մականունը «Յոժ» է:

Աղբյուր` Փաստինֆո