Փաստ ինֆո

«Անելիք» բանկի իրավաբանական վարչության պետ Հովհաննես Աթանյանի սպանության գործով այսօրվա դատական նիստում հրապարակվեցին գործով երկու վկայի նախաքննական ցուցմունքները, որոնց ներկայությունը ապահովելու միջոցներն, ըստ դատարանի, սպառվել են:

Մասնավորապես, վկա, բանկի աշխատակից Հայկ Գրիգորյանի ցուցմունքի համաձայն, նա իմացել էր, որ Հովհաննես Աթանյանի ավտոմեքենայի մոտ ինչ-որ մեկը կրակել ու սպանել է նրան: Հետագայում իմացել է, որ կրակողը տաքսի մեքենայի վարորդ է եղել: Ըստ վկայի, ինքը տեղյակ չի եղել տուժողն ու ամբաստանյալը հանդիպե՞լ են, թե՞ ոչ, եթե դեպքի օրը հանդիպեին, տուժողն իրեն այդ մասին կասեր: Վկան հայտնել է նաև, որ տուժողն իրեն որևէ բան չի ասել իրեն հետապնդելու մասին:

Արդյոք իրենք մտադի՞ր էին ամբաստանյալի նախկին սեփականությունը՝ «Անգելինա» ռեստորանը, իրենց պահել որպես սեփականություն հարցի կապակցությամբ վկան հայտնել էր, որ եթե իրենք մտադրություն ունենային բիզնեսով զբաղվել դա կարող էին անել առանց բանկի էլ:

Դատարանում հրապարակվեցին նաև բանկի պահնորդ Գևորգյանի ցուցմունքները: Նա հայտնել էր, որ Մկրտիչ Պողոսյանը պրոբլեմային վարկառու է եղել, և նման կլիենտներով զբաղվում էր Հայկ Գրիգորյանի գլխավորած դեպարտամենտը:

Դեպքի օրն էլ Մ.Պողոսյանը եկել էր Հայկ Գրիգորյանի հետ հանդիպելու համար, սակայն վերջինիս ներքին հեռախոսը չէր պատասխանել: Քանի որ արդեն ուշ ժամ էր, պահնորդը խնդրել է այցելուին դրսում սպասել, նա դուրս էր եկել: Հետո վկան իմացել էր, որ Հովհաննես Աթանյանին են խփել, որ նրան տաքսիստ է սպանել:

Ամբաստանյալ Մկրտիչ Պողոսյանի պաշտպան Դավիթ Մնացականյանը միջնորդեց բանկին հարցում ուղարկել, մասնավորապես, այն մասին, թե ի՞նչ հիմքերով է ստեղծվել «Նաիրյան» ՍՊԸ-ն և ի՞նչ հիմքերով է ընկերությանը վարկ տրամադրվել:

Դատարանը հետաձգեց միջնորդության քննարկումը և դրան կանդրադառնա գործի գրավոր ապացույցների հետազոտումից և ամբաստանյալի հարցաքննությունից հետո:

Ավելի վաղ դատարանում հարցաքննվել էր Հայկ Գրիգորյանի աները, ով պատմել էր, որ տուժողն ու իր փեսան որոշել էին ՍՊԸ ստեղծել՝ իր՝ բանկի աշխատակցի աներոջ գլխավորությամբ: Ըստ վերջինիս, ՍՊԸ-ի (խոսքը «Նաիրյան» ՍՊԸ-ի մասին է) նպատակն էր աշխատեցնել ամբաստանյալ Մկրտիչ Պողոսյանի նախկին սեփականությունը հանդիսացող «Անգելինա» ռեստորանը, որպեսզի օբյեկտը ոտքի կանգնի և որպեսզի հետագայում կարողանան վաճառել այն, անձնական շահագրգռվածություն չեն ունեցել:

Հիշեցնենք, որ 2015թ. նոյեմբերի 24-ին` ժամը 20:40-ի սահմաններում, Վարդանանց փողոցում որսորդական հրացանից արձակված կրակոցով սպանվել էր «Անելիք» բանկի իրավաբանական վարչության պետ Հովհաննես Աթանյանը， ում հայրը երկար տարիներ աշխատել է որպես դատավոր։

Սպանությունը կատարելու մեջ մեղադրվում է տաքսու վարորդ Մկրտիչ Պողոսյանը, ով բանկի հետ ունեցել է գույքային վեճ, ինչի կապակցությամբ նախկինում մի քանի անգամ հանդիպել է բանկի իրավաբանական վարչության պետին: Վերջին հանդիպումը տեղի է ունեցել դեպքի օրը՝ բանկում, որից ժամեր անց տեղի է ունեցել սպանությունը։

2012թ-ի սեպտեմբերին Պողոսյանները վաճառել են Փարաքարում գտնվող, իրենց ընտանիքին պատկանող «Անգելինա» ռեստորանը, որի ներսում գտնվող գույքը նույն պայմանագրով անհատույց օգտագործման պայմանագրով հանձնվել է ռեստորանի նոր տիրոջը: Նա էլ գրեթե անմիջապես գրավադրել է ռեստորանի անշարժ գույքը «Անելիք բանկ»-ում` դրա դիմաց ստանալով 1.300.000 ԱՄՆ դոլարի վարկ: Սակայն հետագայում վարկային պարտավորությունները չի կատարել, որի պատճառով էլ գրավադրված գույքը դարձել է բանկի սեփականությունը:

Իմանալով այս մասին՝ Մկրտիչ Պողոսյանը դիմել է բանկ` ռեստորանում մնացած իր գույքի դիմաց բանկից պահանջելով 300.000 ԱՄՆ դոլար:
Բանկը, սակայն, հրաժարվել է վճարել կամ վերադարձնել գույքը` պատճառաբանելով, որ ռեստորանային համալիրում գտնվող շարժական գույքը նույնպես հանդիսացել է գրավի առարկա, որի նկատմամբ բռնագանձում է տարածվել և այն չի կարող վերադարձվել իրեն:

Այս հարցի շուրջ Մկրտիչ Պողոսյանը 2012թ-ից մինչ օրս բազմիցս հանդիպել է բանկի իրավաբան, այնուհետև իրավաբանական վարչության պետ Հովհաննես Աթանյանին, բայց մերժում ստացել:
Մկրտիչ Պողոսյանը նաև դատարան է դիմել` դատական կարգով փորձելով վերականգնել իր խախտված իրավունքները: Բայց քաղաքացիական գործերի քննությունը դեռևս չավարտված՝ Մկրտիչ Պողոսյանն իմացել է, որ «Անգելինա» ռեստորանը` իրեն պատկանող գույքով, դարձյալ շահագործվում է:

Աղբյուր` Փաստինֆո