Փաստ ինֆո

Վահան Շիրխանյանի և մյուսների վերաբերյալ գործով մեղադրյալի կարգավիճակում հարցաքննված անձանց ցուցմունքներում գերակշռում էր ոչ թե հանցավոր համագործակցության, այլ Քեսաբի թեման:

Այսպես, Մարատ Թադևոսյանն, ով դատարանում հրաժարվեց ցուցմունքներ տալ ու անգամ իր պաշտպանի հարցերին պատասխանել, նախաքննական ցուցմունքում նշել էր, որ ամբաստանյալ Արթուր Վարդանյանի հիմնադրած «Հայոց վահան» կազմակերպությանն երդում է տվել Սիրիա մեկնելու նպատակով: Նա հայտնել է նաև, որ որևէ պլանավորված հանցագործության մասին տեղյակ չի եղել և դրանց մասնակցելու խոստում չի տվել:

Այսօրվա դատական նիստին քրեակատարողական հիմնարկներից դատարան էին ներկայացվել գործից առանձնացված գործերով արդեն դատապարտյալներ Անուշավան Ավետիսյանը, Հակոբ Հակոբյանը և Մկրտիչ Հովհաննիսյանը՝ առաջինը դատապարտվել է երեք, իսկ մյուս երկուսը երեքուկես տարվա ազատազրկման:

Անուշավան Ավետիսյանը հրաժարվեց ցուցմունք տալ, սակայն պատասխանեց դատավարության կողմերի հարցերին: Դատապարտյալը հայտնեց, որ իրենք «Հայոց վահան»-ին տաքսի ծառայություն են մատուցել, զենքն այլ անձանցից գնվել ու փոխանցվել է Քեսաբ գնալու համար:

Նախաքննական ցուցմունքներում Ա.Ավետիսյանը հայտնել է, որ 750 դոլար իրենց տրվել է ատրճանակի համար, որը չաշխատող լինելու պատճառով վերադարձվել է` 500 դոլարի հետ միասին, իսկ 250 դոլարի դիմաց էլ հետագայում ինքնաձիգ է ձեռք բերվել, որի համար լրացուցիչ ստացել են 900-950 դոլար: 200 հազար դրամ դատապարտյալը ստացել է նռնակների համար, արկղով վաճառված յուրաքանչյուր փամփուշտի համար՝ 300 դրամ:

Մեկ ուրիշ անգամ էլ պայուսակով ինքնաձիգներ է տվել՝ 2300-2400 դոլար ստացել: Գումարները փոխանցվել են այն մարդկանց, ումից որ զենքը ձեռք է բերվել, իսկ Անուշավան Ավետիսյանի շահն եղել է Գյումրիից Երևան տեղափոխելու համար 18 հազար դրամի փոխարեն 20 հազար դրամ ստանալը:

Դատապարտյալ Հակոբ Հակոբյանը նշեց, որ Արթուր Վարդանյանն օգտվում էր իրենց տաքսի ծառայությունից, ասում էր, որ Քեսաբ է գնում, զենք է պետք:

Մասնավորապես, նախաքննական ցուցմունքում դատապարտյալը հայտնել էր, որ ընդհանուր առմամբ իր և Անուշավան Ավետիսյանի կողմից ձեռք է բերվել զենք 3 հազարից երեքուկես հազար դոլարի սահմաններում՝ հերքելով Արթուր Վարդանյանի նշած գումարի չափը՝ 20 հազար դոլար:

Դատապարտյալը դատարանում հայտարարեց, որ նախաքննական ցուցմունքում ճիշտ չի վերարտադրվել «Ռադիո Մարիամ» մշակութային հիմնադրամի լրագրող Լիլիթ Թորոսյանին զենք փոխանցելու պահը՝ իրականում զենքը փոխանցվել է շորի մեջ փաթաթած, այսինքն՝ Լիլիթ Թորոսյանը չի իմացել զենք փոխանցելու մասին:

Այսօր հարցաքննվեց նաև դատապարտյալ Մկրտիչ Հովհաննիսյանն, ով մեղավոր է ճանաչվել այն բանի համար, որ ապօրինի ձեռք է բերել և ընկերոջ, հանցավոր համագործակցության գործով ամբաստանյալ Խաչիկ Ավետիսյանի հետ նախնական համաձայնությամբ, վերջինիս միջոցով տեղափոխել և Արթուր Վարդանյանին ապօրինի իրացրել է տրոտիլային պայթաղյուսներ:

Դատապարտյալը հայտնեց, որ ընկերը՝ Խաչիկ Ավետիսյանը ասել է, որ զենքը պետք է Քեսաբ ուղարկելու համար:

Հաջորդ դատական նիստում կհարցաքննվեն առանձնացված գործով դատապարտված Ստեփան Չիլինգարյանը և Հարություն Հովհաննիսյանը՝ նրանք 1.5 տարվա ազատազրկման ձևով իրենց պատիժն արդեն կրել են, նրանցից մեկն արդեն վերադարձել է Հայաստան, իսկ մյուսը կվերադառնա մոտ օրերս:

Աղբյուր` Փաստինֆո