Փաստ ինֆո

Ազգային ժողովի աշնանային նստաշրջանի առաջին քառօրյա նիստը կմեկնարկի սեպտեմբերի 11-ին և կշարունակվի մինչև սեպտեմբերի 14-ը: Ազգային ժողովի կայքում դեռևս տեղադրված չէ քառօրյա նիստի օրակարգը, դեռևս ներկայացված չեն նաև նստաշրջանի օրակարգում ընդգրկված օրենսդրական նախաձեռնությունները, սակայն թե պատգամավորների, թե կառավարության կողմից ներկայացվել են բազմաթիվ օրենսդրական նախաձեռնություններ, որոնք քննարկման առարկա կդառնան ԱԺ մեկնարկող նստաշրջանի ընթացքում:

«Արմենպրես» լրատվական գործակալությունն առանձնացրել է առավել հետաքրքրություն ներկայացնող օրենսդրական նախաձեռնությունները: Օրենսդրական հետաքրքիր նախաձեռնություններով է հանդես եկել Ազգային ժողովի փոխնախագահ Արփինե Հովհաննիսյանը: Պատգամավորը շրջանառության մեջ է դրել ՀՀ քրեական դատավարության օրենսգրքում լրացում կատարելու մասին օրենքի նախագիծը, որով առաջարկում է սահմանել, որ սուտ մատնության վերաբերյալ քրեական գործ հարուցելու հարցը քրեական գործ հարուցելու իրավասություն ունեցող մարմինը կարող է քննարկել, եթե հանցագործության վերաբերյալ հաղորդման քննարկման արդյունքում որոշում է կայացվել ՀՀ քրեական դատավարության օրենսգրքի 35-րդ հոդվածի 1-ին մասի 1-ին և 2-րդ կետերով քրեական գործի հարուցումը մերժելու, հարուցված քրեական գործի վարույթը կարճելու, քրեական հետապնդումը դադարեցնելու, քրեական հետապնդում չիրականացնելու մասին կամ կայացվել է արդարացման դատավճիռ:

Օրենսդրական մեկ այլ նախաձեռնությամբ Արփինե Հովհաննիսյանն առաջարկում է փոփոխություններ կատարել ՀՀ դատական օրենսգրքում: Առաջարկվում է գործերի պատահական բաշխման կարգը կիրառել նաև մինչդատական վարույթի նկատմամբ իրականացվող դատական վերահսկողության շրջանակներում ներկայացվող միջնորդությունների, դատական հանձնարարությունների և այլ միջնորդությունների նկատմամբ՝ դրանով բացառելով դատարանների նախագահների կողմից կամայական ու ոչ հավասարաչափ բաշխումը: Նախագծի ընդունման արդյունքում կապահովվի նաև մինչդատական վարույթի նկատմամբ դատական վերահսկողության շրջանակում ներկայացվող միջնորդությունների, դատական հանձնարարությունների ու դատական ակտերի կատարման հետ կապված միջնորդությունների պատահական բաշխման կարգը:

«Ելք» խմբակցությունն առաջարկում է փոփոխություններ կատարել «Ավելացված արժեքի հարկի» մասին ՀՀ օրենքում: Շրջանառության մեջ դրված օրենսդրական նախաձեռնությամբ խմբակցության պատգամավորներն առաջարկում են դեղերի ներմուծումն ազատել ավելացված արժեքի հարկից: «Ելք» խմբակցության պատգամավորները կարծում են, որ ԱԱՀ-ից դեղերի ազատումը կհանգեցնի Հայաստանում դեղերի գների նվազման:

«Ելք» խմբակցության պատգամավորները մեկ այլ նախաձեռնությամբ առաջարկում են փոփոխություններ կատարել «Գույքահարկի մասին» ՀՀ օրենքում: Պատգամավորներն առաջարկում են պայմանագրային զինծառայողներին ազատել գույքահարկից:

«Ելք»-ը խորհրդարանում շրջանառության մեջ է դրել նաև «Ձերբակալված և կալանավորված անձանց պահելու մասին» ՀՀ օրենքում փոփոխություն կատարելու մասին օրենքի նախագիծը, որով առաջարկում են սահմանել, որ ձերբակալված կամ կալանավորված անձանց հետ տեսակցել ցանկացող պատգամավորների տեսակցությունները որևէ պարագայում չի կարելի արգելել «Ծառուկյան» խմբակցության պատգամավորներ Գևորգ Պետրոսյանը, Նաիրա Զոհրաբյանը և Միքայել Մելքումյանն առաջարկում են փոփոխություններ կատարել ՀՀ քրեական դատավարության օրենսգրքում:

«Ծառուկյան» խմբակցության պատգամավորներն առաջարկում են սահմանել, որ մեղադրյալի հարցաքննությունը պարտադիր պետք է տեսաձայնագրվի: Նախագծի ընդունումը պայմանավորված է նախաքննության ընթացքում` հարցաքննության ժամանակ, տեսաձայնագրում կատարելու միջոցով բացառելու կասկածյալի կամ մեղադրյալի նկատմամբ խոշտանգումը և վատ վերաբերմունքը:

Մեկ այլ նախաձեռնությամբ «Ծառուկյան» խմբակցության պատգամավորներն առաջարկում են փոփոխություններ կատարել Հարկային օրենսգրքում: Պատգամավորներն առաջարկում են շրջանառության հարկի տարեկան 58.35 միլիոն դրամի շեմը, որը գործելու է 2019 թ., դարձնել տարեկան 115 միլիոն դրամ: Որպես հիմնավորում նշվում է այն հանգամանքը, որ 58.35 մլն դրամ տարեկան շրջանառության շեմի սահմանման ժամանակաշրջանում ՀՀ-ում տնտեսության վիճակն այլ էր: Տարբեր էին ինչպես իրացման շրջանառությունները, այնպես էլ արտարժույթի փոխարժեքը. այդ ժամանակաշրջանում 58.35 մլն դրամը համարժեք էր շուրջ 200 հազար ԱՄՆ դոլարին, որի ներկայիս արժեքը տատանվում է 100 մլն դրամի շուրջ:

ԱԺ ՀՀԿ խմբակցության պատգամավորներ Գալուստ Սահակյանը և Կարինե Աճեմյանն էլ առաջարկում են փոփոխություններ կատարել «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում: Առաջարկվում է «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքի գործողության ժամկետը երկարաձգել և 27 տարին լրացած, պարտադիր զինվորական ծառայությունից խուսափած քաղաքացիներին հնարավորություն տալ սահմանված ժամկետում մուծել օրենքով սահմանված դրույքաչափերին համապատասխան վճարը, վերադառնալ հայրենիք և ազատվել քրեական հետապնդումից:

Լուսանկարը՝ ֆոտոլուրի

Աղբյուր` Փաստինֆո