Փաստ ինֆո

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը՝ նախագահությամբ Արսեն Նիկողոսյանի, այսօր անպարտ է ճանաչել և արդարացրել է ընկերոջ ընկերուհուն ազատությունից ապօրինի զրկելու մեջ մեղադրվող Աշոտ Ղարաբաղցյանին: «Փաստինֆո»-ն այդ մասին տեղեկացավ Ղարաբաղցյանի պաշտպան Ավագ Լալայանից:

Մեղադրանքի համաձայն՝ Աշոտ Ղարաբաղցյանը 03.05.2016թ. ժամը 23.30-ի սահմաններում հյուրընկալել է ընկերոջը՝ Վահե Ավանեսյանին, ով ընկերոջ տուն միայնակ չի գնացել և իր հետ այնտեղ է տարել ընկերուհուն՝ Մարինեին՝ հայտնելով, որ Մարինեին փախցրել է, և նրանք պետք է մնան իր տանը։

Դրանից հետո Վահե Ավանեսյանի առաջարկով գնումներ կատարելու նպատակով Աշոտ Ղարաբաղցյանը դուրս է եկել տանից և տան մուտքի դուռը դրսի կողմից փակել է Մարինեի վրա:

Ըստ մեղադրանքի՝ Ղարաբաղցյանը ուղղակի դիտավորությամբ տևական ժամանակ՝ 20 րոպե, զրկել է Մարինեին ազատությունից։ Վերջինս փորձել է տան մուտքի դուռը բացել և դուրս գալ, սակայն չի հաջողվել, որից հետո զանգահարել է իր հարազատներին և վերջիններիս օգնությամբ դուրս է եկել տան ետնամասում գտնվող մուտքի դռնից։

Պաշտպանից տեղեկացանք, որ երբ Ղարաբաղցյանը գնումներ կատարելուց հետո վերադարձել է, իր տան մուտքի դռան մոտ տեսել է այդ աղջկա հորը, ով փորձել է տան դուռը բացել, Ղարաբաղցյանն էլ դուռը բացել է բանալիով և ներս են մտել, ընդ որում, տան ետին մասի դուռը բաց է եղել, և աղջիկն առանց խոչընդոտ կարող էր դուրս գալ տանից:

Աշոտ Ղարաբաղցյանին մեղադրանք է առաջադրվել ՀՀ քրեական օրենսգրքի 133-րդ հոդվածի 1-ին մասով և նրա նկատմամբ որպես խափանման միջոց է ընտրվել չհեռանալու մասին ստորագրությունը:

Նշենք, որ մեղադրող դատախազը հիմնավոր է համարել Ղարաբաղցյանին առաջադրված մեղադրանքը և միջնորդել նրան դատապարտել 1 տարի ժամկետով ազատազրկման:

Աղբյուր` Փաստինֆո