Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի համար այսօր դատարան շտապօգնություն հրավիրվեց:

Դատական նիստը սկսվելուց րոպեներ անց Բարսեղյանի պաշտպան Վարդուհի Էլբակյանը նախագահող դատավորին տեղեկացրեց, որ Բարսեղյանի ինքնազգացողությունը վատ է և խնդրեց շտապօգնություն հրավիրել:

Բժշկուհին դատարանում հայտնեց, որ Բարսեղյանի ճնշումը 150-100 է, դեղորայքի միջոցով փորձել են կարգավորել, սակայն նա ունի առողջական խնդիր և պետք է դեղորայքային բուժում ստանա և հետազոտվի: Բժշկուհին նաև առաջարկեց Բարսեղյանին հոսպիտալացնել, սակայն նշեց, որ այս պահին նա կարող է մասնակցել դատական նիստին:

Դատական նիստը շարունակվեց և դատարանը հետազոտեց իրեղեն ապացույցները՝ լազերային սկավառակներ, որպես կաշառք ներկայացվող ԱՄՆ դոլարների լուսանկարներ:

Ձեռնպահ մնալով դատական նիստը գուշակություններով լուսաբանելուց, քանի որ լսելիության խնդիրը այս դատարանում շարունակում է արդիական մնալ՝ միայն նշենք, որ դատարանում հետազոտվող՝ օպերատիվ-հետախուզական միջոցառումների ժամանակ կատարված տեսանյութերի վերաբերյալ պաշտպան Վարդուհի Էլբակյանն ասաց, որ դրանք ամբողջական չեն և մոնտաժված են. մոնտաժված չլինելու պարագայում տեսանելի կլիներ, թե այդ գործողության ժամանակ քանի մարդ է ներկա գտնվել:

Այժմ ցանկանում ենք եւս մեկ անգամ ուշադրություն հրավիրել Շենգավիթ վարչական շրջանի ընդհանուր իրավասության դատարանի 1-ին դահլիճում լսելիության խնդրի վրա։  Նախկինում «Փաստինֆո»-ն մի քանի անգամ խնդրին անդրադարձել է, սակայն ինչպես այսօր եւս համոզվեցինք, որ ՝ ապակիներից այս կողմ դատավարությանը ներկա լրատվամիջոցների ներկայացուցիչների աշխատանքն  ուղղակիորեն խոչընդոտվում է:

Տեսականորեն դատական նիստերն ընթանում են դռնբաց, սակայն լրագրողը ներկա գտնվելով նիստերին չի կարող վստահ լինել չի կարող, որ ճիշտ է լսել, քանի որ ապակիներից այն կողմ դատավարության մասնակիցների ցածրաձայն խոսքը չի լսվում, իսկ բարձրաձայնը՝ աղմուկի է վերածվում։ 

«Փաստինֆո»-ի լրագրողի բարձրացրած հարցը դատական նիստում ներկայացրեց պաշտպան Վարդուհի Էլբակյանը, դատարանը նախագահությամբ՝ Վաչե Մարգարյանի, փորձ արեց լուծել այդ հարցը, սակայն ողջ դատական նիստի ընթացքում խնդիրն այդպես էլ չլուծվեց:

Առնվազն կասկածելի է, թե ինչո՞ւ նախագահողը խնդրի բարձրաձայնելուց հետո ուղղակի դատական նիստերը չի տեղափոխում մեկ այլ դահլիճ, թե ցանկություն չկա իրապես դռնբաց դատական նիստ անցկացնելու, ում է ձեռնտու  դատական նիստը դռնբաց քննելու այս իմիտացիան:

Նշենք նաև, որ մինչ Իշխան Բարսեղյանի վերաբերյալ գործի քննությունը՝ նույն  դահլիճում քննվում էր Շենգավիթում «Լիա» գեղեցկության սրահում տեղի ունեցած սպանության գործը, որը նախագահում է դատավոր Նելլի Բաղդասարյանը։ Վերջինիս ընդհանրապես չհետաքրքրեց հարցը, թե  դահլիճում ներկաներին լսելի է, թե ինչ է կատարում կամ ինչ միջնորդություններով են հանդես գալիս կողմերը:

Փոխարենը դահլիճ մտնելուց հետո շտապեց դիտողության անել դահլիճում ներկա անձին ոտքի չկանգնելու համար, ապա դիտողություն արեց նաեւ լրագրողներին, ովքեր պարզապես փորձում էին հասկանալ, թե ինչ միջնորդությամբ է հանդես գալիս պաշտպան Երեմ Սարգսյանը, քանի որ նրա ձայնը լսելի չէր:

Հարկ ենք համարում նշել, որ նշված դատավորները արհեստականորեն լրագրողների համար խնդիրներ են ստեղծում, այդկերպ խոչընդոտելով նրանց մասնագիտական գործունեությանը:

Եվ այս նույն դատավորները չի բացառվում, որ քննեն լրագրողների աշխատանքները խոչընդոտելու վերաբերյալ գործեր, այն դեպքում, երբ իրենց գործողություններով են խոչընդոտում դատական գործեր լուսաբանող լրագրողների աշխատանքը:

Աղբյուր` Փաստինֆո