Փաստ ինֆո

Արամ Մանուկյանի և մյուսների վերաբերյալ «Սասնա Ծռեր»-2-ի գործով այսօրվա դատական նիստը սկսվեց մի շարք պաշտպանների բացակայությամբ: Ընդ որում, որոշ պաշտպաններ բացակայում են, քանի որ զննման-խուզարկության խնդրի հետ կապված նրանց թույլ չեն տալիս մուտք գործել դատական նիստերի դահլիճ:

Տվյալ փուլում դատավարության մասնակիցները պետք է իրենց դիրքորոշումը հայտնեն՝ մեղադրողների դեմ բացարկ ունե՞ն, թե՝ ոչ: Պաշտպանական կողմը պահանջում է, որպեսզի ապահովվի բոլոր պաշտպանների մասնակցությունը: Ընդ որում, ընդգծվեց, որ բացակայում են նաև պաշտպաններ, որոնց պաշտպանյալները հեռացված են դատական նիստերի դահլիճից:

Պաշտպանական կողմը կոչ արեց դատարանին ղեկավարվել Քրեական դատավարության օրենսգրքով և դատավարական գործողություններ չկատարել պաշտպանների բացակայությամբ: Իսկ ներկա պաշտպաններից Հրանտ Գևորգյանը նշեց, որ ինքը բացարկի վերաբերյալ չի կարող դիրքորոշում հայտնել մինչև չիմանա դատարանի նիստերի դահլիճից հեռացված իր պաշտպանյալի դիրքորոշումը:

Պաշտպան Լուսինե Սահակյանը հայտարարեց, որ չի կարող մասնակցել անօրինականություններին և որպես բողոքի նշան լքեց նիստերի դահլիճը: Բացի Լ.Սահակյանից նիստերի դահլիճը լքեցին նաև պաշտպաններ Հրանտ Գևորգյանն ու Արայիկ Պապիկյանը:

Պաշտպան Ինեսսա Պետրոսյանը հայտարարեց, որ ինքը բացարկ ունի, սակայն իր համար կարևոր է պաշտպաններ Մուշեղ Շուշանյանի, Դավիթ Գյուրջյանի կարծիքը, ուստի դատարանից պահանջեց ապահովել նրանց և պաշտպան Լուսինե Սահակյանի ներկայությունը:

Դատարանը հեռացավ խորհրդակցական սենյակ՝ պաշտպաններ Լուսինե Սահակյանի, Հրանտ Գևորգյանի ու Արայիկ Պապիկյանի վերաբերյալ որոշում կայացնելու:

Լուսանկարը՝ 1In.am-ի

Աղբյուր` Փաստինֆո