Փաստ ինֆո

Պավել Մանուկյանի և մյուսների վերաբերյալ «Սասնա Ծռեր»-ի գործով այսօրվա դատական նիստն ընդմիջվեց՝ փաստաբաններ Մուշեղ Շուշանյանին և Լուսինե Սահակյանին զննության ենթարկելու վերաբերյալ խնդրի շուրջ որոշում կայացնելու պատճառով:

Դատական կարգադրիչները նույնաբովանդակ արձանագրություններ էին կազմել հիշյալ փաստաբանների վերաբերյալ՝ նշելով, որ ձեռքի մետաղորսիչ սարքով զննության են ենթարկել փաստաբանների, երբ մետաղյա իրի առկայության մասին ազդանշան է հնչել: Փաստաբաններին առաջարկվել է ազատվել այդ իրից կամ ցույց տալ այն, սակայն նրանք հրաժարվել են, ըստ կարգադրիչների, կատարել իրենց օրինական պահանջը:

Իր բացատրության մեջ Մուշեղ Շուշանյանը նշել է, որ հրաժարվել է կատարել անօրինական պահանջը, որից հետո իրեն հայտնվել է, որ իր մուտքն արգելվում է դատական նիստերի դահլիճ, իսկ Լուսինե Սահակյանն իր հակասություններով հանդերձ՝ հաստատել է արձանագրության «ոչ իրավական լինելը»:

Դատարանում հրապարակվեց արդեն իսկ դատական նիստերի դահլիճում գտնվող փաստաբան Արա Զաքարյանի դիմումը՝ ուղղված դատարանին:

«Ցանկանում էին խուզարկել պայուսակս, որի մեջ գտնվում են համակարգիչն ու գործի համար նշանակություն ունեցող նկութեր և հրաժարվում ինձ թողնել մուտք գործել դատական նիստերի դահլիճ: Դուք՝ որպես նախագահող դատավոր, պարտավոր եք կանխել կարգադրիչների ապօրինի գործողությունները, խնդրում եմ թույլ տալ մուտք գործել դատական նիստերի դահլիճ: Խնդրում եմ նաև վերջ տալ կամայականություններին ու իմ բացակայությամբ նիստը չշարունակել»:

Իսկ կարգադրիչի համապատասխան արձանագրությանն ի պատասխան փաստաբանը նշել է, որ կարգադրիչի պահանջը բացահայտ ապօրինի է, «կրկին անգամ պահանջում եմ ինձ տրամադրել արգելված իրերի ցանկը և հայտնել այդպիսիք առկա՞ են ինձ մոտ»:

Աղբյուր` Փաստինֆո