Փաստ ինֆո

«Սասնա Ծռեր»-ի գործով Պավել Մանուկյանի և մյուսների վերաբերյալ գործով այսօրվա դատական նիստում դատարանը դատական սանկցիաներ կիրառեց երեք փաստաբանի նկատմամբ:

Մասնավորապես, փաստաբաններ Մուշեղ Շուշանյանի և Լուսինե Սահակյանի վերաբերյալ որոշվեց դիմել Փաստաբանների պալատ նրանց կարգապահական պատասխանատվության ենթարկելու հարցով՝ զննության (որը փաստաբանները գնահատում են որպես խուզարկություն) չենթարկվելու հետ կապված, իսկ փաստաբան Արայիկ Պապիկյանի նկատմամբ նույնաբովանդակ սանկցիա կիրառվեց նրա պաշտպանյալ Արայիկ Խանդոյանի նիստերի դահլիճից հեռացվելու պարագայում պաշտպանի կողմից նիստերի դահլիճը լքելու հետ կապված:

Արայիկ Պապիկյանը հայտարարեց, որ իր պաշտպանյալը ընդամենը ջուր էր խնդրում, և պաշտպանական կողմին հնարավորություն չտրվեց դատական նիստերի դահլիճից Արայիկ Խանդոյանի հեռացվելու վերաբերյալ իր կարծիքը հայտնել:

Պաշտպանն իր դժգոհությունը հայտնեց փաստաբանների զննության-խուզարկության հարցի հետ կապված՝ նշելով, որ կարգադրիչների կողմից որոշ փաստաբանների նկատմամբ խտրական վերաբերմունք է դրսևորվում:

Այսօրվա նիստում նույնպես գործի քննությունը կասեցնելու և ՍԴ դիմելու միջնորդություն արվեց՝ ամբաստանյալներ Կյուրեղյանի ու Բարսեղյանի կամքին հակառակ հանրային պաշտպան ներգրավելու հարցի հետ կապված:

Այս անգամ օրենքի դրույթի սահմանադրականությունն որոշելու հարցով ՍԴ դիմելու միջնորդությամբ հանդես եկավ հանրային պաշտպան Գարեգին Մարգարյանը՝ ավելի վաղ նույնաբովանդակ միջնորդությամբ հանդես էր եկել նաև հանրային պաշտպան Արմինե Ֆանյանը:

Դատարանը որոշեց առանց քննության թողնել միջնորդությունը որպես ոչ ժամանակին արված միջնորդություն՝ մասնավորապես, պարզաբանելով, որ «քանի որ բացակայում են բավականին շատ պաշտպաններ»:

Դատարանը նաև բավարարեց ամբաստանյալ Կարո Եղնուկյանի դիմումը և որպես երրորդ պաշտպան գործում ներգրավեց փաստաբան Նինա Կարեպտյանցին:

Դատական նիստը հետաձգվեց մեկ շաբաթով:

Լուսանկարը՝ Ֆոտոլուրի

Աղբյուր` Փաստինֆո