Փաստ ինֆո

ԼՂՀ ՊԲ նախկին հրամանատար Սամվել Բաբայանի և մյուսների գործով այսօր Կենտրոն և Նորք-Մարաշ վարչական շրջանների ընդհանուր իրավասության դատարանում՝ նախագահությամբ դատավոր Արշակ Վարդանյանի, հարցաքննվեցին դատակոչված վկաներից 3-ը, որոնցից երկուսը ճանաչում էին գործով ամբաստանյալներից միայն Դավիթ Հարությունյանին:

Մինչ դատարանը կանցներ վկաների հարցաքննությանը՝ մեղադրող դատախազ Արամ Արամյանը միջնորդեց դահլիճում ներկա լրատվամիջոցների կողմից տեսանկարահանումն արգելել. վկաները հարցաքննվում են առանձին-առանձին, իսկ տվյալ պարագայում, երբ ուղիղ հեռարձակում է իրականացվում, դա կարող է ազդել մյուս վկաների ցուցմունքների վրա, ասաց մեղադրողը:

Գործով ամբաստանյալ Սամվել Բաբայանն առարկեց՝ գտնելով, որ պետք է հանրությունն իրազեկված լինի, ակնարկեց նաև, որ լրատվամիջոցները գործով որոշակի տեղեկություններ են հրապարակել որոնք իրականության չեն համապատասխանում:

Դատարանը մեղադրողի միջնորդությունը բավարարեց մասնակի, թույլատրեց տեսանկարահանել 5 րոպեից ոչ ավելի, միևնույն ժամանակ նշելով, որ ձայնագրառման առումով որևէ սահմանափակում չկա:

Այսպիսով, վկա Արմեն Հակոբյանը, ով աշխատում է Երևան –Մոսկվա բեռանափոխադրումներ և ուղևորափոխադրումներ իրականացնող ընկերությունում՝ որպես վարորդ է, ասաց, որ Մոսկվայում դիսպետչերն իրեն ծրար է փոխանցել, որը, Երևան վերադառնալով, ինքն էլ պետք է փոխանցեր իրենց մյուս աշխատակիցներից մեկին: Ըստ վկայի՝ այդպես էլ եղել է. Երևան վերադառնալով ծրարը փոխանցել է Գոռ Շաքոյանին:

Ծրարի պարունակության վերաբերյալ էլ վկան ասաց, որ երբ իրեն է փոխանցել Արայիկ Գրիգորյանը, հայտնել է, որ նրանում փաստաթղթեր են:

Վկայի նախաքննական և դատաքննական ցուցմունքներում առկա էին հակասություններ, որոնք, մասնավորապես, վերաբերում էին նկարագրվող գործողության ժամանակագրությանը, և քանի որ երկար ժամանակ էր անցել, վկան չէր կարողանում մտաբերել, թե երբ են իրեն փոխանցել այդ ծրարը, որպեսզի բերի Հայաստան:

Հրապարակված ցուցմունքից պարզ դարձավ, հիշյալ գործողությունը եղել է 2016թ. սեպտեմբերի երկրորդ շաբաթվա ընթացքում:

Հարցաքննության հրավիրված մյուս վկան էլ Գոռ Շաքոյանն էր, ում Հակոբյանը ծրարը փոխանցել էր՝ Հայաստան վերադառնալով:

Գոռ Շաքոյանը ճանաչում էր ամբաստանյալներից միայն Դավիթ Հարությունյանին, վերջինս իրեն խնդրել էր օգնել Մոսկվայից գումար փոխանցել Երևան՝ ինքն էլ դիմել է դիսպեչեր Արայիկ Գրիգորյանին, և այդկերպ գումարը Հայաստան է բերվել:

Վկան նշեց, որ փոխանցվող գումարը 5000 եվրո է եղել և քանի որ վստահ է եղել, որ դրանք կեղծ չեն, Դավիթի խնդրանքը կատարել է, միայն տարօրինակն այն է եղել, որ փողերի վրա լաքաներ են եղել:

Վկայի նախաքննական ցուցմունքը ևս հրապարակվեց, ըստ որոնց՝ Դավիթը Գոռին ասել է, որ գումարներ կան, պետք է Երևան տեղափոխել, սակայն վրաները լաքաներ են: Գումարը եղել է ծրարի մեջ, իսկ թե ծրարի վրա ինչ որ բան գրված եղել է հարցին, վկան դատարանում բացասական պատասխան տվեց, սակայն նախաքննական ցուցմունքում հայտնել էր, որ ծրարի վրա ինչ որ բան է գրված եղել:

Հաջորդիվ հարցաքննվեց վկա Վրեժ Առաքելյանը, ով ամբաստանյալ Դավիթ Հարությունյանի ընկերն է:

Վկան հայտնեց, որ Դավիթի հետ խոսել են գումարի մասին, որի վրա լաքաներ կան, և արդյոք դա հնարվոր է բանկում փոխանակել, վկան դատարանում նշեց, որ ինքն այդ գումարները չի տեսել, ասել, որ դրանցից չի հասկանում:

Դատարանի հարցին, թե վկայի նախաքննական ցուցմունքի ժամանակ քննիչի կողմից իր վրա ներազդում եղե՞լ է, վկան պնդեց՝ ոչ, իսկ այդ ընթացքում Սամվել Բաբայանը տեղից հայտարարեց, որ քննիչը բոլորին է ուղղորդել:

Վկայի ցուցմունքներում առկա էական հակասությամբ պայմանավորված մեղադրողը միջնորդեց հրապարակել նախաքննական ցուցմունքը, ըստ որի՝ 2016թ սեպտեմբերին հանդիպել է Դավիթին, ով իրեն հնամաշ 20 եվրո փող է ցույց տվել, որի վրա լաքա է եղել, ապա գումարը բանկում փոխելու հետ կապված քննարկել են, ինչի վերաբերյալ ինքն ասել է, որ թող թղթադրամի տերը զբաղվի դրանով, ապա նա հավելել է, որ կհետաքրքրվի՝ հնարավո՞ր է, թե՝ ոչ, սակայն ոչինչ չի ձեռնարկել և չի հետաքրքրվել:

Միևնույն ժամանակ նա նշել էր, որ իր և Դավիթի ընդհանուր ընկեր Էդմոնը ևս տեղյակ է եղել այդ մասին, նույն հարցի վերաբերյալ Դավիթը Էդմոնի հետ ևս խոսել է:

Էդմոնն անգամ հարցրել է, թե հնարվո՞ր է այդ գումարները կեղծ են, իսկ ինքը պնդել է, որ, Դավիթին ճանաչելով, չի կարծում, որ դրանք կարող են կեղծ լինել:

Գործով երկու վկաների վերաբերյալ էլ դատարանը տեղեկացրել, որ փորձել են նրանց ներկայությունն ապահովել, սակայն պարզվել է,  որ նրանցից մեկը  Հայաստանում չէ, առողջական խնդիրների պատճառով սեպտեմբերի 3-ին մեկնել է և վերադառնալու է սեպտեմբերի 20-ին, միևնույն ժամանակ վկան դատարանին ուղարկված նամակում պնդել էր իր նախաքննական ցուցմունքը:

Իսկ գործով մյուս վկան էլ պարզվել է, որ տեղաշարժվելու հետ կապված խնդիր ունի, հենակների օգնությամբ է քայլում և դատարան չի կարող ներկայանալ:

Եվ քանի որ մինչև մյուս դատական նիստը նրանց ներկայությունը հնարավոր չի լինում ապահովել, դատարանը որոշեց այլ անձանց՝ մեկ այլ գործով մեղադրյալ Հրաչյա Մայիլյանին և ևս մեկ վկայի ծանուցել:

Աղբյուր` Փաստինֆո