Փաստ ինֆո

Դանիայի հավաքականի գլխավոր մարզիչ Ագե Հարեյդեն ԱԱ-2018-ի ընտրական փուլի` Հայաստանի հետ Երևանում անցկացնելիք խաղից առաջ պատասխանել է լրագրողների հարցերին: Ի դեպ, նախախաղային մամուլի ասուլիսին բավականին մեծ թիվ էին կազմում հենց Դանիայից ժամանած լրագրողները:

Հանդիպումը տեղի կունենա վաղը` սեպտեմբերի 4-ին, Վ. Սարգսյանի անվան «Հանրապետական» մարզադաշտում և կմեկնարկի ժամը 20:00-ին.

«Լեհաստանի նկատմամբ տոնած հաղթանակից հետո տրամադրությունը բարձր է: Եթե կարողանանք շարունակել այսպես, հավատում ենք, որ կարող ենք որակավորվել Աշխարհի առաջնությանը:

- Արդյոք բոլոր ֆուտբոլիստները պատրա՞ստ են վաղվա խաղին:

- Այո, բոլոր 23 ֆուտբոլիստները լավ մարզավիճակում են, խնդիրներ չունենք կազմի հետ կապված:

Ունենք խաղացողներ, որոնք բավականին թարմ են, քանի որ նրանք չեն մասնակցել Լեհաստանի հետ խաղին: Այսօրվա մարզումից հետո կտեսնենք, թե ովքեր կխաղան վաղը:

- Դիտե՞լ եք Հայաստանի հավաքականի մասնակցությամբ վերջին խաղերը և կառանձնացնե՞ք մեր ընտրանու ուժեղ կողմերը:

- Կարծում եմ՝ Դանիայում կայացած խաղում մենք առավելություն ունեինք, տիրում էինք նախաձեռնությանը: Հայերը տեխնիկապես լավ զարգացած են, արագ, տանը նրանք ուժեղ են: Կառանձնացնեմ Հենրիխ Մխիթարյանին, որը հիանալի ֆուտբոլիստ է, և իր բարձր կարգն ապացուցել է Գերմանիայում և Անգլիայում:

- Հայաստանի հավաքականի կազմում կան նաև նոր խաղացողներ: Արդյոք ուսումնասիրե՞լ եք նրանց և ինչպե՞ս եք պատրաստվում գործել նրանց դեմ:

- Շնորհակալ եմ հարցի համար, բայց չեմ կարող բացահայտել մեր ծրագրերը վաղվա խաղի հետ կապված:

- Արդյոք տեղյա՞կ եք, որ անգամ երկրորդ հորիզոնականը զբաղեցնելով՝ գուցե չկարողանաք որակավորվել աշխարհի առաջնությանը:

- Իհարկե տեղյակ եմ: Տարբերությունն այն է, որ մենք արդեն խաղացել ենք Ղազախստանի հավաքականի հետ, իսկ մյուս թիմերը, որոնք ցանկանում են երկրորդ տեղը զբաղեցնել, դեռ պետք է խաղան ղազախների հետ: Սա կարող է փոխել իրավիճակը:

- Լեհաստանի հետ խաղում դանիացիները շատ էներգիա ծախսեցին, Հայաստանում էլ բավականին շոգ է: Հասցրե՞լ եք վերականգնվել և պատրա՞ստ եք արդյոք եղանակային պայմաններին:

- Շոգ եղանակն իրոք խնդիր է, բայց չեմ կարծում, որ դա մեծ խնդիր կլինի, քանի որ երեկոյան 18:00-ից հետո բավականին մեղմանում է շոգը: Ինձ համար այս պահին այնքան կարևոր չէ թիմի ֆիզիկական վիճակը, որքան՝ հոգեբանականը; Պետք է նույն մոտեցումը ցույց տանք ինչ լեհերի հետ խաղում և տրամադրվենք 100 տոկոսով: Վաղվա խաղում ևս պետք է պայքարենք մինչև վերջ՝ հաղթանակի համար:

- Նիկոլաս Բենդտներին հրավիրվել եք հավաքական: Հնարավո՞ր է՝ վաղը նրան տեսնենք խաղադաշտում:

- Իհարկե, հնարավոր է; Լեհերի հետ խաղում նա խաղաց վերջին 15 րոպեն: Մենք լավ խաղացողներ ունենք ու Բենդտները նրանցից մեկն է: Այնպես որ կարող ենք նրան տեսնել խաղադաշտում:

Աղբյուր` Փաստինֆո