Փաստ ինֆո

Սա, թերևս ծնողներին առավել անհանգստացնող հարցերից է:
Նախ պետք է հիշել, որ ջերմությունն օրգանիզմի պատասխան ռեակցիան է պատվաստման կամ վարակի նկատմամբ: Այն պաշտպանական ռեակցիա է, ջերմության բարձրացման դեպքում օրգանիզմում արտադրվում են պաշտպանիչ գործոններ:

Ե՞րբ և ինչպե՞ս իջեցնել ջերմությունը

Ջերմությունը հարկավոր է իջեցնել, եթե այն 38,5 °C և բարձր է:
Ջերմիջեցնող դեղորայքը նշանակվում է բժշկի կողմից՝ երեխայի քաշին կամ տարիքին համապատասխան դեղաչափով:

Ջերմությունն իջեցնելու համար դուք կարող եք ձեռնարկել որոշակի միջոցառումներ.

- Երեխային հաճախ կերակրեք, տվեք հեղուկներ, եթե երեխան ավելի մեծ տարիքի է:
- Թեթև հագցրեք, մի ծածկեք և մի փաթաթեք:
- Երեխային տվեք ջերմիջեցնող կամ ցավազրկող՝ ըստ երեխայի քաշի կամ բժշկի խորհրդի:
- Մեկ ժամ անց նորից չափեք ջերմությունը:
- Հարցերի դեպքում զանգահարեք բժշկին:

ՉԻ ԿԱՐԵԼԻ՝

Ջերմող երեխայի մարմնին հպել սառը իրեր: Դա կնպաստի մաշկի անոթների սպազմին: Երեխայի մաշկի ջերմության իջեցումը վտանգավոր է, քանի որ այն կբերի ներքին օրգանների ջերմաստիճանի բարձրացմանը:
Մարմինը շփել սպիրտով կամ քացախով, քանի որ նշված նյութերը կարող են ներծծվել մաշկի միջոցով՝ առաջացնելով թունավորում:
Եթե ձեր երեխայի մաշկը բարձր ջերմության ժամանակ վարդագույն է և խոնավ, կարող եք լինել համեմատաբար հանգիստ, քանի որ դա վկայում է, որ չեն խախտվել ջերմարտադրության և ջերմատվության գործընթացները:
Եթե բարձր ջերմության ժամանակ մաշկը գունատ է, ձեռքերն ու ոտքերը սառը, իսկ երեխան դողում է, դա վկայում է անոթների սպազմի մասին:
Այսպիսի դեպքերում բացառել բոլոր ֆիզիկական հովացնող մեթոդները՝ սառը ցնցուղ, սառը սավանով փաթաթելը և այլն: Անհրաժեշտ է անհապաղ դիմել բժշկի:

Doctors.am
Հիվանդությունների վերահսկման և կանխարգելման ազգային կենտրոն

Աղբյուր` doctors.am