Փաստ ինֆո

Մոսկվայի «Արարատ»-ի փոխնախագահ Անդրանիկ Քերոբյանը պատմել է, որ փախուստի դիմած նախագահ Վալերի Հովհաննիսյանը գողացել էր բաժնետերերի գումարները, բայց ակումբի բյուջեն արդեն վերականգնվել է.

Ավելի վաղ, armsport.am-ի տեղեկացմամբ, հայտնվել էր, որ Վալերի Հովհաննիսյանն ակումբի հաշվից 20 մլն ռուբլի գումար է փոխանցել իր հաշվին և առողջական խնդիրների պատճառաբանմամբ` հեռացել «Արարատից».

«Հովհաննիսյանը հաշվից հանել էր բաժնետերերի գումարները: Ցանկացած ստուգում հեշտորեն կապացուցի, որ նա ոչ մի ռուբլի չի ներդրել ակումբում:

Բաժնետերերն արդեն փոխհատուցել են գողացված բոլոր գումարները: Բյուջեն Հովհաննիսյանի փախուստից 3 օր անց վերականգնվել է:

Իհարկե, սա տհաճ իրավիճակ էր, բայց ակումբի գոյության վրա ոչ մի կերպ չի անդրադառնա: Նախագծին ոչ մի վտանգ չի սպառնում:

Թիմը, բնական է, սթրես ապրեց, բայց շատ արագ ամեն ինչ աշխատանքային հունի մեջ ընկավ: Մենք համախմբված կոլեկտիվ ունենք, բոլորը պատրաստ են կռվել մեկը մյուսի համար և անել հնարավոր ամեն բան` թիմի առջև դրված խնդիրները լուծելու համար:

Ավելին, որքանով` ես եմ տեղյակ, բոլոր ֆուտբոլիստներն առանց ղեկավարության և մարզչական շտաբի ներկայության, ժողով են անցկացրել և իրենք իրենց համար որոշել են, որ ոչինչ իրենց չի կանգնեցնի` թիմի առջև դրված խնդիրը լուծելու համար. այն է` ՖԱԼ-ի ուղեգիր նվաճելը»,- Քերոբյանի խոսքերն է փոխանցում «Матч ТВ»-ն:

Նշենք` Ռուսաստանի երկրորդ դիվիզիոնի առաջնության 6 տուրից հետո «Արարատը» գլխավորում է «Կենտրոն» գոտու մրցաշարային աղյուսակը: 

Ռուսաստանի Գավաթի խաղարկության 1/16 եզրափակչում Ալեքսանդր Գրիգորյանի թիմը կխաղա «ԲՄԱ-Խաբարովսկի» հետ:

Աղբյուր` Փաստինֆո