Փաստ ինֆո

Սեպտեմբերի 1-ին Շուշի քաղաքի նախկին ռեալական ուսումնարանի տարածքում ՀՀ Նախագահի տիկին Ռիտա Սարգսյանի բարձր հովանու ներքո կայացել է Հարո Ստեփանյանի «Սասունցի Դավիթ» օպերայի առաջնախաղը:

«Արցախպրես»-ի թղթակցի հետ զրույցում նախագծի հեղինակ և գեղարվեստական ղեկավար Սարինե Ավթանդիլյանն ասել է, որ Արցախի երաժշտական տարեգրության մեջ դարձյալ մի նոր էջ է բացվում: «Խորությամբ արծարծելով ժողովրդական ու դասական երաժշտության ավադույթները, անընդմեջ հղկելով ու կատարելագործելով սեփական վարպետությունը՝ Հարո Ստեփանյանն իր ստեղծագործական ու երաժշտական-հասարակական բեղմնավոր գործունեությամբ նշանակալի ներդրում ունեցավ հայ երաժշտական արվեստի զարգացման գործում»,- ասել է Ս. Ավթանդիլյանը և ավելացրել, որ Հ. Ստեփանյանի երգչախմբային ու նվագախմբային երաժշտության ձեռագիրը միշտ տարբերվել է բազմաձայնության մշակման իր վարպետությամբ, բներանգի նրբությամբ ու ներդաշնակության հարստությամբ: 

Նա ներկայացրել է, որ օպերայի հիմքում ընկած է էպոսի երրորդ ճյուղը, որը կապված է հենց Դավթի կյանքի ու սխրանքների հետ, և որ օպերայում Հարո Ստեփանյանը հասել է երաժշտական-բեմական գործողության առավել հանդարտ, էպիկակական-պատմողական բնույթի կերտմանը, իրադարձությունների, հերոսների, կենսական բախումների պատկերմանը պատմական հեռանկարում:

Նախագծի ռեժիսոր Արմեն Փիրի Մասիհին էլ նշել է, որ օպերայի բեմադրման հիմնական նպատակն է ցույց տալ այն, որ հայի հաղթական ոգին կա. առաջնախաղում դա պատկերվել է Դավթի վեհ գաղափարների միջոցով: 

Օպերայի առաջնախաղին ներկա էր նաև Հարո Ստեփանյանի թոռը՝ Կարինե Ստեփանյանը, ով մասնավորապես նշել է, որ շատ շնորհակալ է բոլորից՝ իր պապի գրած ստեղծագործությունը հիշելու ու այն մասսայական գեղեցիկ տեսարաններովներկայացնելու համար:

Ներկայացմանը ներկա էին Հայաստանի և Արցախի Հանրապետությունների նախագահներ Սերժ Սարգսյանը և Բակո Սահակյանը, ԱՀ երկրորդ նախագահ Արկադի Ղուկասյանը, Հայ առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ԼՂՀ ԱԺ նախագահ Աշոտ Ղուլյանը, վարչապետ Արայիկ Հարությունյանը, Արցախի և Հայաստանի բարձրաստիճան պաշտոնյաներ, ներկայացուցիչներ սփյուռքից և հյուրեր արտերկրից:

Նշենք, որ օպերայի առաջնախաղը նվիրվել է Արցախի անկախության 26-ամյակին, Հարո Ստեփանյանի ծննդյան 120-ամյակին, Շուշիի ազատագրման 25-ամյակին և Դերենիկ Դեմիրճյանի ծննդյան 140-ամյակին:

Աղբյուր` Փաստինֆո