Փաստ ինֆո

Երևանի Կենտրոն և Նորք-Մարաշ վարչական շրջանների դատարանը՝ դատավոր Մնացական Մարտիրոսյանի նախագահությամբ, ամբաստանյալ Արտակ Հովհաննիսյանին մեղավոր է ճանաչել ՀՀ քրեական օրենսգրքի 104-րդ հոդվածի 1-ին մասով՝ սպանությունը, և դատապարտել 12 տարվա ազատազրկման:

Դատարանը հիմնավորված է համարել, որ ամբաստանյալ Արտակ Հովհաննիսյանը 2016թ. սեպտեմբերի 18-ին, ժամը 21։00-ի սահմաններում այցելել է իր ծանոթի տուն և մասնակցել նրա որդու ժամկետային զինվորական ծառայությունից կարճաժամկետ արձակուրդ վերադառնալու առթիվ կազմակերպված խնջույքին:

Ժամը 23։00-ի սահմաններում, խնջույքի ընթացքում Արտակ Հովհաննիսյանը և նույն խնջույքի մասնակից, գործով տուժող Հ. Գալստյանը հանգիստ զրուցելով դուրս են եկել Վ. Դավթյանի տնից և փողոցն անցնելով` գնացել «Արամյանց» բժշկական կենտրոնի բակ։ Այդտեղ Ա. Հովհաննիսյանի և Հարութ Գալստյանի (Կոնդի Հարութ) միջև վիճաբանություն, այնուհետև` փոխադարձ քաշքշուկ և ծեծկռտուք է սկսվել, ինչի ընթացքում Հ. Գալստյանը մի քանի անգամ բռունցքով հարվածել է Ա. Հովհաննիսյանի գլխին։ Դրանից հետո Ա. Հովհաննիսյանն իր գրպանից հանելով դանակը` դրանով արվածել է Հ. Գալստյանի կրծքավանդակի ձախ հատվածին և դիմել է փախուստի։

Նոր մանրամասներ՝ Կոնդի Հարութի սպանության գործով

Այդ հարվածի հետևանքով տուժող Հ. Գալստյանին պատճառվել է կրծքավանդակի ձախ կեսի առաջային մակերեսի ծակած-կտրած թափանցող վիրավորում, ձախից` կողոսկրի մասնակի վնասում, սրտապարկի, սրտի ձախ փորոքի միջանցիկ վնասումներ` առաջ բերելով հեմոռագիկ և տրավմատիկ շոկ։ Այդ վնասվածքների հետևանքով տուժող Հ. Գալստյանը շուրջ քառասուն րոպե անց հիվանդանոցում մահացել է, այսինքն՝ Ա. Հովհաննիսյանն ապօրինաբար Հ. Գալստյանին դիտավորությամբ զրկել է կյանքից։

Դատարանը գտել է, որ Ա. Հովհաննիսյանի` վերոհիշյալ մեղադրանքը հիմնավորող նախաքննական ցուցմունքները` իր մոտ պահվող դանակով Հ. Գալստյանին հարվածելու և դրանից հետո փախուստի դիմելու մասին, արժանահավատ են, հաստատվում են քրեական գործի քննությամբ ձեռք բերված և հետազոտված ապացույցների համակցությամբ, իսկ ամբաստանյալ Ա. Հովհաննիսյանի ցուցմունքները` Հ. Գալստյանին սպանելու դիտավորություն չունենալու, ինչպես նաև առաջադրված մեղադրանքն այլ պատճառաբանություններով հերքելու վերաբերյալ` իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում:

Դատարանը գտել է նաև, որ ամբաստանյալ Ա. Հովհաննիսյանի կողմից նրա մեղավորությամբ սպանություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 104-րդ հոդվածի 1-ին մասով նախատեսված հանցագործության հատկանիշներին։

Դատարանը պատիժ նշանակելիս հաշվի է առել, որ ամբաստանյալը մեկական անգամ դատապարտվել է Հայաստանի Հանրապետության տարածքից դուրս կատարած, միջին ծանրության և առանձնապես ծանր հանցագործությունների համար և կրկին Հայաստանի Հանրապետության տարածքում առանձնապես ծանր հանցագործություն է կատարել։

Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առել ամբաստանյալին վերագրվող արարքը տուժողի հակաօրինական վարքագծով պայմանավորված լինելը, իսկ որպես նրա պատասխանատվությունը և պատիժը ծանրացնող հանգամանքներ դատարանը հաշվի է առել հանցանք կատարելու առանձնապես վտանգավոր ռեցիդիվը և հանցանքն ալկոհոլի ազդեցության տակ կատարելը։

Աղբյուր` Փաստինֆո