Փաստ ինֆո

Հանցավոր համագործակցության կամ Մարաշի զինված խմբի վերաբերյալ գործով այսօրվա դատական նիստում գործից անջատված մասով մեղադրյալ Լիլիթ Թորոսյանը հրաժարվեց ցուցմունքներ տալուց ու դատավարության մասնակիցների հարցերին պատասխանելուց: 

 Գործով ամբաստանյալ,  ՀՀ նախկին փոխվարչապետ և պաշտպանության նախկին փոխնախարար Վահան Շիրխանյանի պաշտպան Հայկ Ալումյանն առարկեց մեղադրյալի նախաքննական ցուցմունքները հրապարակելու մեղադրողի միջնորդության դեմ: Նա նշեց, որ մեղադրյալ,  «Ռադիո Մարիամ» մշակութային հիմնադրամի լրագրող Լիլիթ Թորոսյանը համագործակցել է ԱԱԾ-ի հետ, կատարել վերջինիս հանձնարարությունը: Ըստ պաշտպանի,  Լ.Թորոսյանի  ցուցմունքները դրվել են իր պաշտպանյալի մեղադրանքի հիմքում և նախաքննական ցուցմունքների հետազոտման դեպքում դրանք կարող են դրվել նաև դատավճռի հիմքում: Ուստի այդ պայմաններում  կխախտվի  իր պաշտպանյալի հակընդդեմ հարցման իրավունքը, որը երաշխավորված է Մարդու իրավուքների եվրոպական կոնվենցիայով:

 Այդուհանդերձ, դատարանում հրապարակվեցին մեղադրյալի նախաքննական ցուցմունքները, որոնցում նա հայտնել էր, որ ինքը որպես լրագրող Քեսաբի դեպքերի հետ կապված ճանաչել է Արթուր Վարդանյանին (ըստ մեղադրական  եզրակացության, նա ստեղծել ու ղեկավարել է հանցավոր համագործակցությունը):  

Լ.Թորոսյանը հայտնել է, որ Արթուր Վարդանյանը չի ասել, որ հանցավոր համագործակցություն է ստեղծվելու և որ ինքը ներգրավված չի եղել նրա ծրագրերի իրականացմանը:  Ըստ մեղադրյալի, ինքը ձայնագրել է Արթուր Վարդանյանի և Վահան Շիրխանյանի, ինչպես նաև Արթուր Վարդանյանի ու Պարգև Սրբազանի խոսակցությունները: Արթուր Վարդանյանը զգուշացրել է իրեն, որ երբևէ ոչ ոքի չասի այդ ձայնագրությունների մասին,  ավելացնելով՝ «իմ մարդիկ ամենուր են»:

Ըստ Լ.Թորոսյանի նախաքննական ցուցմունքի, Վահան Շիրխանյանը խոստացել է կազմակերպել Սեյրան Օհանյանի և Արթուր Վարդանյանի հանդիպումը, խորհուրդներ է տվել, թե ինչպես պետք է հեղաշրջում կատարել: 

Հրապարակման ավարտից հետո Արթուր Վարդանյանը հայտարարեց, որ մեղադրյալը ուղղորդված ցուցմունք է տվել: Դրանցում հակասություններ կան՝ մի դեպքում նա ասում է, որ Արթուր Վարդանյանի ու Վահան Շիրխանյանի խոսակցությունը գաղտնի է ձայնագրել, մյուս դեպքում հակառակն է ասում: Ամբաստանյալը հայտարարեց, որ Վահան Շիրխանյանի հետ խոսել են միայն Հայաստանի վիճակից, Վ.Շիրխանյանի մասնակցության մասին ոչինչ չի եղել:

 Վահան Շիրխանյանն իր հերթին արձագանքեց, որ դատաքննություն այլևս չկա, ձևական է, կիսատ, եթե ինքը հնարավորություն չունի իր դեմ ցուցմունքներ տված անձից իր հարցերի պատասխանը ստանալ:

 Անջատված մասով հաջորդ մեղադրյալը՝  ազատամարտիկ Կարեն Խաչատրյանը, նույնպես հրաժարվեց ցուցմունքներ տալ, սակայն պատասխանեց դատավարության մասնակիցների հարցերին:

 Մեղադրյալը  մասնակցել է ճաշին, որը Մարաշի տանը (որտեղ հետագայում վնասազերծվել էր զինված խումբը)  կազմակերպել էին զոհված ազատամարտիկների զավակները: Զենք ձեռք բերելու առաջարկներ եղե՞լ են հարցին վկան պատասխանեց՝  ընդամենը մեկ ժամ է եղել այդ տանը, որից կես ժամը զուգարանում է եղել՝ երեք անգամ տասը րոպեով զուգարան է գնացել: Իսկ իշխանափոխության ծրագրերի մասին վկան իմացել է հեռուստացույցից, անգամ խցում մարդիկ ասում էին՝ ի՞նչ մասնակից ես, որ հեռուստացույցից ես իմանում:

 Եթե մի հանցավոր խմբի մեջ են եղել, կարո՞ղ էին այդ մասին չիմանալ, ինքն իրեն հարց տվեց անջատված մասով հաջորդ մեղադրյալը՝  Աղասի Մարտիրոսյանը:  Նա հայտնեց, որ քննիչին էլ է հայտնել, որ անտրամաբանական է «Մուխա» տիպի նռնականետով  Նախագահի ինքնաթիռ խոցելու վարկածը՝ Մուխան 250 մ-ից հեռու չի խփում: Հաշվարկելով  գործում առկա զենքի քանակը, վկան նշեց, որ ստացվում է՝ նախագահական ութ հոգով էին մտնելու, որոնցից  չորս հոգին  էր  զինված լինելու:

 Իշխանափոխության վերաբերյալ վկան նշեց, որ իշխանափոխությունն առօրյա թեմա է՝ ամեն օր առաջարկվում  է և մասսայական կերպով: Կոնկրետ առաջարկ եղե՞լ է հարցին վկան պատասխանեց, որ չի հիշում:

 Դատաքննական ու նախաքննական ցուցմունքների միջև էական հակասությունների պատճառով հրապարակվեցին  Ա.Մարտիրոսյանի նախաքննական ցուցմունքները: Մասնավորապես, ըստ դրանց, Արթուր Վարդանյանն ասում էր, որ հեղաշրջումը հնարավոր է կատարել միայն ուժային մեթոդով:  Աղասի Մարտիրոսյանը ասել է իր մարտական ընկերոջը՝ գործով ամբաստանյալ Էդվարդ Ներսիսյանին, որ հիմարություն է, խնդրել է հեռու մնալ նրանցից:

 Կոնկրետ ով ինչ պետք է աներ հարցին որպես մեղադրյալ հարցաքննվելիս Ա.Մարտիրոսյանը հայտնել է, որ նման բան չի խոսվել Մարաշում հանդիպմանը:  Արթուր Վարդանյանն, ըստ ցուցմունքի, ասել է՝ զենքի հարցը լուծված է, ի՞նչ պետք է անեմ հարցին Արթուր Վարդանյանն ասել է՝ ժամանակը կգա,  կիմանաս:    

 Ա.Մարտիրոսյանը դատարանում հայտարարեց, որ  իր նկատմամբ ֆիզիկական ուժ չի կիրառվել, սակայն հոգեպես ճնշվել է,  ԱԱԾ պետի տեղակալն, ըստ նրա, ասել է՝ գրում ես, եթե չես գրում, ու հետևել է հայհոյանքը: Նախագահող դատավոր  Արմեն Բեկթաշյանը  հարցրեց՝ հանցագործության մասին հաղորդո՞ւմ եք տալիս, վկան պատասխանեց, որ չի կարող ապացուցել:

 Անջատված մասով մեկ այլ մեղադրյալ  Հովհաննես Բալաբանյանն ասաց, որ Էդվարդ Ներսիսյանի հետ պատահական է ծանոթացել Սողոմոն Քոչարյանի հուղարկավորությանը: Նա այդ ժամանակ աշխատանք չուներ, նոր էր եկել Ռուսաստանից, երկու անգամ եղել է Մարաշի տանը, որտեղ  ջերմ  ընտանեկան մթնոլորտ էր:  Այնտեղ զենք, որևէ արտասովոր բան չի տեսել:

 Դատարանում հրապարակվեցին նրա նախաքննական ցուցմունքները, ըստ դրանց Արթուրը հարցրել է իրեն ծառայե՞լ է բանակում, զենքին տիրապետո՞ւմ է, թե՞ ոչ:

 Նախաքննական ցուցմունքում Բալաբանյանը նշել է, որ տեղյակ չի եղել Արթուր Վարդանյանի հանցավոր ծրագերի մասին: Արթուրը հարցրել է՝ ինքնաթիռն իրենց տան վրայով է անցնում: Բալաբանյանը միաժամանակ նշել է, որ Նախագահի ինքնաթիռը խփելու մասին խոսակցություն ընդհանրապես չի եղել:

Անջատված մասով մեղադրյալ Սրբուհի Այվազյանը հրաժարվեց ցուցմունքներ տալուց ու հարցերին պատասխանելուց: Նախաքննական ցուցմունքներում նա  հայտնել էր, որ Արթուր Վարդանյանի հետ ծանոթացել է Ֆեյսբուքի միջոցով. նա իր հոր գիրքը վաճառելու համար ծանոթանում էր հայրենասիրական թեմաներով գրառումներ ներառող էջերին, այդպես է ծանոթացել Արթուր Վարդանյանի էջին, ունեցել անձնական շփումներ նրա հետ, համակրանք տածել, սակայն շատ ավելի ուշ իմացել է, որ Արթուր Վարդանյանը ամուսնացած է, ունի ընտանիք:

Նենգ ու դավադիր նպատակներ չի ունեցել, ոչ Արթուր Վարդանյանը և ոչ էլ ուրիշ մեկը չի ասել, որ պետք է հեղաշրջում կատարեն,   նշել է Ս.Այվազյանը նախաքննության ժամանակ: 

 Մեղադրյալը հայտնել է, որ երբ գնացել են Սպիտակ, այնտեղ զենք տեսել է, սակայն մտածել է, որ Քեսաբի հետ է կապված: Սպիտակում զենքով, համազգեստով ու դիմակով նկարվել է՝ անտեղյակ՝ ի տարբերություն մյուսների, ովքեր տեղյակ էին ինչի համար է դա  արվում:

Ամբաստանյալ Մարինե Կաթանյանը  անջատված մասով մեղադրյալին հարցրեց՝ ինչո՞ւ եք որոշել, որ մնացածը քաջատեղյակ էին այն դեպքում, երբ նրանք Արթուրին մեկ ամիս են ճանաչել, իսկ Դուք՝ 4 տարի: Անկախ դատավճռից, վաղը,  մյուս օրը ապրել  կա, իրար երես նայել կա, ասաց ամբաստանյալը:  Իսկ նրա պաշտպան Ինեսսա Պետրոսյանն իր հերթին հարցրեց, Դուք ասացիք, որ համակրել եք Արթուր Վարդանյանին, հայտնի է, որ գործով այլ կանայք որոշակի հարաբերություններ են ունեցել Արթուր Վարդանյանի հետ, հնարավո՞ր է, որ խանդի հողի վրա եք այդ ցուցմունքները տվել: Հարցերն անպատասխան մնացին:

 Մինչ մեղադրյալի կարգավիճակով վկաների հարցաքննությունը դատարանը մերժեց  Վահան Շիրխանյանի պաշտպան Հայկ Ալումյանի երկու միջնորդությունն  էլ՝ ԶԼՄ ներկայացուցիչների հետ տեսակցության արգելքը վերացնելու և Վ.Շիրխանյանի խափանման միջոց կալանավորումը փոփոխելու կամ գրավի կիրառումը թույլատրելի ճանաչելու մասին:

Դատական նիստի ժամանակ ամբաստանյալ Արթուր Վարդանյանը յուրօրինակ կերպ արձագանքեց իր մերձավորների հետ տեսակցությունների ու հեռախոսային խոսակցությունների արգելքը վերացնելու միջնորդությունը մերժելու դատարանի որոշմանը ՝ նա պատռեց դատարանի որոշումը:

Ի դեպ, Ա.Վարդանյանը միակ ամբաստանյալն է, ում նկատմամբ պահպանվում է մերձավորների հետ տեսակցությունների ու հեռախոսային խոսակցությունների արգելքը:   

Աղբյուր` Փաստինֆո