Փաստ ինֆո

Ժիրայր Սեֆիլյանի և մյուսների գործով այսօրվա դատական նիստը Վարդգես Գասպարիի կողմից փորձ արվեց տապալելու: Վերջինս, դահլիճում գտնվելով, ոտքի կանգնեց և բղավեց, որ չի ցանկանում հանրային պաշտպան Մարինե Թովմասյանն իր շահերը ներկայացնի, ապա փաստաբանին հանցագործ անվանեց, իսկ մինչ այդ փաստաբանի հասցեին անպարկեշտ արտահայտություններ էր հնչեցրել:

Հատկանշական է, որ Գասպարին այս գործով որևէ կարգավիճակ չունի, դատավարության մասնակից չի հանդիսանում, սակայն դատական նիստերը տապալելու նրա փորձերը պետք է, որ առաջնահերթ կալանքի տակ գտնվող ամբաստանյալներին մտահոգեր:

Ի վերջո, հնարավոր եղավ Գասպարիին հանդարտեցնել միայն՝ նրա ոտքերից ձեռքերից բռնած վիճակում դահլիճից դուրս բերելով:

Հիշեցնենք, որ հանրային պաշտպանը գործին ներգրավվել է դատարանի կողմից, որպեսզի իրականացնի ամբաստանյալ Ժիրայր Սեֆիլյանի և Ներսես Պողոսյանի շահերը:

Սակայն Սեֆիլյանը հրաժարվել է քրեակատարողական հիմնարկում տեսակցություն ունենալ հանրային պաշտպանի հետ, իսկ գործով մյուս ամբաստանյալը տեսակցել է, սակայն չի ցանկացել, որ իր շահերը հանրային պաշտպան ներկայացնի:

Նշենք, որ այս ողջ իրարանցումը ստեղծվեց այն բանից հետո, երբ Սեֆիլյանի և Ներսիսյանի պաշտպանները հայտարարեցին, որ այն պայմաններում, երբ իրենց պաշտպանյալների նկատմամբ դատական սանկցիա է կիրառված, և նրանք դատարանի դահլիճում չեն գտնվում, իրենց պաշտպանյալների հորդորով իրենք ևս դահլիճում չեն կարող գտնվել:

Նշենք նաև, որ այսօր գործով դատական նիստին չէր ներկայացել ամբաստանյալ Հրայր Թոփչյանի պաշտպան Գեորգի Մելիքյան, սակայն պաշտպանը դատարանին գրավոր տեղեկացրել էր, որ հանրապետությունում չի գտնվում և իր բացակայության ողջ ընթացքում Թոփչյանի շահերը դատարանում կներկայացնի փաստաբան Վահագն Մարտիրոսյանը, ով նախաքննության փուլում ներգրավված է եղել և ծանոթ է գործի նյութերին:

Բայց քանի որ այլ փաստաբան ևս բացակայում էր, ուստի դատարանը հետաձգեց դատական նիստը:

Գասպարիի պիկետը դատական նիստերի դահլիճից տեղափոխվեց դատարանի բակ, որտեղ, սովորույթի համաձայն, նա պառկեց, իսկ մի քանի կանայք փակել էին փաստաբան Մարինե Թովմասյանի ավտոմեքենայի ճանապարհը և նրա հասցեին անվայել արտահայտություններ էին հնչեցնում:

Աղբյուր` Փաստինֆո