Փաստ ինֆո

Օֆշորի աղմկահարույց գործով ամբաստանյալ Աշոտ Սուքիասյանի պաշտպան Յուրիկ Խաչատրյանն այսօր իր պաշտպանական ճառում միջնորդեց քրեական գործը կարճել՝ հանցադեպի բացակայության հիմքով, իսկ քաղաքացիական հայցերը մերժել անհիմն լինելու պատճառաբանությամբ:
Ճառում, որի հրապարակումը տևեց հինգ ժամ, պաշտպանը հերքեց ՀՀ քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերով հանցավոր ճանապարհով ստացված եկամուտներն օրինականացնելը (փողերի լվացումը), 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և 205-րդ հոդվածի 2-րդ մասով՝ առանձնապես խոշոր չափերով հարկերը վճարելուց չարամտորեն խուսափելը, իր պաշտպանյալին առաջադրված մեղադրանքը՝ որակելով այն որպես անհիմն:

Ըստ պաշտպանի, նախաքննական մարմինը առաջնահերթություն է տվել «անհիմն կերպով տուժող ճանաչված» Փայլակ Հայրապետյանի իրարամերժ ու հակասական ցուցմունքներին, ընտրողաբար ապացույցներ ընտրել, չի անցկացրել բազմակողմանի ու օբյեկտիվ քննություն:

Ըստ պաշտպանական կողմի, դատարանն էլ՝ դատաքննության ավելի ուշ փուլերում նախատրամադրված է եղել մեղադրանքի կողմից գործելու, մասնավորապես, մերժել է պաշտպանական կողմի միջնորդությունները: Այդուհանդերձ, պաշտպանը հույս հայտնեց, որ դատարանն ի զորու կլինի կայացնել արդարադատության բարձր չափանիշներին հարիր օբյեկտիվ և հիմնավորված դատական ակտ:

«Փաստինֆո»-ի լրագրողի հետ զրույցում Յուրի Խաչատրյանը հայտարարեց, որ Աշոտ Սուքիասյանը հանցագործ չէ, նրան քրեադատավարական առումով չպետք է մեղադրանք առաջադրվեր և այս ուղղությամբ չպետք է քննվեր: Պաշտպանը նշեց, որ խնդիրն առնչվում է քաղաքացիաիրավական հարաբերություններին:

Յուրիկ Խաչատրյանը, ինչպես և իր ճառում, նշեց, որ ըստ Վճռաբեկ դատարանի նախադեպային որոշման, եթե կողմերի միջև քաղաքացիական օրենսդրության համապատասխան պայմանագիր չի կնքվում և կողմերից մեկը տուժում է, «քանի որ նա խաթարում է քաղաքացիական օրենսդրության պահանջները և բնականաբար նպատակ է ունենում հարկային պարտավորություններից խուսափել», պետությունը պարտավոր չի այդ մասնավոր շահի պաշտպանությունը ստանձնել ու միջոցներ ծախսել:

Տվյալ դեպքում, ըստ պաշտպանի, Փայլակ Հայրապետյանը խախտել է քաղաքացիական օրենսդրությամբ սահմանված պահանջը՝ պայմանագիր չի կնքել, որի նպատակն է եղել հարկային պարտավորություններից խուսափելը:
Իսկ Աշոտ Սուքիասյանը կայացած գործարար էր, և որևէ հիմք ու կարիք չուներ գումարներ հափշտակելու, ասաց պաշտպանը՝ հավելելով, որ Աշոտ Սուքիասյանը սնանկացել է: «Այդքանից հետո ասել, որ Աշոտ Սուքիասյանը մտել էր այդ գործողության մեջ, որ տիրանար Փայլակ Հայրապետյանի գույքին, դրա հիմքում ոչ մի ապացույց, առողջ միտք չի կարող լինել»,- ասաց Յուրիկ Խաչատրյանը:

Հաջորդ դատական նիստում պաշտպանական ճառով հանդես կգա Աշոտ Սուքիասյանը:
Հիշեցնենք, որ մեղադրող Դավիթ Վեքիլյանն իր մեղադրական ճառում պնդել է մեղադրանքն ողջ ծավալով և միջնորդել ամբաստանյալ Աշոտ Սուքիասյանին դատապարտել 15 տարվա ազատազրկման:

Աղբյուր` Փաստինֆո