Փաստ ինֆո

30-ամյա Բարբարա Էլիզաբեթ Միլլերը անհետ կորել էր Փենսիլվանիայում 1989թ.: Այդ ամբողջ ժամանակահատվածում ոստիկանությունը կնոջ սպանության մեջ կասկածել է նրա նախկին բոյֆրենդին, բայց առայսօր չի ունեցել նրա մեղքի ապացույցները: Այս մասին, ըստ life.ru-ի, հաղորդում է Daily Mail-ը:

Բարբարա Միլլերի ակտիվ որոնումներ չեն անցկացվել արդեն 17 տարի, սակայն Միլթոնի ոստիկանության նոր պետ Թիմ Միլլերը որոշել է, որ պետք է գործը մինչև վերջ հասցնի: Ոստիկանները նոր թույլտվություն են ստացել և խուզարկել են տունը, որը վարձակալել է Բարբարայի նախկին բոյֆրենդ Մայք Իգանի քույրը:

Վկաները հաստատում են, որ Բարբարայի անհետացման նախօրեին նրանք Մայքի հետ սաստիկ վիճաբանել են, և նա հիմքեր ուներ կնոջը սպանելու համար:

Տան նկուղը ոստիկաններին չափազանց կասկածելի է թվացել՝ դրա պատերը հաստ ինքնաշեն բետոնից են եղել: Նախնական փորձաքննությունը գտել է, որ բետոնը պարունակում է մանրացրած փայտի մասնիկներ: Հետաքրքրական է, որ նախկին ոստիկան Մայք Իգանը բանտից դուրս է եկել 1988թ. և այդ ժամանակից ի վեր աշխատել է որպես փայտահատ: Եվս մեկ փաստարկ ոչ հօգուտ Իգանի դարձել է ոստիկանական շների արձագանքը՝ կենդանիները մարդկային մնացորդների առկայության վերաբերյալ ազդանշան էին տալիս:

Խուզարկուները ենթադրում են, որ վեճի թունդ րոպեին Մայք Իգանը սպանել է Բարբարա Միլլերին, որից հետո նրա մարմինն անցկացրել փայտամանրացնող գործիքի միջով և խառնել մնացորդները բետոնի հետ, իսկ հետո օգտագործել է այն նկուղում: Այժմ փորձագետները պետք է ստուգեն այդ վարկածը՝ մանրազնին ուսումնասիրելով բետոնե սալիկները: Եթե սալիկի մեջ հայտնաբերվեն Բարբարա Միլլերի մնացորդները, ապա դա կլինի համարյա 30 տարի տևած քննության վերջակետը:

Աղբյուր` Փաստինֆո