Փաստ ինֆո

Ժիրայր Սեֆիլյանի և մյուսների գործով դատարանը որոշեց ամբաստանյալներ Սեֆիլյանի և Ներսես Պողոսյանի շահերի պաշտպան գործին ներգրավվել Հանրային պաշտպանի գրասենյակի փաստաբան Մարինե Թովմասյանին:

Հանրային պաշտպանի գործին ներգրավման անհրաժշտությունը բխեց այն բանից հետո, երբ նրանց պաշտպանները դատական նիստի ընթացքում լքեցին  նիստերի դահլիճը, իսկ երբ դատարանը պաշտպաններին հորդորեց չլքել՝ պաշտպաններ Արա Զաքարյանը և Նինա Կարապետյանցը  հայտարարեցին, թե իրենց պաշտպանյալներից հստակ ցուցում ունեն, որ իրենց՝ դահլիճում չգտնվելու դեպքում որևէ գործողության վերաբերյալ դիրքորոշում չհայտնեն, ուստիև  այդ պայմաններում չեն պատրաստվում մնալ դահլիճում:

Սակայն Սեֆիլյանի և Ներսիսյանի պաշտպանությունն իրականացնում են նաև այլ փաստաբաններ՝ Տիգրան Հայրապետյանը և Արայիկ Պապիկյանը,  նրանք էլ կամ չեն ներկայանում դատական նիստերին կամ էլ դատարան մուտք գործելիս զննությունը որակում են խուզարկություն, ինչի շուրջ երկար բանավեճից հետո այդպես էլ նիստերի դահլիճ չեն հասնում:

Գործով մի շարք ամբաստանյալների նկատմամբ դատական սանկցիաներ են  կիրառված և նրանք դատարանում չեն գտնվում, փաստաբաններն էլ հրաժարվում են ներկայանալ՝ դատարանը ամբաստանյալների պաշտպանության իրավունքն ապահովելու տեսանկյունից դիմել է  հանրային պաշտպանի գրասենյակին:

Հանրային պաշտպան Մարինե Թովմասյանի ներգրավվելուց հետո էլ  փաստաբանը հայտնվել է ճնշումների թիրախում. Վարդգես Գասպարին որոշել է՝ Մարինե Թովմասյանը չպետք է մասնակցի դատավարությանը, քանի որ Սեֆիլյանը և Պողոսյանը այլ պաշտպաններ ունեն, ուստիև փաստաբանի բնակության վայրում ակցիա է իրականացնում:

Այսպիսով,  նախօրեին՝ ՀՀ փաստաբանների պալատի նախագահ Արա Զոհրաբյանը հարցի առնչությամբ ֆեյսբուքում գրառում էր կատարել, որում մասնավորապես ասվում էր, որ այն ինչ կատարվում է փաստաբան Մարինե Թովմասյանի նկատմամբ (բնակության վայրում պիկետ, պատիվն արատավորող լուսանկարների տարածում), անթույլատրելի է բոլոր տեսակետներից: Չի կարելի թույլ տալ, որ փաստաբանին՝ իր մասնագիտական գործունեության կապակցությամբ ճնշման ենթարկեն և կապ չունի ճնշումը պետական մարմինների կողմից է, թե՝ հասարակության որոշ հատվածների:

«Փաստաբանության մասին» ՀՀ օրենքի 21-րդ հոդվածը սահմանում է փաստաբանի գործունեության երաշխիքներ: Ընդ որում, արգելվում է պետական մարմինների, տեղական ինքնակառավարման մարմինների, դրանց պաշտոնատար անձանց, ֆիզիկական և իրավաբանական անձանց (ներառյալ` զանգվածային լրատվության միջոցների) միջամտությունը փաստաբանական գործունեությանը:

Եվրոպայի խորհրդի Նախարարների կոմիտեի՝ «Փաստաբանի մասնագիտական գործունեության ազատության մասին» 25.10.2000թ. №Rec(2000)21 հանձնարարականի 1-ին սկզբունքի 1-ին կետի համաձայն՝ հարկավոր է ձեռնարկել բոլոր անհրաժեշտ միջոցները, որպեսզի հարգվի, պաշտպանվի և խթանվի փաստաբանի մասնագիտական գործունեության ազատությունը առանց խտրականության և իշխանությունների կամ հասարակության կողմից անիրավաչափ միջամտության, հատկապես Մարդու իրավունքների եվրոպական կոնվենցիայի համապատասխան դրույթների լույսի ներքո:

Փաստաբան Մարինե Թովմասյանի նկատմամբ ճնշման նախաձեռության հեղինակների ետևից գործող, կամ այս ճնշումներից հաճույք ստացող որոշ փաստաբաններ լավ չեն պատկերացնում, որ այս վատ նախադեպից առաջինը իրենք են տուժելու: Վաղը կարող են ձեր գործերով հակառակորդ կողմի հարազատները բողոքի ակցիաներ կազմակերպել ձեր բնակավայրերում և ձեզ վարկաբեկել, ինչը մեր մասնագիտությունը կդարձնի խոցելի:

Եթե փաստաբանն իր մասնագիտական գործունեության ընթացքում խախտում է օրենքը կամ փաստաբանի վարքագծի կանոնագրքի պահանջը, ապա դրա լուծման միակ օրինական ճանապարհը, փաստաբանների պալատին հաղորդում ներկայացնելն է:

Հ.Գ. Ի գիտություն փաստաբան Մարինե Թովմասյանի նկատմամբ ճնշումների հեղինակներին, Մարինե Թովմասյանը հղի է և սպասում է երեխայի:

Փաստաբան Արսեն Մկրտչյանը ևս իր ֆեյսբուքյան էջում գրառում է կատարել.

«Աշխարհում էլ այդպիսի տեղ չկա, որտեղ պարտված «հեղափոխականները», իրենց ռազմագերի հռչակեն ու կամավոր բանտարկության գնան, հերիք չէ դատարանին չեն հարգում, հլը մի բանել «ազատ»" ԶԼՄ-ներում պաշտպանների դեմ նյութեր են պատվիրում։ Երևույթը տհաճ է, բայց մեղք դնելու չէ։ Մարդիկ որոշ արկածախնդիր պոպուլիստների հորդորով երկրորդ անգամ ճակատագրական սխալ են գործում՝ հայերի մեջ թշնամի են փնտրում այնտեղ, որտեղ առնվազն իրենց վատը չեն ուզում։ Հարգելի ադեկվատ կոլեգաներ, հորդորում եմ ներողամիտ լինել։ Ուժեղը բարի է լինում, պարտվողը՝ չարացած» ,- գրառել է փաստաբանը։

Աղբյուր` Փաստինֆո