Փաստ ինֆո

«Ես չեմ կարող ինձ մեղավոր ճանաչել մի հանցագործության մեջ, եթե ես դա չեմ կատարել»,- այսօր այդ մասին իր վերաբերյալ գործով մեղադրական եզրակացության եզրափակիչ մասի հրապարակումից հետո հայտարարեց «Իգլայի» գործով ամբաստանյալ ՊԲ նախկին հրամանատար Սամվել Բաբայանը:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում մեղադրող դատախազ Արամյանի կողմից հրապարկվեց գործով մեղադրական եզրակացության եզրափակիչ մասը:

Սամվել Բաբայանն իր վերաբերյալ մեղադրանքի առնչությամբ հայտարարեց, որ ներկայացվածը ենթադրություններ են, խնդիր է դրված Բաբայանին ձերբակալել և դատել: Ես պատասխանատու եմ իմ ամեն արածի քայլին համար, սակայն մեղավոր չեմ ճանաչում առաջադրված մեղադրանքում, դատարանում բացատրություններ կտամ այդ մասին:

Ինչ վերաբերում է նախաքննության ընթացքում իր կողմից ցուցմունք չտալուն, ապա Բաբայանն ասաց, որ նման բան գոյություն չունի, սուտ է:

Գործով մյուս ամբաստանյալ Սանասար Գաբրիելյանն էլ առաջադրված մեղադրանքը չընդունեց, ապա նաև հրաժարվեց իր պաշտպաններից՝ գտնելով որ իրեն պաշտպան հարկավոր չէ:

Դատարանի կողմից սահմանած ապացույցների հետազոտման հաջորդականության համաձայն՝ նախ կհարցաքննվեն վկաները, ապա մեկ այլ գործով մեղադրյալ Հրաչյա Մայիլյանը, ապա նաև՝ ևս 3 վկաներ, որից հետո կհետազոտվեն գործում առկա փաստաթղթերը, փորձագիտական եզրակացությունները, և վերջում կհարցաքննվեն ամբաստանյալները:

Նշենք նաև, որ այսօր Սամվել Բաբայանի պաշտպան Քալաշյանը հանդես եկավ 3 միջնորդությամբ, մասնավորապես, դրանից առաջինը վերաբերում էր Բաբայանի գույքի վրա դրված կալանքին, պաշտպանը գտնում է, որ այն պետք է վերացնել:

Ըստ Քալաշյանի՝ Բաբայանի գույքի վրա դրված կալանքի որոշումը օրենսդրության ոչ մի պահանջից չի բխում, իրավաչափ չէ, կրում է կամայական բնույթ, ուստիև դատարանին խնդրեց 2017թ. մարտի 31-ին որոշմամբ Բաբայանի գույքի վրա դրված կալանքի որոշումը վերացնել:

Մեղադրող դատախազն առարկեց ներկայացված միջնորդությանը՝ նշելով, որ նախաքննությունն իրականացնող մարմինը օրինական որոշում է կայացրել՝ գույքի վրա կալանք դրվելու մասին, ինչը, մասնավորապես, քրեական գործով դատական ծախսերն ապահովման նպատակ ունի, մեղադրողը գտնում է, որ դրված արգելանքը ենթակա չէ վերացման:

Քալաշյանը ներկայացրեց երկրորդ միջնորդությունը՝ խնդրելով վերացնել Բաբայանի տեսակցությունների և հեռախոսային խոսակցությունների վրա դրված արգելքը:

Պաշտպանի խոսքով՝ նախաքննական մարմինը նման որոշում է կայացրել՝ գործի նախաքննության շահից ելնելով, համենայնդեպս այդպես է պատճառաբանված որոշումը, և որ Բաբայանի տեսակցություններն ու հեռախոսային խոսակցությունները կարող են խոչընդոտ հանդիսանալ՝ գործով օբյեկտիվ ճշմարտությունը բացահայտելու, սակայն նախաքննության ավարտից հետո էլ նշված սահմանափակումը չի վերացվել, իսկ եթե այդ որոշման նպատակը եղել է նախաքննության շահերից ելնելը, ապա անհասկանալի է, թե դրա ավարտից հետո ինչ շահերից ելնելով չի վերացնել:

Ըստ պաշտպանի՝ Բաբայանի նկատմամաբ նման խտրական վերաբերմունքը որևէ կերպ պատճառաբանված և արդարացված չէ և միջնորդեց վերացնել արգելանքը:

Մեղադրողը գտավ, որ ներկայացված միջնորդությունը ենթակա է մասնակի բավարարման. մասնավորապես՝ մեղադրողը չառարկեց, որպեսզի արգելանքը վերացվի՝ ընտանիքի անդամների հետ տեսակցության մասով, իսկ մնացած մասով գտավ, որ հիմնավոր է նախաքննական մարմնի որոշումը, և միջնորդությունը ենթակա է մերժման:

Հաջորդ միջնորդությունն էլ վերաբերում էր Բաբայանի կալանքին, ինչը, ըստ պաշտպանի, անհիմն է, և միջնորդեց վերացնել խափանման միջոց կալանավորման որոշումը և կիրառել չհեռանալու մասին ստորագրություն կամ այլ խափանման միջոց:

Ներկայացված երրորդ միջնորդությունը մեղադրող Արամյանն անհիմն գնահատեց և գտավ, որ այն ենթակա է մերժման. կալանքի վերացման հիմքերը բացակայում են, ինչ վերաբերում է այլընտրանքային խափանման միջոց գրավի կիրառմանն, ապա, ըստ մեղադրողի, դա չի կարող բավարար երաշխիք լինել ամբաստանյալի պատշաճ վարքագծի ապահովման համար դատաքննության ընթացքում:

Այս պահին դատարանը հեռացել է խորհրդակցական սենյակ՝ կալանքի վերացման միջնորդության վերաբերյալ որոշում կայացնելու, իսկ մյուս միջնորդություններին դատարանը կանդրադառնա խորհրդակցական սենյակից վերադառնալուց հետո:

Լուսանկարը՝ Ֆոտոլուրի

Աղբյուր` Փաստինֆո