Փաստ ինֆո

Զինծառայող Մանուչար Մանուչարյանին ինքնասպանության հասցնելու գործով մեղադրյալ Բաբկեն Գաբոյանի պաշտպան Հրանտ Անանյանը միջնորդում է իր պաշտպանյալին արդարացնել ՀՀ քրեական օրենսգրքի 358.1-րդ հոդվածի 4-րդ մասով նախատեսված արարքում՝ ապացույցների անբավարարության և հանցակազմի բացակայության հիմքով:

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում պաշտպանական ճառով հանդես գալով՝ այդ մասին ասաց փաստաբան Հրանտ Անանյանը:

Միևնույն ժամանակ պաշտպանը միջնորդում է կրկին քննարկել Գաբոյանի պաշտպանության կողմի՝ դատաքննության ընթացքում հարուցված և դատարանի կողմից հետաձգված միջնորդությունը՝ Լ.Մկրտչյանի մասով երկու դրվագ ՀՀ քրեական օրենսգրքի 360-րդ հոդվածով իրականացվող հետապնդումը դադարեցնելու մասին, որոշում կայացնել քրեական հետապնդումը դադարեցնել՝ վաղեմության ժամկետները լրանալու հիմքով՝ առանց անդրադառնալու այդ դրվագներով ամբաստանյալի մեղավորության հարցին:

Իսկ Բաբկեն Գաբոյանի կողմից Մ.Մանուչարյանին ապտակելու, հայհոյելու կամ ծաղրելու փաստերը հաստատած համարելու դեպքում վերագրվող արարքը վերաորակել ՀՀ քրեական օրենսգրքի 110-րդ և 360-րդ հոդվածներով և ՀՀ քրեական օրենսգրքի 360-րդ հոդվածով քրեական հետապնդումը դադարեցնել՝ վաղեմության ժամկետները լրանալու հիմքով, ՀՀ քրեական օրենսգրքի 110-րդ հոդվածով նշանակել պատիժ`3 տարի ժամանակով ազատազրկում, և նրան ազատ արձակել դատական նիստերի դահլիճից՝ հաշվակցելով կալանքի տակ գտնվելու ժամանակահատվածը, իսկ ավելի խիստ պատիժ նշանակելու դեպքում՝ կիրառել 2013 թ համաներման ակտը և ազատել նշանակված պատժից:

Պաշտպանը նաև միջնորդեց՝ եթե դատարանն իր կողմից ներկայացած պահանջները մերժի, ապա այդ դեպքում Գաբոյանին վերագրվող արարքը վերաորակի ՀՀ քրեական օրենսգրքի 359-րդ հոդվածով և նրա նկատմամբ նշանակի հնարավորինս մեղմ պատիժ:

Այսպիսով, պաշտպանը գտնում է, որ Գաբոյանին առաջադրված մեղադրանքը անհիմն է, քանի որ նախաքննությունն ընթացել է քրեադատավարական նորմերի անտեսմամբ, միակողմանի` մեղադրական ուղղվածությամբ, քրեական գործի նյութերի սխալ համադրման, վերլուծության, նյութական իրավունքի նորմերի կամայական մեկնաբանության և գնահատման արդյունքում նախաքննության մարմինը հանգել է անհիմն հետևությունների:

Ըստ Անանյանի՝ դատաքննության արդյունքներն ամփոփելով՝ հանգել են հետևության, որ վերոնշյալ պնդումները հիմնավորվել են, իսկ իր պաշտպանյալին առաջադրված մեղադրանքը՝ հերքվել:

Նշենք, որ Գաբոյանը առաջադրված մեղադրանքում իրեն մեղավոր չի ճանաչել:

Պաշտպանի գնահատմամբ՝ տուժող Լիբիկ Մկրտչյանի, վկաներ Արման Սահակյանի և Արթուր Աբրահամյանի ցուցմունքներն էլ չեն համապատասխանում իրականությանը, դրանք խիստ հակասական են և անարժանահավատ:

Չկա ուղղակի պատճառահետևանքային կապ Գաբոյանին վերագրվող գործողությունների և Մանուչար Մանուչարյանի ինքնասպանության միջև, և պետք է արձանագրել, որ փորձաքննության եզրակացությունների ոչ կատեգորիկ լինելը, հավանականության վրա կատարված եզրահանգումները՝ հիմք են տալիս պնդելու և շարունակում է մնալ չփարատված կասկած, որ Մանուչար Մանուչարյանի ինքնասպանությունը ինչ-որ հանգամանքների պատահական համընկման արդյունք է կամ գործով չպարզված, չքննված պատճառների հետևանք:

Հրանտ Անանյանը նաև բողոք է գրել ՀՀ Գլխավոր դատախազ Ա.Դավթյանին, զինդատախազ Վ.Հարությունյանին և Երևանի կայազորային դատախազ Ա. Անտոնյանին՝ խնդրելով հանձնարարել սույն գործով մեղադրող դատախազ Ա.Ամիրյանին դատարանում վերակազմել մեղադրական եզրակացությունը և փոփոխել իր պաշտպանյալ Գաբոյանին առաջադրված մեղադրանքը՝ նրան մեղադրանք առաջադրելով ՀՀ քրեական օրենսգրքի 110-րդ հոդվածով՝ ինքնասպանության հասցնելը, ՀՀ քրեական օրենսգրքի 360-րդ հոդվածով՝ զինծառայողին վիրավորանք հասցնելը կամ ՀՀ քրեական օրենսգրքի 375 հոդվածի 1-ին մասով՝ իշխանությունը չարաշահելը, իշխանազանցությունը կամ իշխանության անգործությունը:

Պաշտպանը նշեց, որ իր բողոքին ի պատասխան՝ Զինդատախազի տեղակալ Ա.Կրկյաշարյանից գրություն է ստացել, համաձայն որի՝ բողոքը դիտարկվել է որպես միջնորդություն և ուղարկվել դատարան այն դեպքում, երբ դատարանը մեղադրանքը փոփոխելու և նոր մեղադրանք առաջադրելու լիազորությամբ օժտված չէ: Այս մասին նշում է Անանյանը՝ հավելելով, որ Երևանի կայազորի դատախազությունից դեռ պատասխան չի ստացվել:

Ըստ մեղադրանքի՝ ՊՆ N զորամասի ավագ հետախույզ, կրտսեր սերժանտ Բաբկեն Գաբոյանը տեղ գնալու իր պահանջը չկատարելու կապակցությամբ, «սեփական անձի վարկանիշը բարձրացնելու, համածայողների շրջանում իր գերակայությունն ամրապնդելու նպատակով մեկ անգամ ապտակել է նույն զորամասի ժամկետային զինծառայող, շարքային Լիբիկ Մկրտչյանին, այդ կերպ վիրավորանք է հասցրել վերջինիս՝ անպարկեշտ ձևով ստորացնելով նրա պատիվն ու արժանապատվությունը»։

Բացի այդ, ըստ մեղադրանքի, Բ.Գաբոյանը նույն զորամասի ժամկետային զինծառայող, շարքային Մանուչար Մանուչարյանի նկատմամբ, որպես հեղինակություն վայելող զինծառայող առանձնանալու և անառարկելի հեղինակությունն ամրապնդելու անձնական շահագրգռվածությունից ելնելով, սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով, կատարել է իր լիազորությունների և իրավունքների սահմաններից դուրս դիտավորյալ գործողություններ։

Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից երեկոյան «քուն» հրամանից հետո զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար, Մ.Մանուչարյանի նկատմամբ բռնություն գործադրելու՝ երկու ձեռքերով կոկորդից բռնելու, վերջինիս պատին հենելու և կոկորդը սեղմելու, ինչպես նաև դրանից քիչ անց, անկողնում պառկած Մ.Մանուչարյանին ոտքերով հարվածներ հասցնելու պատճառով, նրանց երկուսի հակաօրինական գործողությունների արդյունքում անզգուշությամբ վրա է հասել ծանր հետևանք, այն է՝ վերը նկարագրված պարբերաբար բնույթ կրող ծեծի, ստորացումների, անձնական արժանապատվությունը նվաստացնող գործողությունների ու ծաղրի հետևանքով շարքային Մ.Մանուչարյանի մոտ զարգացել է «Սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով:

Արդյունքում՝ վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։

Աղբյուր` Փաստինֆո