Փաստ ինֆո

Ամբաստանյալ Ժիրայր Սեֆիլյանը հրաժարվել է «Արմավիր» քրեակատարողական հիմնարկում տեսակցություն ունենալ հանրային պաշտպանի՝ ցանկացած հանրային պաշտպանի հետ: Այս մասին Ժիրայր Սեֆիլյանի և մյուսների գործով այսօրվա դատական նիստում հայտարարեց հանրային պաշտպան Մարինե Թովմասյանը:

Պաշտպանը հայտարարեց, որ թեև որպես պաշտպան փորձում է օրենքի շրջանակում իրականացնել իր իրավասությունները, սկսել է ծանոթանալ գործի նյութերին, սակայն այն ընդամենը գեղարվեստական գրքի ընթերցում է լինելու: Մ.Թովմասյանը պարզաբանեց, որ նման պայմաններում ինքը որևէ մարտավարություն չի կարողանալու մշակել և չի կարողանալու որևէ դիրքորոշում հայտնել դատարանին, այսինքն՝ պաշտպանությունը կրելու է ձևական բնույթ:

«Ես՝ Մարինե Թովմասյանս, որևէ ձևով պաշտպանին վերապահված իրավունքներն ու պարտականությունները, մասնավորապես, Սեֆիլյանի և Պողոսյանի («Փաստինֆո». Ժիրայր Սեֆիլյանի ու Ներսես Պողոսյանի) գործով չեմ կարողանալու իրականացնել»,- ասաց պաշտպանը:

Մ.Թովմասյանը միջնորդեց ամբաստանյալներ Ժիրայր Սեֆիլյանի և Ներսես Պողոսյանի նկատմամբ «դատական նիստերի դահլիճից հեռացում» սանկցիան կիրառելու որոշումը վերանայել: Պաշտպանը պարզաբանեց, որ քանի որ ինքը որևէ հնարավորություն չունի ամբաստանյալներին փոխանցել ինչ է տեղի ունեցել նիստում, ո՛ր հարցի վերաբերյալ ի՛նչ դիրքորոշում է հայտնել կամ չի հայտնել, ուստի անհրաժեշտ է, որ ամբաստանյալները վերադարձվեն դատական նիստերի դահլիճ, որպեսզի կարողանան մասնակից լինել իրենց վերաբերյալ գործի քննությանը:

Դատարանն արձանագրեց, որ սանկցիաներ կիրառելը ինքնանպատակ չէ, այն նպատակ ունի կանխել ոչ իրավաչափ գործությունները, վերացնել արդարադատույթան ընթացքում առաջացած խոչընդոտները, ապահովել դատավարության բնականոն ընթացքը: Միջնորդությունը մերժվեց:

Աղբյուր` Փաստինֆո