Փաստ ինֆո

Դատական կարգադրիչների կողմից փաստաբաններին «զննելու» կամ «խուզարկության» ենթարկելու վերաբերյալ Նորիկյան և գործընկներ փաստաբանական գրասենյակի փաստաբաններ՝ Նորայր Նորիկյանը, Գագիկ Մելիքյանը և Մինաս Մուրադյանը հանդես են եկել հայտարարությամբ:

Հայտարարության մեջ մասնավորապես ասվում է.

1. Որպես փաստաբան, թույլ չենք տվել և այսուհետ ևս թույլ չենք տալու, որ որևէ դատական կարգադրիչ՝ ՀՀ դատական օրենսգրքով սահմանված կարգով իր իրավունքներն իրացնելիս անգամ փորձ կատարի՝ զննության անվան տակ խուզարկություն կատարի:

2. Նշված մի քանի փորձ արձանագրվել է վերջերս մի քանի դատարաններ մուտք գործելիս, և մեր կողմից տրվել է համարժեք արձագանք:

3. ՀՀ դատական օրենսգրքով սահմանված դատարան կամ դատական նիստերի դահլիճ մուտք գործող անձանց և նրանց իրերը զննության ենթարկելու դատական կարգադրիչի իրավունքը չպետք է կամայականորեն վերածվի որևէ փաստաբանի արժանապատվությունը նվաստացնելու և նրան անձնապես վիրավորելու գործընթացի:

4. Պետք է հստակ գիտակցել, որ ի դեմս փաստաբանների, գործ ունենք որոշակի կարգավիճակ ունեցող մարդկանց հետ, ովքեր դատարան են գալիս մարդու իրավունքների պաշտպանություն իրականացնելու համար և վերջիններիս մեջ հնարավոր օրինախախտ փնտրելն առնվազն չհիմնավորված կասկածամտության անբարեխիղճ դրսևորում է։

5․ Դատական կարգադրիչները պարտավոր են իրենց իրավունքն իրացնելիս հստակ տարբերակում դնել փաստաբանների և դատական նիստին որպես ունկընդիր ներկա գտնվող այլ անձանց միջև: Զննության ենթարկելը իրավունք է, և այն որևէ ձևով չպետք է չարաշահվի՝ ի վնաս փաստաբանի:

6. Դատական կարգադրիչների կողմից իրավունքի իրացման չարաշահումը կարող է դիտարկվել ոչ միայն ոչ իրավաչափ գործողություն, այլև որպես փաստաբանի լիազորությունների իրականացմանը խոչընդոտում, ինչը կարող է հիմք հանդիսանալ համապատասխան իրավական գործընթացների ձեռնարկմանը։

7. Որևէ պետական կամ տեղական ինքնակառավարման մարմին և նրա որևէ աշխատակից՝ անկախ իր դիրքից, զբաղեցրած պաշտոնից և սոցիալական կարգավիճակից, չպետք է մոռանա, որ փաստաբանը մարդու իրավունքների պաշտպան է, որի գործունեությունն ուղղված է ցանկացած ապօրինության բացահայտմանը, և նրա նկատմամբ ցանկացած ոտնձգություն դիտվելու է որպես ոտնձգություն մարդու իրավունքների դեմ:

8.Փաստաբանները «Որբի գլուխ չեն, որ ոնց ուզենան, գլուխները խուզեն»: Անհրաժեշտ է հաշտվել այն իրողության հետ, որ փաստաբանական ինստիտուտն իր բոլոր թերություններով հանդերձ կայացած է, և անկախ իրենց սուբյեկտիվ պատկերացումներից ու ցանկություններից, այդ ինստիտուտի հետ անհրաժեշտ է հաշվի նստել։

9․ ՀՀ Դատական օրենսգրքով սահմանված դատական կարգադրիչի կողմից զննության իրավունքի իրացման հարցը ենթակա է իրավական հստակեցման, ինչպես նաև ՀՀ Դատարանների նախագահների խորհրդի կողմից հաստատված «Դատական կարգադրիչների կողմից դատարան կամ դատական նիստերի դահլիճ մուտք գործող անձանց և նրանց իրերը զննության ենթարկելու մասին» հաստատված կարգը ենթակա է լրացման ու փոփոխության, որպիսի պայմաններում հնարավոր կլինի հարցին տալ կոնկրետ ու առարկայական լուծում, ինչը և վերջ կդնի տարընթերցումներին ու հնարավոր բոլոր շահարկումներին։

Աղբյուր` Փաստինֆո