Փաստ ինֆո

ՀՀ փաստաբանների պալատի խորհուրդը՝ քննության առնելով դատավոր Արմեն Բեկթաշյանի որոշման հիման վրա հարուցված՝ փաստաբան Հայկ Ալումյանի վերաբերյալ կարգապահական գործը, գտել է, որ փաստաբանի գործողություններում առկա չէ խախտում:

Ինչպես «Փաստինֆո»-ի լրագրողի հետ զրույցում հայտնեց Հայկ Ալումյանը, ՓՊ խորհուրդը միաժամանակ գտել է, որ խախտումն առկա է Վահան Շիրխանյանի ու մյուսների վերաբերյալ գործը քննող դատավոր Բեկթաշյանի գործողություններում, որի հետևանքով փաստաբանը զրկվել է իրեն վերաբերվող հարցի շուրջ կարծիք հայտնելու իրավունքից ու հնարավորությունից: Ուստի Խորհուրդը որոշել է դատավորի նման վարքագծի կապակցությամբ դիմել Արդարադատության խորհուրդ:
Հայկ Ալումյանը նշեց, որ իր երկու հիմնական փաստարկներից գլխավորն այն է, որ դատավորը՝ ընդմիջելով դատական նիստը չի ասել, թե մինչև ե՞րբ է հետաձգում դատական նիստը, ուստի դատավարության մասնակիցներից և ոչ ոք, այդ թվում՝ ինքը, նիստի ժամը չիմանալու պարագայում պարտականություն չուներ չհեռանալ դատական նիստերի դահլիճից և դատարանի շենքից:

Փաստաբանը նշեց, որ դատարանն առանց իրեն տեղեկացնելու նիստի ժամի մասին՝ իր բացակայությամբ քննել էր իր նկատմամբ կարգապահական վարույթ հարուցելու համար ՓՊ դիմելու հարցը:
Հիշեցնենք, որ դատավորը նաև տեղաշարժվելու հետ կապված առողջական խնդիրներ ունեցող Վահան Շիրխանյանին նախ նախազգուշացրել էր, ապա հեռացրել դատական նիստերի դահլիճից՝ ոտքի չկանգնելու համար: Դրանից հետո դատավորը հետաձգել էր դատական նիստը՝ չնշելով, թե որքա՞ն ժամանակով է ընդմիջվում դատական նիստը և այն ե՞րբ է շարունակվելու: Տասը րոպե անց վերսկսելով դատական նիստը՝ դատավորը հայտնաբերել էր, որ Հայկ Ալումյանը դատական նիստերի դահլիճում չէ, և դա գնահատել որպես անհարգալից վերաբերմունք դատարանի հանդեպ և որոշում կայացրել դիմել ՓՊ-ին Հայկ Ալումյանին կարգապահական պատասխանատվության ենթարկելու հարցով:

Աղբյուր` Փաստինֆո