Փաստ ինֆո

Սիրած աղջկան վարկաբեկելու և սուտ տեղեկություններ հայտնելու հարցերի պարզաբանման ընթացքում տեղի ունեցած սպանության գործով այսօր տուժողի իրավահաջորդի ներկայացուցիչ, փաստաբան Աշոտ Ապրեսյանը միջնորդեց ամբաստանյալ Գոռ Սարգսյանին դատապարտել ազատազրկման հոդվածով նախատեսված առավելագույն չափով:

ՀՀ քրեական օրենսգրքի 104-րդ հոդվածի՝ սպանությունը, 1-ին մասը, որով մեղադրվում է Գոռ Սարգսյանը, նախատեսում է 8-15 տարվա ազատազրկում:

«Սառնասրտորեն սպանել է, սառնասրտորեն էլ պետք է պատժվի»,- ասաց տուժողի իրավահաջորդի ներկայացուցիչը:

Ա.Ապրեսյանը նշեց, որ 4 մլն. 128 հազար դրամի չափով հանցագործությամբ պատճառված վնասի հատուցման վերաբերյալ տուժող կողմի ներկայացրած քաղհայցի երկու մլն-ը վերականգնվել է, մնացած՝ 2 մլն. 128 հազարն ևս ենթակա է բավարարման:

Ներկայացուցիչը հայտարարեց՝ իր վստահորդի ուսանող որդին, ով նպատակներ ուներ իրականացնելու, ի՞նչ է արել, հակաօրինական ի՞նչ գործողություն, վարքագիծ, պահվածք է դրսևորել, որ արժանացել է ամբաստանյալի դանակի հարվածին:

Տուժողի իրավահաջորդի ներկայացուցիչը նշեց, որ գործի քննությամբ հիմնավորված է, որ ամբաստանյալն է նախաձեռնել հանդիպել տուժողին: Վերջինիս մեղքը միայն այն է եղել, որ նա ասել է ամբաստանյալին, որ նրա սիրած աղջիկը և իր նախկին ընկերուհին տուն տանելու աղջիկ չէ:

Մի քանի օր անց ամբաստանյալը նորից հանդիպել է տուժողի հետ՝ «ցինիկաբար գլխով հարվածել տուժողի դեմքին ու դանակը խրել նրա սրտի մեջ»: Տուժողի իրավահաջորդի ներկայացուցիչը հավելեց, որ Գոռ Սարգսյանը իրեն իրավունք է վերապահել խլել Աստծո պարգևած կյանքը:

Ցավակցություն հայտնելով տուժողի հարազատներին՝ տուժողի իրավահաջորդի ներկայացուցիչը նշեց, որ հանցագործությունը անդառնալի կորուստ ու մեծ ցավ է պատճառել տուժողի ընտանիքին: Տուժողի իրավահաջորդի յոթամյա երեխան ամեն օր հորից եղբորն է պահանջում, տուժողի մայրն այնպիսի ծանր հոգեվիճակում է, որ չի կարողացել գալ դատարան ու նայել իր որդուն կյանքից զրկած մարդու դեմքին:

Պաշտպանական կողմն իր ճառում նշեց, որ նախաքննության ժամանակ նշանակված դատահոգեբանական ու դատահոգեբուժական համալիր փորձաննությունը կատարելիս հոգաբանական մասով փորձագետները բավարար տվյալներ չեն ունեցել աֆեկտի երրորդ փուլ արձանագրելու համար: Ուստի փորձաքննությունը լիարժեք չէ:

Ամբաստանյալի պաշտպան Կարեն Հովհաննիսյանը միջնորդեց անթույլատրելի ապացույց ճանաչել ներքին դիտում օպերատիվ-հետախուզական գործողության ամփոփ տեսագրությունը: Պաշտպանը դատարանի ուշադրությունը հրավիրեց այն հանգամանքի վրա, որ ներքին դիտում կատարելու համար դատարան միջնորդություն ներկայացվել է 2016թ. ապրիլի 9-ին, ժամը 06.30-ին այն դեպքում, որ Գոռ Սարգսյանը միայն 06.50-ին է ինքնակամ ներկայացել իրավապահ մարմիններին:

Ըստ պաշտպանի, ակնհայտ է պաշտպանության իրավունքի խախտում:

Պաշտպանն ընդգծեց, որ տուժողն իր պաշտպանյալին հայտնել է, որ իր սիրած աղջիկն կույս չէ և սեռական հարաբերություններ է ունեցել իր հետ: Ասվածի հետևանքով ամբաստանյալը տևական, հոգեմաշող վիճակում է եղել: Բժշկական հետազոտությամբ հավաստիանալով, որ աղջիկը կույս է, երկրորդ անգամ հանդիպել է տուժողին նրանից հարցնելու, թե ինչու է վարկաբեկում իր սիրած աղջկան: Ամբաստանյալն, ըստ պաշտպանի, հանդիպման է գնացել միայն կոնֆլիկտը լուծելու համար: Սակայն այդ հանդիպմանը ևս տուժողը պնդել է, որ քնել է աղջկա հետ: «Հոգեճնշող վիճակում է կատարվել այս դեպքը»,- ասաց պաշտպանը:

Կարեն Հովհաննիսյանը միջնորդեց սպանության հոդվածով ամբաստանյալին առաջադրված մեղադրանքը վերաորակել ՀՀ քրեական օրենսգրքի 105-րդ հոդվածով՝ հոգեկան խիստ հուզմունքի վիճակում կատարված սպանություն, մեղադրանքի:

Սակայն եթե դատարանը գտնի, որ առաջադրված մեղադրանքը հիմնավորված է, պաշտպանը խնդրեց, որ դատարանը հաշվի առնի, որ հանցագործությունը պայմանավորված է տուժողի վարքագծի հակաբարոյականությամբ, հանցագործությամբ պատճառված վնասը կամովին հատուցվել է, ամբաստանյալն ինքնակամ ներկայացել է իրավապահ մարմիններին:

Պաշտպանը միջնորդեց նշանակել նվազագույն պատիժ:

Գործով մեղադրողն իր հերթին միջնորդեց իրեն ողջամիտ ժամկետ տրամադրել ռեպլիկով հանդես գալուն նախապատրաստվելու համար՝ դատարանը բավարարեց միջնորդությունը, և դատական նիստը հետաձգեց:

Աղբյուր` Փաստինֆո