Փաստ ինֆո

Հիմնվելով հայ և ռուս մասնագետների՝ ՀՀ ՊՆ ուղղաթիռով Խոսրովի արգելանոցում իրականացված օդային հետախուզության տվյալների վրա՝ որոշում է կայացվել ինքնաթիռի միջոցով օդային հրդեհաշիջումը մեկնարկել վաղ լուսաբացին:

ՌԴ ԱԻՆ հրդեհաշիջման «ԻԼ-76» ինքնաթիռը գտնվում է «Էրեբունի» օդանավակայանում, որտեղ լիցքավորվում է ջրով և նախապատրաստվում առավոտյան թռիչքին:

 Ինքնաթիռը վայրէջք է կատարել «Էրեբունի» օդանավակայանում այսօր՝ ժամը 19.20-ին։

Ռուսական օդանավը դիմավորել են ՀՀ ԱԻ փոխնախարար Է. Ապրիամովը և Հայ-ռուսական մարդասիրական արձագանքման կենտրոնի տնօրենի տեղակալ, փ/ծ փոխգնդապետ Վ.Ռշտունին:

Այս պահին հայ-ռուսական փրկարարական խումբը ՀՀ ՊՆ ուղղաթիռով մեկնել է դեպքի վայր՝ օդային հետախուզություն իրականացնելու, որի արդյունքների հիման վրա ինքնաթիռի միջոցով կիրականացվի օդային հրդեհաշիջում:

Օդանավակայան է ժամանել նաև 12 ջրատար՝ ընդհանուր 90 տոննա ջրատարողությամբ, որոնք նախատեսված են ինքնաթիռը ջրով լիցքավորման համար:

Ինչպես տեղեկացրել ենք՝ «Խոսրովի անտառ» պետական արգելոցում հրդեհ է բռնկվել օգոստոսի 12-ին։  

Ըստ նախնական տվյալների՝ 200-250 հա տարածքում այրվում է բուսածածկ և անտառածածկ տարածք: Առկա է քամի, ինչը նպաստում է հրդեհի տարածմանը:

 «Փաստինֆո»-ի տեղեկություններով արգելոցում բռնկված հրդեհը վտանգավոր իրավիճակ է ստեղծել նաեւ անտառի կենդանական աշխարհի համար, ինչը եւս դժվարեցնում է հրդեհի մարման աշխատանքները։

Հրդեհի դեպքի առթիվ Քննչական կոմիտեն հարուցել է քրեական գործ։ 

Աղբյուր` Փաստինֆո